ଭୁବନେଶ୍ୱର, ୫।୧୨(ବ୍ୟୁରୋ): ଓଡ଼ିଶାରେ ଟେଷ୍ଟିଂ କମିବା ଓ କରୋନା ଆକ୍ରାନ୍ତଙ୍କ ସଂଖ୍ୟା ବଢ଼ିବାକୁ ନେଇ ଶନିବାର କେନ୍ଦ୍ର ସରକାର ଉଦବେଗ୍ ପ୍ରକାଶ କରିବା ପରେ ରବିବାର ସ୍ବାସ୍ଥ୍ୟ ବିଭାଗ ପ୍ରତିକ୍ରିୟା ରଖିଛି। ଏହି ସମ୍ପର୍କରେ ସ୍ବାସ୍ଥ୍ୟ ନିର୍ଦ୍ଦେଶକ ଡା. ବିଜୟ ମହାପାତ୍ର କହିଛନ୍ତି, କେନ୍ଦ୍ର ସରକାର ଯେଉଁ ତଥ୍ୟ ଦେଇଛନ୍ତି ତାହା ଗତ ସପ୍ତାହର ତଥ୍ୟ। ବର୍ଷା ଯୋଗୁ ରାଜ୍ୟରେ କିଛି ମାତ୍ରାରେ ଟେଷ୍ଟିଂ କମିଥିଲା। କିନ୍ତୁ ଶନିବାରଠାରୁ ଟେଷ୍ଟିଂ ହାର ପୁଣି ବଢ଼ାଯାଇଛି। ୬ ଜିଲାରେ କରୋନା ଆକ୍ରାନ୍ତଙ୍କ ସଂଖ୍ୟା ବଢ଼ିଥିଲା। ତେବେ ଏଥିରେ ପୁଣି ହ୍ରାସ ପରିଲଖିତ ହୋଇଛି। ହାରାହାରି ସଂଖ୍ୟା ଉପରେ ନଜର ପକାଇଲେ ବି ଓଡ଼ିଶା ଜାତୀୟ ହାର ତୁଳନାରେ ଆଗରେ ରହିଛି ବୋଲି ସେ କହିଛନ୍ତି।
ପ୍ରତି ୧ ଲକ୍ଷରେ ଦେଶରେ ୨,୬୮୫ ଟେଷ୍ଟ ହେଉଥିବା ବେଳେ ରାଜ୍ୟରେ ୪,୫୪୨ ଟେଷ୍ଟିଂ ହେଉଛି। ସଂକ୍ରମଣ ଜାତୀୟ ହାର ୧.୧ ପ୍ରତିଶତ ଥିବା ଓଡ଼ିଶାରେ ୦.୪ ପ୍ରତିଶତ ରହିଛି। ସେହପରି ମୃତ୍ୟୁହାର ଜାତୀୟସ୍ତରରେ ୧.୩ ପ୍ରତିଶତ ଥିବା ବେଳେ ଓଡ଼ିଶାରେ ୦.୮ ପ୍ରତିଶତ ରହିଛି। ତେଣୁ ରାଜ୍ୟରେ କରୋନା ସ୍ଥିତି ନିୟନ୍ତ୍ରଣରେ ଥିବା ସ୍ବାସ୍ଥ୍ୟ ନିର୍ଦ୍ଦେଶକ କହିଛନ୍ତି। କିନ୍ତୁ ଏଥିରେ ଖୁସୀ ହୋଇ ଢିଲା ମାରିବା ନାହିଁ। ଏବେ ବି କରୋନା ନିୟମକୁ କଡ଼ାକଡ଼ି ଭାବେ ପାଳନ କରିବାକୁ ପଡ଼ିବ ବୋଲି ସେ ପରାଶର୍ମ ଦେଇଛନ୍ତି।
ସୂଚନାଯୋଗ୍ୟ, ଓଡ଼ିଶା ସମେତ ୫ ରାଜ୍ୟ ଓ କେନ୍ଦ୍ରଶାସିତ ଅଞ୍ଚଳ ଜମ୍ମୁ-କଶ୍ମୀରର କେତେକ ଜିଲାରେ ଟେଷ୍ଟିଂ କମିବା ଓ କରୋନା ଆକ୍ରାନ୍ତଙ୍କ ସଂଖ୍ୟା ବଢ଼ିବାକୁ ନେଇ କେନ୍ଦ୍ର ସ୍ବାସ୍ଥ୍ୟ ମନ୍ତ୍ରଣାଳୟ ଚିନ୍ତାବ୍ୟକ୍ତ କରିବା ସହିତ ତାଗିଦ୍ କରିଥିଲା। ଓଡ଼ିଶାରେ ଗତ ୧୪ ଦିନ ମଧ୍ୟରେ ଢେଙ୍କାନାଳ ଜିଲାରେ ସଂକ୍ରମଣ ହାର ୬୬୬ ପ୍ରତିଶତ ବୃଦ୍ଧି ପାଇଥିବା ବେଳେ କନ୍ଦମାଳରେ ୨୫୦ ପ୍ରତିଶତ, ନବରଙ୍ଗପୁରରେ ୧୫୦, କେନ୍ଦୁଝରରେ ୧୦୯, ଅନୁଗୋଳରେ ୯୫, ବଲାଙ୍ଗୀରରେ ୭୫ ପ୍ରତିଶତ ବଢ଼ିଥିବା କେନ୍ଦ୍ର ଦର୍ଶାଇଥିଲା। ତେଣୁ ସଂକ୍ରମଣ ରୋକିବାକୁ ଟେଷ୍ଟିଂ, ଟ୍ରାକିଂ, ଚିକିତ୍ସା ଓ ଟିକାକରଣକୁ ବଢ଼ାଇବାକୁ କେନ୍ଦ୍ର ସରକାର ଓଡ଼ିଶା ସମେତ ଅନ୍ୟ ରାଜ୍ୟଗୁଡ଼ିକୁ ମଧ୍ୟ ପରାମର୍ଶ ଦେଇଥିଲେ। କେନ୍ଦ୍ର ସରକାରଙ୍କ ଏଭଳି ଉଦ୍ବେଗ ପ୍ରକାଶ ପରେ ରାଜ୍ୟ ସ୍ବାସ୍ଥ୍ୟ ବିଭାଗ ତା’ର ଉତ୍ତର ଦେଇଛି।
