ନୂଆଦିଲ୍ଲୀ, ୨୨।୯: ରାଜ୍ୟ ସଭାରେ ଶୃଙ୍ଖଳା ଭଙ୍ଗ କରିଥିବାରୁ ୮ ଏମ୍ପିଙ୍କୁ ନିଲମ୍ବିତ କରାଯାଇଛି। ଏମ୍ପିମାନେ ସଂସଦ ଭବନ ପରିସରରେ ଥିବା ମହାତ୍ମାଗାନ୍ଧୀଙ୍କ ମୂର୍ତ୍ତି ସମ୍ମୁଖରେ ସାରା ରାତି ଧାରଣାରେ ବସିଛନ୍ତି। ମଙ୍ଗଳବାର ସକାଳେ ଏମ୍ପି ମନେଇବା ପାଇଁ ରାଜ୍ୟ ସଭା ଉପବାଚସ୍ପତି ହରିବଂଶ ଚା’ ଧରି ପହଞ୍ଚିଥିବାର ଦୃଶ୍ୟ ଦେଖିବାକୁ ମିଳିଛି। ଧାରଣ ଦେଉଥିବା ଏମ୍ପିମାନେ ହରିବଂଶଙ୍କୁ ସ୍ବାଗତ କରିଥିଲେ। ତେବେ ବୈଚାରିକ ମତଭେଦ ଏବଂ ଦଳୀୟ ନୀତିକୁ ଦୃଷ୍ଟିରେ ରଖି ଚା’କୁ ଧାରଣା ଦେଉଥିବା ଏମ୍ପିମାନେ ଫେରାଇ ଦେଇଥିଲେ। ହରିବଂଶ କହିଥିଲେ ଯେ ଦଳଠାରୁ ବ୍ୟକ୍ତିଗତ ସମ୍ପର୍କ ଭିନ୍ନ। ମୁଁ ଆପଣମାନଙ୍କୁ ଘରକୁ ନିମନ୍ତ୍ରଣ କରିପାରିବି। ସେହିପରି ଆପଣମାନେ ମଧ୍ୟ ସେପରି କରିପାରିବେ। ତେଣୁ ମୁଁ ଆପଣମାନଙ୍କ ପାଖକୁ ସାକ୍ଷାତ କରିବାକୁ ଆସିଛି। ଏହାର ଉତ୍ତରରେ ଏଏପି ଏମ୍ପି ସଞ୍ଜୟ ସିଂ କହିଥିଲେ ଯେ, ଆମେ ଉପ ବାଚସ୍ପତିଙ୍କୁ କୃଷକ ବିରୋଧୀ କଳା ଆଇନ ଫେରାଇ ନେବାକୁ କହିଥିଲୁ। ହରିବଂଶ ଚା’ ନେଇ ଯିବାର ଫଟୋ ଏବଂ ୫୫ ସେକେଣ୍ଡର ଏକ ଭିଡ଼ିଓ ଏବେ ସୋସିଆଲ୍ ମିଡ଼ିଆରେ ଭାଇରାଲ ହେବାରେ ଲାଗିଛି। ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ହରିବଂଶଙ୍କ ଏଭଳି କାର୍ଯ୍ୟକୁ ବେଶ୍ ପ୍ରଶଂସା କରିଛନ୍ତି।
