ଲକ୍ଷ୍ନୌ,୨୧।୮: ଉତ୍ତରପ୍ରଦେଶ ଦେଓରିଆର ଭାଜପା ବିଧାୟକ ଜନ୍ମେଜୟ ସିଂହଙ୍କ ପରଲୋକ ଘଟିଛି। ଗୁରୁବାର ବିଳମ୍ବ ରାତିରେ ଲକ୍ଷ୍ନୌ ସ୍ଥିତ ରାମ ମନୋହର ଲୋହିଆ ହସ୍ପିଟାଲରେ ସେ ଅନ୍ତିମ ନିଶ୍ୱାସ ନେଇଥିଲେ। ମୃତ୍ୟୁ ବେଳକୁ ତାଙ୍କୁ ୭୫ବର୍ଷ ହୋଇଥିଲା। ଗତ କିଛି ଦିନରୁ ସେ ରୋଗାଗ୍ରସ୍ତ ଥିଲେ। କିନ୍ତୁ ଗୁରୁବାର ରାତିରେ ହୃଦ୍ଘାତ ହେବାରୁ ତାଙ୍କର ମୃତ୍ୟୁ ହୋଇଛି। ତାଙ୍କର ମୃତ୍ୟୁ ଖବରରେ ନିର୍ବଚାଚନ ମଣ୍ଡଳୀ ଦେଓରିଆରେ ଶୋକର ଛାୟା ଖେଳିଯାଇଛି। ଜନ୍ମେଜୟଙ୍କ ନିଧନ ଖବର ଶୁଣି ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥ ଟୁଇଟ କରି ଶୋକ ପ୍ରକାଶ କରିଛନ୍ତି। ଏଥିସହ ଲେଖିଛନ୍ତି ଦଳ ଆଜି ଜଣେ ଉତ୍ସଗୀକୃତ କର୍ମକର୍ତ୍ତା ଓ ଜନସାଧାରଣ ନିଜ ପ୍ରକୃତ ବନ୍ଧୁଙ୍କୁ ହରାଇଛନ୍ତି। ଭଗବାନ ରାମ ତାଙ୍କ ଆତ୍ମାକୁ ଶାନ୍ତି ପ୍ରଦାନ କରନ୍ତୁ ବୋଲି ଆଦିତ୍ୟନାଥ କହିଛନ୍ତି। ସେହିପରିିି ସମାଜବାଦୀ ପାର୍ଟି(ଏସ୍ପି) ମୁଖ୍ୟ ଅଖିଳେଶ ଯାଦବ ମଧ୍ୟ ଶୋକ ପ୍ରକାଶ କରିବା ସହ ତାଙ୍କ ପରିବାରଙ୍କୁ ସମବେଦନା ଜଣାଇଛନ୍ତି। ଏଥିସହ ଟୁଇଟ କରି କହିଛନ୍ତି, ଜନ୍ମେଜୟଙ୍କ ନିଧନ ଅତ୍ୟନ୍ତ ଦୁଃଖଦାୟକ। ଅନ୍ୟପଟେ ଶୁକ୍ରବାର ଲକ୍ଷ୍ନୌରୁ ଜନ୍ମେଜୟଙ୍କ ପାର୍ଥିବ ଶରୀର ଦେଓରିଆ ସ୍ଥିତ ବାସଭବନକୁ ଅଣାଯାଇଛି। ସେଠାରେ ତାଙ୍କ ଅନ୍ତିମ ଦର୍ଶନ ପାଇଁ ଭାଜପା କର୍ମକର୍ତ୍ତା ଓ ସମର୍ଥକଙ୍କ ସୁଅ ଛୁଟିବାରେ ଲାଗିଛି।
