ଭଦ୍ରକ ଅଫିସ,୭।୩: ଭଦ୍ରକ-ପୁରୀ ମେମୁ ଟ୍ରେନ୍ ଚଳାଇବା ଦାବିରେ ମଙ୍ଗଳବାର ପୂର୍ବତନ ବିଧାୟକ ନରେନ ପଲେଇ ଓ ତାଙ୍କ ସମର୍ଥକ ଭଦ୍ରକଠାରେ ରେଳରୋକୋ କରିଛନ୍ତି l ସକାଳ ୭ଟାରେ ସମର୍ଥକମାନଙ୍କ ସହ ଭଦ୍ରକ ଚରମ୍ପା ଷ୍ଟେଶନର ଦକ୍ଷିଣ ପାର୍ଶ୍ୱ ୧୦୮ ଲେଭଲ କ୍ରସିଂ ଡଗରସାହିଠାରେ ୧ ଘଣ୍ଟିଆ ରେଳରୋକୋ କରିଥିଲେ। ଗତ ନଭେମ୍ବର ୨୯ରେ ମେମୁ ଟ୍ରେନ ଚାଲିବାକୁ ଥିବାବେଳେ ଏହାକୁ ଜଳେଶ୍ୱରକୁ ନିଆଗଲା। ଭଦ୍ରକ ପାଇଁ ଏହା ଦୁଃଖର ବିଷୟ ବୋଲି ନରେନ ଅଭିଯୋଗ କରିଛନ୍ତି।
ପଲେଇଙ୍କ ନେତୃତ୍ୱରେ ପ୍ରତି ମାସରେ ଏହି ଦାବିରେ ୧ ଘଣ୍ଟିଆ ରେଳରୋକୋ କରାଯାଉଛି। ମଙ୍ଗଳବାର ଧାରଣା ବେଳେ ଖୋର୍ଦ୍ଧା ଡିଭିଜନ ଆର୍ପିଏଫ୍ ମୁଖ୍ୟ ଖୋର୍ଦ୍ଧା ଡିଆର୍ଏମ୍ଙ୍କ ସହ ଆଲୋଚନା କରି ଖୁବ୍ଶୀଘ୍ର ନୂଆ ମେମୁ ଚାଲିବାର ବ୍ୟବସ୍ଥା କରାଯିବ ବୋଲି ଫୋନ ଯୋଗେ କହିଥିବା ପଲେଇ କହିଛନ୍ତି l ଏହି ପ୍ରତିଶ୍ରୁତି ମିଳିବା ପରେ ଧାରଣା ପ୍ରତ୍ୟାହୃତ ହୋଇଥିଲା l ଟ୍ରେନ୍ ନ ଚାଲିବା ପର୍ଯ୍ୟନ୍ତ ପ୍ରତି ମାସରେ ଏହି ଧାରଣା ଚାଲୁରହିବ ବୋଲି ପଲେଇ କହିଛନ୍ତି l