ବରଗଡ଼,୭।୧୨(ପ୍ରେମାନନ୍ଦ ଖମାରୀ): ଓଡ଼ିଶା-ଛତିଶଗଡ ରାଜ୍ୟର ଧାନ ସଂଗ୍ରହ ପ୍ରକ୍ରିୟା ତଥା ବିକ୍ରି ବ୍ୟବସ୍ଥା ମଧ୍ୟରେ ଆକାଶ ପାତାଳ ଫରକ ରହିଛି ବୋଲି ବରଗଡ଼ର ଚାଷୀ ସଙ୍ଗଠନ ଜୟ କିଷାନ ଆନ୍ଦୋଳନ ମତବ୍ୟକ୍ତ କରିଛି। ଉକ୍ତ ସଙ୍ଗଠନର ଏକ ପ୍ରତିନିଧି ଦଳ ଶୁକ୍ରବାର ଛତିଶଗଡ଼ର ଧାନ ବିକ୍ରି ବ୍ୟବସ୍ଥା ଅନୁଧ୍ୟାନ କରିବା ପାଇଁ ଛତିଶଗଡ଼-ଓଡ଼ିଶା ସୀମାନ୍ତରେ ଥିବା ବିଭିନ୍ନ ମଣ୍ଡି ବୁଲିବାକୁ ଯାଇଥିଲେ। ବରିଷ୍ଠ ଚାଷୀ ନେତା ଶିବ ପ୍ରସାଦ ପ୍ରଧାନ, ଜୟ କିଷାନ ଆନ୍ଦୋଳନର ଜିଲା ସଭାପତି ସୁଶୀଲ କୁମାର ସାହୁ, ସାଧାରଣ ସମ୍ପାଦକ ହର ବଣିଆଁ, ଭେଡେନ ବ୍ଲକ ସଭାପତି ମହେଶ୍ବର ପ୍ରଧାନ ପ୍ରମୁଖ ଛତିଶଗଡ଼ ରାଜ୍ୟର ଚିବରାକୁଟା ଏବଂ ସାଗରପାଲି ମଣ୍ଡିକୁ ଯାଇ ସେଠାକାର ଚାଷୀ ଓ ସରକାରୀ ଅଧିକାରୀଙ୍କୁ ଭେଟି ଧାନ ବିକ୍ରି ବ୍ୟବସ୍ଥା ବିଷୟରେ ପଚାରି ବୁଝିଥିଲେ।
ବରଗଡ଼ ଜିଲା ସୋହେଲାଠାରୁ ମାତ୍ର ୨୦ କିଲୋମିଟର ଦୂରରେ ଅବସ୍ଥିତ କ୍ରୟକେନ୍ଦ୍ର ଏବଂ ୟାର୍ଡମାନଙ୍କରେ କୌଣସି ଭିତ୍ତିଭୂମି ନ ଥାଇ ମଧ୍ୟ ଅତି ସୁରୁଖୁରୁରେ ଧାନ କିଣାବିକା ଚାଲିଛି ବୋଲି ଉକ୍ତ ସଙ୍ଗଠନର ପ୍ରତିନିଧିବୃନ୍ଦ କହିଛନ୍ତି। ସେଠାକାର ଚାଷୀମାନଙ୍କୁ ସ୍ଥାନୀୟ ପ୍ରାଥମିକ ସେବା ସମବାୟ ସମିତି ଟୋକନ ଜାରି କରିଥାନ୍ତି। ଚାଷୀମାନେ ଟୋକନ ପାଇ ୟାର୍ଡକୁ ନିଜ ସାଧନରେ ଧାନ ଆଣନ୍ତି। ସେହି ଧାନକୁ ୟାର୍ଡ ଅଧିକାରୀ ଆର୍ଦ୍ରତା ପରୀକ୍ଷା କରି ୧୭ ପ୍ରତିଶତ ପର୍ଯ୍ୟନ୍ତ ଥିଲେ ବିକ୍ରିଯୋଗ୍ୟ ଘୋଷଣା କରନ୍ତି। ଅଧିକାରୀଙ୍କ ଘୋଷଣା ପରେ ଚାଷୀଙ୍କୁ ବସ୍ତା ଦିଆଯାଏ। ସେହି ଚାଷୀଙ୍କ ଧାନ ଓଜନ ପରେ ତାଙ୍କୁ ମାତ୍ର କିଛି ଘଣ୍ଟା ମଧ୍ୟରେ ରସିଦ ଦିଆଯାଇଥାଏ। ସେଠାରେ ଚାଷୀ ଗୋଟିଏ ଦିନରେ ଧାନ ବିକ୍ରିକରିଥାଏ ବୋଲି ଏହି ପ୍ରତିନିଧି ପ୍ରକାଶ କରିଛନ୍ତି।
ଗତ ସରକାର ସମୟରେ ଛତିଶଗଡ ଭଳି ଏଠାରେ ଧାନ ବିକ୍ରି ବ୍ୟବସ୍ଥା ପାଇଁ ଅନେକ ପ୍ରସ୍ତାବ ଦିଆଯାଇଥିଲା। କିନ୍ତୁ ଦୀର୍ଘ ୨୪ ବର୍ଷ ଶାସନ କାଳରେ ୟାର୍ଡରେ ମିଲ ମାଲିକ ଓ ଦଲାଲମାନଙ୍କ ରାଜ୍ ଚାଲିଥିଲା ଏବଂ ଚାଷୀମାନେ କଟନୀଛଟନୀରେ କ୍ଷତିଗ୍ରସ୍ତ ହେଉଥିଲେ ବୋଲି ଉକ୍ତ ଚାଷୀ ସଙ୍ଗଠନ ଅଭିଯୋଗ କରିଛି। ଅନ୍ୟପକ୍ଷେ ବର୍ତ୍ତମାନର ସରକାର ଧାନ କୁଇଣ୍ଟାଲ ପ୍ରତି ୩୧୦୦ ଟଙ୍କା ଦେବା ସହ କଟନୀ ଛଟନୀ ବନ୍ଦ କରାଯିବା, ମଣ୍ଡିରେ ଦଲାଲରାଜ ସମାପ୍ତ ଏବଂ ଜିଲାପାଳଙ୍କୁ ଧାନ ବିକ୍ରିର ସମ୍ପୂର୍ଣ୍ଣ କ୍ଷମତା ଦିଆଯିବା ପାଇଁ ଘୋଷଣା କରିଥିଲେ। କିନ୍ତୁ ବାସ୍ତବରେ ଦେଖିବାକୁ ଗଲେ ବର୍ତ୍ତମାନ ଓଡିଶାର ଧାନ କ୍ରୟକେନ୍ଦ୍ର ମାନଙ୍କରେ ଗ୍ରେନ୍ ଆନାଲାଇଜର୍ ମେଶିନ ଆଣି ଚାଷୀମାନଙ୍କ ସମସ୍ତ ଧାନକୁ ଅଯୋଗ୍ୟ ଘୋଷଣା କରାଯାଉଛି। ଏହି ଗ୍ରେନ୍ ଆନାଲାଇଜର୍ ମେଶିନ ଅନ୍ୟ କୌଣସି ରାଜ୍ୟରେ ନ ଥିବା ଉକ୍ତ ଚାଷୀ ସଙ୍ଗଠନର ପ୍ରତିନିଧିମାନେ କହିଛନ୍ତି। ଗ୍ରେନ୍ ଆନାଲାଇଜର ଭୟ ସହିତ ଟୋକନ ସମସ୍ୟା, ବସ୍ତା ଓ ଅନ୍ୟାନ୍ୟ ସମସ୍ୟାକୁ ନେଇ ଆମ ଚାଷୀ ମଣ୍ଡିକୁ ଧାନ ଆଣିବା ପାଇଁ ଇଚ୍ଛା କରୁନାହାନ୍ତି। ଜନ ପ୍ରତିନିଧି ଏ ଦିଗରେ ଆଦୌ ଚିନ୍ତା କରୁ ନାହାନ୍ତି ବରଂ ଚାଷୀମାନଙ୍କୁ ବିଦ୍ରୂପ କରୁଛନ୍ତି ବୋଲି ସଙ୍ଗଠନ ଅଭିଯୋଗ କରିଛି।
ଆସନ୍ତା ୮ତାରିଖରେ ମୁଖ୍ୟମନ୍ତ୍ରୀଙ୍କ ସୋହେଲା ଗସ୍ତ କାର୍ଯ୍ୟକ୍ରମ ରହିଛି। ଏହି କାର୍ଯ୍ୟକ୍ରମରେ ଧାନର ସହାୟକ ମୂଲ୍ୟଠାରୁ ୮୦୦ ଟଙ୍କା ଅତିରିକ୍ତ ସହାୟତା, ଛତିଶଗଡ ଭଳି ଧାନବିକ୍ରିରେ ବିକେନ୍ଦ୍ରୀକରଣ ବ୍ୟବସ୍ଥା, ଜିଲାସ୍ତରୀୟ ଧାନ ସଂଗ୍ରହ କମିଟିକୁ କାର୍ଯ୍ୟକ୍ଷମ କରିବା ଏବଂ ଟୋକନ ସମସ୍ୟାର ସମାଧାନ ଜିଲା ପ୍ରଶାସନ ଦ୍ୱାରା କରିବା, ଡିଜିଟାଲ ଆନାଲାଇଜର୍ ମେଶିନ ବନ୍ଦ କରି ଧାନ କିଣିବା, ବସ୍ତା ଯୋଗାଇ ଦେବା ପାଇଁ ମୁଖ୍ୟମନ୍ତ୍ରୀ ଘୋଷଣା କରନ୍ତୁ ବୋଲି ଚାଷୀ ସଙ୍ଗଠନ ଜୟ କିଷାନ ଆନ୍ଦୋଳନ ଦାବି କରିଛି।