କୋଲକାତା,୨୭।୧୨ : ସ୍ବାମୀଙ୍କ ମୃତ୍ୟୁ ପରେ ଜଣେ ମହିଳାଙ୍କୁ ସ୍ତ୍ରୀଧନ କିମ୍ବା ଆର୍ଥିକ ସମ୍ବଳରୁ ବଞ୍ଚିତ କରିବା ଏକ ଘରୋଇ ହିଂସା ବୋଲି ପଶ୍ଚିମବଙ୍ଗର କୋଲକାତା ହାଇକୋର୍ଟ ରାୟ ଦେଇଛନ୍ତି। ଜଣେ ମହିଳାଙ୍କ ଅଭିଯୋଗ ଶୁଣାଣି ବେଳେ କୋର୍ଟ ଏହି ନିଷ୍ପତ୍ତି ଦେଇଛନ୍ତି। ସ୍ବାମୀଙ୍କ ମୃତ୍ୟୁ ପରେ ତାଙ୍କୁ ଶାଶୁଘର ଲୋକେ ଘରୁ ବାହାର କରିଦେଇଥିବା ମହିଳା ଅଭିଯୋଗ କରିଛନ୍ତି। ଏକ ମାମଲାର ଶୁଣାଣି ସମୟରେ ହାଇକୋର୍ଟର ଏକକ ବେଞ୍ଚର ଜଷ୍ଟିସ ସୁଭେନ୍ଦୁ ସାମନ୍ତ ଏହି ରାୟ ଦେଇଛନ୍ତି।
ଜଷ୍ଟିସ ସୁଭେନ୍ଦୁ ସାମନ୍ତ କହିଛନ୍ତି ଯେ ଅଭିଯୋଗକାରୀ ମହିଳାଙ୍କୁ କୌଣସି ଆର୍ଥିକ ସମ୍ବଳରୁ ବଞ୍ଚିତ କରିବା ଘରୋଇ ହିଂସା ପରି ହେବ। ଏହି ମାମଲାରେ ମହିଳା ଜଣକ ଦୀର୍ଘ ଦିନ ଧରି ତାଙ୍କ ଯୌତୁକ ସାମଗ୍ରୀରୁ ବଞ୍ଚିତ ହୋଇଥିଲେ। ଯାହା ଅନ୍ୟ ପକ୍ଷଙ୍କ ଅଧିକାରରେ ଥିଲା। ଏହା ସହିତ ଜଷ୍ଟିସ ସୁଭେନ୍ଦୁ ସାମନ୍ତ ମଧ୍ୟ ଏହି ପ୍ରସଙ୍ଗରେ ହାୱଡାର ଏକ ନିମ୍ନ ଅଦାଲତର ନିଷ୍ପତ୍ତିକୁ ଖାରଜ କରିଛନ୍ତି। ନିମ୍ନ ଅଦାଲତ ମାଜିଷ୍ଟ୍ରେଟ କୋର୍ଟଙ୍କ ନିଷ୍ପତ୍ତିକୁ ଖାରଜ କରି କହିଥିଲେ ଯେ ମହିଳାଙ୍କୁ ତାଙ୍କ ଶ୍ୱଶୁର ଏବଂ ଶାଶୁଙ୍କ ଆର୍ଥିକ ସହାୟତାର ଆବଶ୍ୟକତା ନାହିଁ।
୨୦୧୦ରେ ମହିଳାଙ୍କ ସ୍ବାମୀଙ୍କର ମୃତ୍ୟୁ ହୋଇଥିଲା। ସ୍ବାମୀଙ୍କ ମୃତ୍ୟୁର ଦୁଇ ଦିନ ପରେ ତାଙ୍କୁ ଘରୁ ବାହାର କରାଯାଇଥିଲା। ତାଙ୍କୁ କୌଣସି ଆର୍ଥିକ ସହାୟତା ଦିଆଯାଇ ନ ଥିଲା। ମହିଳା ଜଣକ ତାଙ୍କ ସ୍ବମୀଙ୍କ ସମ୍ପତ୍ତିରେ କୌଣସି ଅଂଶ ପାଇ ନଥିଲେ କିମ୍ବା ଯୌତୁକ ସମ୍ପତ୍ତି ମଧ୍ୟ ଫେରି ପାଇ ନଥିଲେ। ଏହି ପରିପ୍ରେକ୍ଷୀରେ ସେ କୋର୍ଟରେ ଏକ ମାମଲା ଦାୟର କରିଥିଲେ। ନିମ୍ନ ଅଦାଲତ ପରେ ଏହି ମାମଲା ହାଇକୋର୍ଟରେ ପହଞ୍ଚିଥିଲା।