ଲକ୍ଷ୍ନୌ, ୨୯ା୮: କେନ୍ଦ୍ରର ଭାଜପା ସରକାର ଦେଶକୁ ବରବାଦ୍ କରୁଛି। ବିକାଶ ପରିବର୍ତ୍ତେ ଦେଶକୁ ପଛକୁ ଟାଣୁଛି। ଗୈରିକ ଦଳକୁ କ୍ଷମତାରୁ ହଟାଇବା ପାଇଁ ଜନସାଧାରଣ ପ୍ରସ୍ତୁତ ହେଲେଣି। ଆଉ କେତୋଟି ନିର୍ବାଚନ ପରେ ଭାଜପା କ୍ଷମତାଚ୍ୟୁତ ହେବ ବୋଲି ରବିବାର ସମାଜବାଦୀ ପାର୍ଟି ଅଧ୍ୟକ୍ଷ ଅଖିଳେଶ ଯାଦବ କହିଛନ୍ତି।
ଅଖିଳେଶ କହିଛନ୍ତି, ୨୦୨୪ ଲୋକ ସଭା ନିର୍ବାଚନ ପାଇଁ ଉତ୍ତରପ୍ରଦେଶର ବଡ଼ ଦାୟିତ୍ୱ ରହିଛି। କେବଳ ଭୋଟ କାଟିବା ପାଇଁ ଛୋଟ ଦଳଗୁଡ଼ିକ ନିର୍ବାଚନ ଲଢ଼ୁଛନ୍ତି। ଏନେଇ ସମାଜବାଦୀ ପାର୍ଟି ଲୋକଙ୍କ ପାଖକୁ ଯାଇ ସଚେତନ କରାଇବ।
କେଉଁ ଦଳ ଭାଜପା ସହ ରହିଛି, କେଉଁ ଦଳ ଏହା ବିରୋଧରେ ଲଢ଼େଇ କରୁଛି ତାହା ମତଦାତା ଜାଣିଛନ୍ତି। ବିରୋଧୀ ଏକତା ପାଇଁ ଜାତୀୟ ସ୍ତରରେ ତେଲଙ୍ଗାନା ମୁଖ୍ୟମନ୍ତ୍ରୀ କେ. ଚନ୍ଦ୍ରଶେଖର ରାଓ, ଏନ୍ସିପି ଅଧ୍ୟକ୍ଷ ଶରଦ ପାଓ୍ବାର ଓ ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ମମତା ବାନାର୍ଜୀଙ୍କ ସହ ମିଶି ଲଗାତର ଉଦ୍ୟମ ଚାଲିଛି। ସେପଟେ ବିହାରରେ ମଧ୍ୟ ସମୀକରଣ ବଦଳି ସାରିଛି। ମୁଖ୍ୟମନ୍ତ୍ରୀ ନୀତୀଶ କୁମାର କେନ୍ଦ୍ର ବିରୋଧୀ ଅଭିଯାନ ଆରମ୍ଭ କରିଛନ୍ତି। ବିରୋଧୀଙ୍କ ପ୍ରଧାନମନ୍ତ୍ରୀ ଚେହେରା କିଏ ହେବେ ତାହା ବଡ଼ କଥା ନୁହେଁ।
ଗୁରୁତ୍ୱପୂର୍ଣ୍ଣ ବିଷୟ ହେଉଛି, କିପରି ଭାଜପାକୁ ହଟାଇ ଗଣତନ୍ତ୍ରର ସୁରକ୍ଷା କରାଯିବ ବୋଲି ଅଖିଳେଶ କହିଛନ୍ତି। ଏହି ଅବସରରେ ଉତ୍ତରପ୍ରଦେଶର ମଥୁରା ଓ ବୃନ୍ଦାବନରେ ଐତିହ୍ୟସ୍ଥଳଗୁଡ଼ିକୁ ଭାଜପା କ୍ଷତି ପହଞ୍ଚାଉଛି। ବିକାଶମୂଳକ କାର୍ଯ୍ୟ ପାଇଁ ଦିଆଯାଇଥିବା ପାଣ୍ଠି ଆତ୍ମସାତ କରାଯାଉଥିବାବେଳେ ସେଥିପ୍ରତି ଆଦୌ ଦୃଷ୍ଟି ଦିଆଯାଉନାହଁି ବୋଲି ଅଖିଳେଶ ସମାଲୋଚନା କରିଛନ୍ତି।