ଚଣ୍ଡିଗଡ଼,୧୦।୧୧: ଡେରା ସଚାସୌଦାର ଜଣେ ଅନୁଗାମୀଙ୍କୁ ଗୁରୁବାର ଗୁଳିକରି ହତ୍ୟା କରାଯାଇଛି। ଏହି ହତ୍ୟାକାଣ୍ଡ ପଞ୍ଜାବର ଫରିଦକୋଟ୍ ଜିଲାରେ ଘଟିଛି। ୫ ଜଣ ଦୁର୍ବୃତ୍ତ ୨ଟି ବାଇକ୍ରେ ଆସି ଅନୁଗାମୀ ପର୍ଦୀପ ସିଂଙ୍କ ଉପରକୁ ଅତର୍କିତ ଭାବେ ଗୁଳି ଚଳାଇଥିଲେ। ଫଳରେ ତାଙ୍କର ମୃତ୍ୟୁ ଘଟିଛି। ଏପରିକି ଆକ୍ରମଣରେ ତାଙ୍କ ସୁରକ୍ଷା କର୍ମୀ ଓ ଅନ୍ୟ ଜଣେ ବ୍ୟକ୍ତି ଆହତ ହୋଇଥିବା ଜଣାପଡିଛି। ଆକ୍ରମଣର ଦୃଶ୍ୟ ସିସିଟିଭି କ୍ୟାମେରାରେ କଏଦ ହୋଇଛି।
ମିଳିଥିବା ସୂଚନା ମୁତାବକ, ୨୦୧୫ ଜୁନ୍ରେ ବୁର୍ଜ ଜବାହର ସିଂ ଓ୍ବାଲା ଗ୍ରାମରେ ଗୁରୁ ଗ୍ରନ୍ଥ ସାହିବ୍ର ପୃଷ୍ଠା ଚିରି ଫିଙ୍ଗିବା ଘଟଣାରେ ପର୍ଦୀପ ଗିରଫ ହୋଇ ଜେଲ ଯାଇଥିଲେ। ନିକଟରେ ସେ ଜାମିନରେ ଆସିଥିଲେ। ଅନ୍ୟପକ୍ଷେ ପଞ୍ଜାବରେ ଏକ ସପ୍ତାହ ମଧ୍ୟରେ ଗୁଳିକାଣ୍ଡରେ ୨ଜଣଙ୍କ ମୃତ୍ୟୁ ଘଟିଛି।
