ମୁମ୍ବାଇ,୧୯।୮: ବିଧାନସଭା ନିର୍ବାଚନ ପୂର୍ବରୁ ମରାଠା ସଂରକ୍ଷଣ ପ୍ରସଙ୍ଗ ପୁଣି ଥରେ ତୀବ୍ର ହୋଇଛି। ସଂରକ୍ଷଣ ପାଇଁ ଆନ୍ଦୋଳନ କରୁଥିବା ମନୋଜ ଜାରଙ୍ଗେ ପାଟିଲ ମରାଠା ସମ୍ପ୍ରଦାୟକୁ ଓବିସିରୁ ସଂରକ୍ଷଣ ପ୍ରଦାନ କରାଯିବାକୁ ଦାବି କରିଛନ୍ତି। ତେବେ ଉପମୁଖ୍ୟମନ୍ତ୍ରୀ ତଥା ଭାଜପା ନେତା ଦେବେନ୍ଦ୍ର ଫଡନ୍ଭିସଙ୍କୁ ସରକାରଙ୍କ ପ୍ରତିଶ୍ରୁତି ପାଳନ କରୁନାହାନ୍ତି ବୋଲି ମନୋଜ ଜାରଙ୍ଗେ ଲଗାତାର ଅଭିଯୋଗ କରୁଛନ୍ତି। ଏହା ଉପରେ ଉପମୁଖ୍ୟମନ୍ତ୍ରୀ ଦେବେନ୍ଦ୍ର ଫଡନ୍ଭିସ ଏକ ବିବୃତ୍ତି ଦେଇ କହିଛନ୍ତି, ମନୋଜ ଜାରଙ୍ଗେ ବର୍ତ୍ତମାନ ଶିନ୍ଦେ ସାହେବଙ୍କୁ ପଚାରିବା ଉଚିତ୍ ଏବଂ ଯଦି ଶିନ୍ଦେ ସାହେବଙ୍କୁ ମରାଠା ସଂରକ୍ଷଣ ପାଇଁ କୌଣସି ନିଷ୍ପତ୍ତି ନେବାରୁୁ ଯଦି ମୁଁ ଅଟକାଇଥିବି, ତେବେ ମୁଁ ତୁରନ୍ତ ଇସ୍ତଫା ଦେଇଦେବି ଏବଂ ରାଜନୀତିରୁ ଅବସର ନେଇଯିବି। ଯାହାକୁ ନେଇ ଏବେ ଏକ ଆଲୋଡ଼ନ ସୃଷ୍ଟି କରିଛି। ଏହା ପରେ ମୁଖ୍ୟମନ୍ତ୍ରୀ ଏକନାଥ ଶିନ୍ଦେ ନିଜେ ପ୍ରତିକ୍ରିୟା ଦେଇଛନ୍ତି।
ଉପମୁଖ୍ୟମନ୍ତ୍ରୀ ଦେବେନ୍ଦ୍ର ଫଡନ୍ଭିସଙ୍କ ରାଜନୀତିରୁ ଅବସର ନେବା ବୟାନ ଉପରେ ମୁଖ୍ୟମନ୍ତ୍ରୀ ଏକନାଥ ଶିନ୍ଦେ ପ୍ରତିକ୍ରିୟା ପ୍ରକାଶ କରିଛନ୍ତି। ସେ କହିଛନ୍ତି, ମରାଠା ସଂରକ୍ଷଣ ଉପରେ ଫଡନ୍ଭିସଙ୍କ ବିବୃତ୍ତି ସତ୍ୟ ଅଟେ। ଆମେ ତିନିଜଣ ଏକାଠି ବସି ସଂରକ୍ଷଣ ବିଷୟରେ ଆଲୋଚନା କଲୁ। ପ୍ରତ୍ୟେକ ବୈଠକରେ ଦେବେନ୍ଦ୍ର ଫଡନ୍ଭିସ ଉପସ୍ଥିତ ଥିଲେ। ମରାଠା ସମ୍ପ୍ରଦାୟକୁ ସଂରକ୍ଷଣ ଦେବାରେ ସେ ଏକ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରିଥିଲେ। ବିରୋଧୀ ଦଳ ଏହାକୁ ବିରୋଧ କରିଥିଲେ। ସେମାନେ ସହଯୋଗ କରିବା ଉଚିତ୍। ଦେବେନ୍ଦ୍ର ଫଡନ୍ଭିସ ମରାଠା ସମ୍ପ୍ରଦାୟ ପାଇଁ ସଂରକ୍ଷଣକୁ କେବେ ବିରୋଧ କରିନଥିଲେ। ଏହି ଅଭିଯୋଗରେ କୌଣସି ସତ୍ୟତା ନାହିଁ ବୋଲି ମୁଖ୍ୟମନ୍ତ୍ରୀ ଏକନାଥ ଶିନ୍ଦେ କହିଛନ୍ତି।