କୋଲକାତା,୩।୪ : ପଶ୍ଚିମବଙ୍ଗରେ ହିଂସା ଘଟଣା ମଧ୍ୟରେ କେନ୍ଦ୍ରୀୟ ସୁରକ୍ଷା ବାହିନୀ ନିୟୋଜନ ପାଇଁ ଦାବି ହୋଇଛି। ହୁଗୁଳି ଜିଲାର ପୁରସୁରା ବିଧାନସଭା ଆସନର ଭାଜପା ବିଧାୟକ ବିମାନ ଘୋଷ ରାଜ୍ୟପାଳ ତଥା କେନ୍ଦ୍ର ସ୍ବରାଷ୍ଟ୍ରମନ୍ତ୍ରୀ ଅମିତ ଶାହାଙ୍କୁ ଚିଠି ଲେଖିଛନ୍ତି। ଏହି ଚିଠିରେ ଭାଜପା ବିଧାୟକ ପଶ୍ଚିମବଙ୍ଗରେ ଚାଲିଥିବା ହିଂସା ସମ୍ପର୍କରେ ଉଲ୍ଲେଖ କରିଛନ୍ତି।
ରାଜ୍ୟପାଳ ସିଭି ଆନନ୍ଦ ବୋଷ ଏବଂ ଅମିତ ଶାହାଙ୍କୁ ଲେଖିଥିବା ଚିଠିରେ ସେ ହୁଗୁଳିରେ ରାମ ନବମୀ ଶୋଭାଯାତ୍ରାରେ ଏକ ଯୋଜନାବଦ୍ଧ ଆକ୍ରମଣ କରାଯାଇଥିବା ଅଭିଯୋଗ କରିଛନ୍ତି। ଆକ୍ରମଣକାରୀମାନେ ପଥର ଫିଙ୍ଗି ଶୋଭା ଯାତ୍ରା ଉପରେ ବୋମା ମାଡ଼ କରିଥିଲେ। ଅଭିଯୋଗ ହୋଇଛି ଯେ ଏହି ସମୟ ମଧ୍ୟରେ ପୋଲିସ ନୀରବ ଦର୍ଶକ ଭାବେ ରହିଥିଲା ଏବଂ ଶୋଭା ଯାତ୍ରାରେ ଥିବା ଲୋକଙ୍କୁ ପୋଲିସ ଉପସ୍ଥିତିରେ ମାଡ ଦିଆଯାଇଥିଲା। ହିଂସା ପ୍ରଭାବିତ ଅଞ୍ଚଳରେ ଶୀଘ୍ର କେନ୍ଦ୍ରୀୟ ବାହିନୀ ନିୟୋଜିତ କରିବାକୁ ସେ ଦାବି କରିଛନ୍ତି।
