ମାଲକାନଗିରି,୬।୮ (ଡି.ଏନ୍.ଏ.): ବର୍ତ୍ତମାନ କୋଭିଡ ମହାମାରୀ ରୂପେ ବୃଦ୍ଧି ପାଉଥିବା ବେଳେ ନୂତନ ମହାମାରୀ ରୂପେ ଦେଖାଦେଇଛି ମଙ୍କିପକ୍ସ। ଏହାକୁ ନେଇ ରାଜ୍ୟ ସରକାର ଓ ସ୍ବାସ୍ଥ୍ୟ ବିଭାଗ ଚିନ୍ତାରେ ପଡିଛନ୍ତି। ମାଲକାନଗିରି ଜିଲାରେ ବିଭିନ୍ନ ଅଞ୍ଚଳରେ ସ୍ବାସ୍ଥ୍ୟ ବିଭାଗ ଓ ଜିଲା ପ୍ରଶାସନ ସଚେତନତା ସୃଷ୍ଟି କରୁଛି। ଜିଲା ସଦର ମହକୁମା ବୁଟିଗୁଡା ଉଚ୍ଚ ପ୍ରାଥମିକ ବିଦ୍ୟାଳୟରେ ୬୮୦ ଜଣ ଛାତ୍ରୀଛାତ୍ରଙ୍କ ସ୍ବାସ୍ଥ୍ୟ ଅବସ୍ଥା ବଗିଡିବା ସ୍ଥିତିରେ ପହଞ୍ଚତ୍ଛି। ବିଦ୍ୟାଳୟ ପରିସରରେ ପୌର ପରିଷଦ ବର୍ଷା ଜଳ ସଂଗ୍ରହ ପାଇଁ ଗାତ ଖୋଳିଛି। ଜଳ ଯେପରି ଲିକ୍ ନ ହେବ ସେଥିପାଇଁ ସିମେଣ୍ଟ କଂକ୍ରିଟ କୁଣ୍ଡ ତିଆରି କରିଛି। ତେବେ ଏହା ଉପରେ ଜାଲି ଦେବା ନିୟମ ଥିଲେ ମଧ୍ୟ ଏହାକୁ ଅଣଦେଖା କରାରାଯାଉଛି। ନିୟମ ଅନୁଯାୟୀ କାର୍ଯ୍ୟ ହୋଇ ନ ଥିବାରୁ ଗାତର ବର୍ଷା ଜଳ ଉପରକୁ ଉଠି ବିଦ୍ୟାଳୟ ପରିସର ଜଳମଗ୍ନ ହେଉଛି। ବିଦ୍ୟାଳୟ ଛାତ୍ରାବାସରେ ରହୁଥିବା ୨୦୦ ଛାତ୍ରୀଛାତ୍ର ପାଇଖାନାକୁ ଯିବାକୁ ହେଲେ ପାଣି ଭିତରେ ପଶି ଯାତାୟାତ କରୁଛନ୍ତି। ବିଦ୍ୟାଳୟଟି ମାଲକାନଗିରି ବାଲିମେଳା ମୁଖ୍ୟରାସ୍ତାର ସାପ୍ତାହିକ ହାଟ ନିକଟରେ ରହିଛି। ହାଟର ଆବର୍ଜନା ମୁଖ୍ୟ ନାଳ ଦେଇ ବିଦ୍ୟାଳୟ ଭିତରକୁ ପ୍ରବେଶ କରୁଛିା ଏ ସମ୍ପର୍କରେ ପ୍ରଧାନ ଶିକ୍ଷକ ପ୍ରକାଶ ଚନ୍ଦ୍ର ନାୟକ ବାରମ୍ବାର ପୌର ପରିଷଦକୁ ଜଣାଇଥିଲେ ମଧ୍ୟ କୌଣସି ପଦକ୍ଷେପ ନିଆଯାଇନାହିଁ। ଏନେଇ ମାଲକାନଗିରି ପୌର ନିର୍ବାହୀ ଅଧିକାରୀ କେ. ଅଶୋକ ଚକ୍ରବର୍ତ୍ତୀଙ୍କୁ ପଚାରିବାରୁ ସେ କହିଲେ ଯେ, ଏସମ୍ପର୍କରେ କେହି ମୋ ଦୃଷ୍ଟିକୁ ଆଣିନାହାନ୍ତି। ମୁଁ ଖୁବ୍ ଶୀର୍ଘ ବିଦ୍ୟାଳୟ ପରିଦର୍ଶନ କରିପଦକ୍ଷେପ ନେବି।