ରାଉରକେଲା,୧୬।୭(ସଙ୍ଗୀତା ଜେନା)ବର୍ଷା ମାସ ଜୁଲାଇରୁ ଅକ୍ଟୋବର ପର୍ଯ୍ୟନ୍ତ ଡେଙ୍ଗୁ ଜ୍ୱରର ପ୍ରକୋପ ଦେଖାଯାଇଥାଏ। ଚଳିତବର୍ଷ ଜୁଲାଇ ଦ୍ୱିତୀୟ ସପ୍ତାହ ଅତିକ୍ରମ ହୋଇଥିଲେ ମଧ୍ୟ ରାଉରକେଲା ସରକାରୀ ହସ୍ପିଟାଲ (ଆର୍ଜିଏଚ୍)ରେ ଖୋଲିନାହିଁ ଡେଙ୍ଗୁ ଓ୍ବାର୍ଡ। ଡେଙ୍ଗୁ ନିରାକରଣ ପାଇଁ ବିିବିଧ ପଦକ୍ଷେପ ଗ୍ରହଣ କରାଯାଇଥାଏ। ସହରବାସୀଙ୍କ ଜ୍ୱର ସହ ଭୀଷଣ ହାତ ଓ ଗଣ୍ଠି ବିନ୍ଧା, ଆଖି ଭିତରେ ଯନ୍ତ୍ରଣା, ଦେହରେ ଲାଲ ଦାଗ ଦେଖାଦେବା, କେତେକ କ୍ଷେତ୍ରରେ ବାନ୍ତି ହେବା, ମୁଣ୍ଡ ବିନ୍ଧା ହେବା ଆଦି ଲକ୍ଷଣ ଦେଖାଦେଲେ ତୁରନ୍ତ ନିକଟସ୍ଥ ଡାକ୍ତରଖାନାରେ ପରାମର୍ଶ କରିବାକୁ କୁହାଯାଇଥାଏ। ହେଲେ ଡେଙ୍ଗୁ ଓ୍ବାର୍ଡ ଖୋଲି ନ ଥିବାରୁ ଲୋକେ କେଉଁଠି ପରାମର୍ଶ କରିବେ ବୋଲି ପ୍ରଶ୍ନ ଉଠୁଛି। ଏହାର ପ୍ରତିକାର ସ୍ବରୁପ ପାଣି ରହୁଥିବା ପାତ୍ର, ଟାଙ୍କି, କୁଲର ଇତ୍ୟାଦିକୁ ୨/୩ ଦିନରେ ବଦଳାଇବା, ନିୟମିତ ମଶାରୀ ଟାଙ୍ଗିବା, ପୁରା ଦେହକୁ ଘୋଡାଇ ରଖିବା ଭଳି ପୋଷାକ ପିନ୍ଧିବା, ଘର ଚତୁଃପାର୍ଶ୍ୱରେ ସ୍ଥାନ ପରିଷ୍କାର କରିବା, ପାଣି ଜମା ହେବାକୁ ଦେବା ନାହିଁ ଭଳି ପଦକ୍ଷେପ ଗ୍ରହଣ କରିବାକୁ କୁହାଯାଇଥାଏ। ଜଳାଶୟ ଓ ଅନ୍ୟ ନାଳନର୍ଦ୍ଦମାରେ କେମିକାଲ ସିଞ୍ଚନ କରାଯାଇଥାଏ। ଚଳିତବର୍ଷ ରାଉରକେଲା ମହାନଗର ନିଗମ ପକ୍ଷରୁ ସତର୍କତା ପଦକ୍ଷେପ ଗ୍ରହଣ କରାଯାଇଥିବାବେଳେ ରାଉରକେଲା ସରକାରୀ ଡାକ୍ତରଖାନା (ଆର୍ଜିଏଚ୍)ରେ ଅଦ୍ୟାବଧି ଡେଙ୍ଗୁ ୱାର୍ଡ଼ର ଶୁଭାରମ୍ଭ ହୋଇ ନ ଥିବା ଅଭିଯୋଗ ହୋଇଛି। ଆର୍ଜିଏଚ୍ ପରିସରରେ ଥିବା ରକ୍ତ ଭଣ୍ଡାର ନିକଟରେ ପ୍ରତ୍ୟେକ ବର୍ଷ କେବିନ ବ୍ଲକ ନିକଟରେ ବର୍ଷା ମାସରେ ଅସ୍ଥାୟୀ ଡେଙ୍ଗୁ ୱାର୍ଡ଼ ପରିଚାଳନା କରାଯାଉଥିବାବେଳେ ବର୍ଷର ଅନ୍ୟ ସମୟରେ ଉକ୍ତ ୱାର୍ଡ଼କୁ ଅଂଶୁଘାତ ସେଣ୍ଟର ଭାବେ ବ୍ୟବହାର କରାଯାଇଥାଏ। ତେବେ ଚଳିତବର୍ଷ ଜୁଲାଇର ଦ୍ୱିତୀୟ ସପ୍ତାହ ଅତିକ୍ରମ କରିଥିବାବେଳେ ଡାକ୍ତରଖାନା କର୍ତ୍ତୃପକ୍ଷ ୱାର୍ଡ଼ ନ ଖୋଲିବା ବୁଦ୍ଧିଜୀବୀ ମହଲରେ ଆଲୋଚନାର ଖୋରାକ ଯୋଗାଇଛି। ଏବେ ମଧ୍ୟ ଉକ୍ତ ୱାର୍ଡ଼ ଆଗରେ ଅଂଶୁଘାତର ଫଳକ ଲାଗିରହିଛି। ରୋଗୀ ଏଠାରେ ଆସି ଡେଙ୍ଗୁ ୱାର୍ଡ଼ ନ ପାଇ ଭ୍ରମରେ ରହୁଥିବା କୁହାଯାଇଛି। ୨୦୨୨ ମସିହାରେ ରାଉରକେଲା, ସୁନ୍ଦରଗଡ଼, ଝାଡଖଣ୍ଡ ସୀମାନ୍ତ, ଛତିଶଗଡ଼ ସୀମାନ୍ତ ଅଞ୍ଚଳରୁ ପ୍ରାୟ ୮୯ ଜଣ ଡେଙ୍ଗୁ ରୋଗୀ ଚିକିତ୍ସିତ ହେଉଥିଲେ। ମୃତ୍ୟୁହାର ଶୂନ ରହିଥିଲା। ସେହିପରି ୨୦୨୩ ମସିହା ଜାନୁଆରୀ ମାସ ପ୍ରଥମ ସପ୍ତାହରେ ୮ଜଣ ଡେଙ୍ଗୁ ରୋଗୀ ଚିକିତ୍ସିତ ହୋଇଥିଲେ। ଚଳିତ ବର୍ଷ ଏବେ ପର୍ଯ୍ୟନ୍ତ ଜଣେ ମଧ୍ୟ ରୋଗୀ ଆର୍ଜିଏଚ୍କୁ ଆସି ନାହାନ୍ତି। ଦୈନିକ ସାଧାରଣ ଜ୍ୱର ଓ ଅନ୍ୟ ପ୍ରକାର ରୋଗ ଲାଗି ଶତାଧିକ ରୋଗୀ ଆସୁଛନ୍ତି। ହେଲେ ଡେଙ୍ଗୁ ଲକ୍ଷଣ ସମ୍ପନ୍ନ ରୋଗୀ ପରିଲକ୍ଷିତ ହୋଇନାହାନ୍ତି ବୋଲି ନର୍ସିଂ ଅଫିସର ତଥା ୱାର୍ଡ଼ର ଇନଚାର୍ଜ ଉର୍ବଶୀ ତ୍ରିପାଠୀ କହିଛନ୍ତି। ୱାର୍ଡ଼ ନ ଖୋଲିବା ନେଇ ପଚରାଯିବାରୁ ତ୍ରିପାଠୀ କହିଛନ୍ତି, ଡେଙ୍ଗୁ ରୋଗର ସନ୍ଦେହ ହେଲେ ପ୍ରଥମେ ରକ୍ତ ପରୀକ୍ଷା କରାଯାଇଥାଏ। ପରେ ପ୍ଲେଟଲେଟ ହ୍ରାସ ପାଇଲେ ରୋଗୀଙ୍କୁ ନିଃଶୁଳ୍କ ପ୍ଲେଟଲେଟ ଦିଆଯାଇଥାଏ। ଆନୁସଙ୍ଗିକ ଚିକିତ୍ସା ସହ ମଶା ନିରୋଧୀ କେମିକାଲ ମଶାରୀ ପ୍ରଦାନ କରାଯାଇଥାଏ। ଯଥାଶୀଘ୍ର ୱାର୍ଡ଼ ଖୋଲାଯିବ। ବିଭିନ୍ନ ବ୍ଲକ ଓ ରାଉରକେଲା ପାରିପାର୍ଶ୍ୱିକ ଅଞ୍ଚଳରେ ଅଙ୍ଗନଓ୍ବାଡ଼ି କେନ୍ଦ୍ରମାନଙ୍କ ଦ୍ୱାରା ଡେଙ୍ଗୁ ରୋଗୀଙ୍କ ଅନ୍ବେଷଣ ତଥା ସଚେତନତା ଜାରି ରହିଛି ବୋଲି ସେ କହିଥିଲେ।