ପାରଳାଖେମୁଣ୍ଡି,୧୬ା୯(ଡି.ଏନ୍.ଏ.): ଗଜପତି ଜିଲାରେ ଦିନକୁ ଦିନ ଡେଙ୍ଗୁ ରୋଗୀଙ୍କ ସଂଖ୍ୟା ବଢିଚାଲିଛି। ବର୍ତ୍ତମାନ ସୁଦ୍ଧା ସରକାରୀ ଭାବେ ଜିଲାରେ ୪୨ ରୋଗୀ ଚିହ୍ନଟ ହୋଇଛନ୍ତି। ହେଲେ ବେସରକାରୀ ଭାବେ ଏହି ସଂଖ୍ୟା ତିନି ଗୁଣ ହେବ। ଅନ୍ୟପକ୍ଷେ ମାସକ ମଧ୍ୟରେ ୭ ଡେଙ୍ଗୁ ରୋଗୀଙ୍କ ମୃତ୍ୟୁ ଘଟିଥିବା ସୂଚନା ମିଳିଛିି। ରୋଗୀଙ୍କ ସଂଖ୍ୟା କ୍ରମଶଃ ବୃଦ୍ଧି ପାଉଥିବା ବେଳେ ଲୋକଙ୍କ ମଧ୍ୟରେ ଭୟର ବାତାବରଣ ଖେଳି ଯାଇଛି। ଏନେଇ ଜନସାଧାରଣ ପରିମଳ ବ୍ୟବସ୍ଥାକୁ ଦାୟୀ କରିଛନ୍ତି।
ଜିଲାର ଆଭ୍ୟନ୍ତରୀଣ ଗାଁଗୁଡିକରେ ପରିମଳ ବ୍ୟବସ୍ଥା ନ କହିବା ଭଲ ଏମିତିକି ସଦରମହକୁମା ପାରଳାଖେମୁଣ୍ଡି ପୌରପାଳିକାରେ ମଧ୍ୟ ପରିମଳ ବ୍ୟବସ୍ଥା ଦେଖିଲେ ସ୍ପଷ୍ଟ ଅନୁମାନ କରାଯାଇପାରେ ଏଠାରେ ଡେଙ୍ଗୁ ନିରାକରଣ ବଦଳରେ ଡେଙ୍ଗୁକୁ ପ୍ରଶ୍ରୟ ଦେଲାଭଳି ମନେ ହେଉଛି। ଯେଉଁଠି ଉନ୍ନୟନ ମୂଳକ କାମ ବର୍ଷା ଦିନ ପୂର୍ବରୁ ସରିବା ବଦଳରେ ସହରର ବିଭିନ୍ନ ସ୍ଥାନରେ ଖାଲକମା କରି ଛାଡି ଦିଆଯାଇଛି । ବର୍ଷାଦିନ ହେତୁ ସ୍ଥାନେସ୍ଥାନେ ପାଣି ଜମି ରହୁଛି। ଯେଉଁଠି ଦେଖ ସେଇଠି କୁଢ କୁଢ଼ ଅଳିଆ ଯାହା ମଶାଙ୍କ ବଂଶ ବିସ୍ତାରରେ ସହାୟକ ହେଉଛି। ଜିଲା ମୁଖ୍ୟ ଚିକିତ୍ସାଳୟରେ ଡେଙ୍ଗୁ ରୋଗୀଙ୍କ ଚିକିତ୍ସା ପାଇଁ ସେଭଳି କୌଣସି ବ୍ୟବସ୍ଥା ନାହିଁ । ଫଳରେ ରୋଗୀ ଆନ୍ଧ୍ରପ୍ରଦେଶ ନଚେତ ବ୍ରହ୍ମପୁର ଯିବାକୁ ବାଧ୍ୟ ହେଉଛନ୍ତି । ରୋଗୀ ଗୁରୁତର ହେବାପରେ ବାହାରକୁ ଯାଉଛନ୍ତି ତେଣୁ ଏହାର ତୁରନ୍ତ ପ୍ରତିକାର ବ୍ୟବସ୍ଥା ଗ୍ରହଣ କରିବା ପାଇଁ ବୁଦ୍ଧିଜୀବୀମାନେ ଦାବି କରିଛନ୍ତି।
ସ୍ବାସ୍ଥ୍ୟ ବିଭାଗର କହିବାନୁସାରେ, ବର୍ତ୍ତମାନ ଯାଏ ୪୨ ଡେଙ୍ଗୁ ରୋଗୀ ଚିହ୍ନଟ ହୋଇଛନ୍ତି। ଡେଙ୍ଗୁର ନିରାକରଣ ପାଇଁ ଘରଘର ବୁଲି ସଚେତନ କରାଯାଉଛି। ଏଥିସହ ଏଡିସ ମସା ବ୍ରିଡିଂ ନଷ୍ଟ କରିବା ପାଇଁ ସମସ୍ତ ବ୍ୟବସ୍ଥା କରାଯାଉଥିବା ଜିଲା ମୁଖ୍ୟ ଚିକିତ୍ସା ଅଧିକାରୀ ପି କେ ପାତ୍ର କହିଛନ୍ତି।
