ଭୁବନେଶ୍ୱର, ୨୦।୭(ଅନୁରାଧା ମହାରଣା): ଘରୋଇ ବ୍ୟାଙ୍କଗୁଡ଼ିକରେ ଋଣ ଏବଂ ଜମା ଅଭିବୃଦ୍ଧି ହାରରେ ଥିବା ପାର୍ଥକ୍ୟ ଲଗାତର ଭାବେ ବଢ଼ିବାକୁ ଲାଗିଛି। ଏହାକୁ ନେଇ ଭାରତୀୟ ରିଜର୍ଭ ବ୍ୟାଙ୍କ(ଆର୍ବିଆଇ) ଗଭର୍ନର ଶକ୍ତିକାନ୍ତ ଦାସ ଉଦ୍ବେଗ ପ୍ରକାଶ କରିଛନ୍ତି। ସେ କହିଛନ୍ତି, ଋଣ ଏବଂ ଜମା ଟଙ୍କା ମଧ୍ୟରେ ପାର୍ଥକ୍ୟ ରହିବା ବଡ଼ କଥା ନୁହେଁ ମାତ୍ର ସିଆର୍ଆର୍, ଏସ୍ଏଲ୍ଆର୍, ଏଲ୍ସିଆର୍ ବଜାୟ ରଖିବା ପରିବର୍ତ୍ତେ ଏ କ୍ଷେତ୍ରରେ ଦେଖାଯାଉଥିବା ମାତ୍ରାଧିକ ତାରତମ୍ୟ ଅର୍ଥନୀତି ପାଇଁ ଶୁଭଙ୍କର ନୁହେଁ। ମୁମ୍ବାଇରେ ଏକ ସମ୍ମିଳନୀକୁ ସମ୍ବୋଧିତ କରି ଦାସ କହିଛନ୍ତି, ପ୍ରତ୍ୟେକ ଋଣ ଜମାକାରୀଙ୍କ ନାମରେ କିମ୍ବା ତାଙ୍କ ଆକାଉଣ୍ଟ ବାଲାନ୍ସରେ ଏକ ନୂତନ ଜମା ସୃଷ୍ଟି କରିଥାଏ। ଅନ୍ୟ ଅର୍ଥରେ, ବ୍ୟାଙ୍କିଙ୍ଗ୍ ସିଷ୍ଟମରେ ଟଙ୍କା ସୃଷ୍ଟିକରେ। ମାତ୍ର ମୌଳିକ କଥା ହେଉଛି ଋଣ ଏବଂ ଜମା ଅଭିବୃଦ୍ଧି ମଧ୍ୟରେ ଠିକ୍ ସନ୍ତୁଳନ ରହିବା ଅତ୍ୟନ୍ତ ଗୁରୁତ୍ୱପୂର୍ଣ୍ଣ। ଜମା ସଂଗ୍ରହ ଗତ କିଛିଦିନ ଧରି ଋଣ ହାରରେ ଅଭିବୃଦ୍ଧିଠାରୁ ପଛରେ ପଡ଼ିଛି। ଶକ୍ତିକାନ୍ତ କହିଛନ୍ତି, ପରିବାର ଏବଂ ଗ୍ରାହକ ସର୍ବଦା ନିଜ ସଞ୍ଚୟକୁ ବ୍ୟାଙ୍କରେ ଜମା କରନ୍ତି କିମ୍ବା ସଞ୍ଚୟରେ ବିନିଯୋଗ କରନ୍ତ। ମାତ୍ର ବର୍ତ୍ତମାନ ସେମାନେ ପୁଞ୍ଜିବଜାର କିମ୍ବା ଅନ୍ୟାନ୍ୟ ଆର୍ଥିକ ଉପକରଣରେ ବିନିଯୋଗ କରିବାକୁ ଆଗ୍ରହ ପ୍ରକାଶ କରୁଛନ୍ତି। ଏହା ସତ୍ତ୍ୱେ ବ୍ୟାଙ୍କଗୁଡିକର ଜମା ପରିବାରର ଆର୍ଥିକ ସମ୍ପତ୍ତିରେ ଏକ ପ୍ରମୁଖ ଅଂଶ ହୋଇଥିଲେ ମଧ୍ୟ ଏହାର ଅଂଶ କ୍ରମାଗତ ଭାବରେ ହ୍ରାସ ପାଉଛି । ଲୋକମାନେ ବର୍ତ୍ତମାନ ମ୍ୟୁଚୁଆଲ ଫଣ୍ଡ, ବୀମା ପାଣ୍ଠି କିମ୍ବା ପେନ୍ସନ ପାଣ୍ଠିରେ ସେମାନଙ୍କ ଅର୍ଥ ସଞ୍ଚୟ କରୁଛନ୍ତି। ବ୍ୟାଙ୍କ ବଦଳରେ ନିଜ ସଞ୍ଚୟକୁ ଅନ୍ୟ ସ୍ଥାନରେ ବିନିଯୋଗ କରୁଛନ୍ତି । ଜମା ଟଙ୍କା ହ୍ରାସକୁ ନେଇ ଆର୍ବିଆଇ ଗଭର୍ନର ପ୍ରଥମଥର ପାଇଁ ନୁହେଁ ବରଂ ପୂର୍ବରୁ ଏକାଧିକ ଥର ଚିନ୍ତା ପ୍ରକଟ କରିଛନ୍ତି।
