ଡେରାବିଶ, ୨୪ା୭(ବେବର୍ତ୍ତା ଅଜୟ ଦାସ): ଡେରାବିଶ ବ୍ଲକ ଓ କେନ୍ଦ୍ରାପଡ଼ା ଜିଲାକୁ ପୁଣିଥରେ ସଂସ୍କୃତି ଓ ଯୋଗ ପ୍ରତିଯୋଗିତାରେ ବ୍ଲକ ଅଧୀନସ୍ଥ ରଘୁଦେଇପୁର ପଞ୍ଚାୟତ ବେଲାରପୁର ଗଁାର ଦଶମ ଶ୍ରେଣୀର ଛାତ୍ରୀ ସ୍ମୃତିରେଖା ପାଣି(୧୫) ଗୌରବ ଆଣିଛନ୍ତି। ସ୍ଥାନୀୟ ଭଗବତୀ ସରକାରୀ ଉଚ୍ଚ ନୋଡାଲ ବିଦ୍ୟାଳୟର ଛାତ୍ରୀ ସ୍ମୃତିରେଖା କେନ୍ଦ୍ରାପଡ଼ା ଯୋଗ ବେଦାନ୍ତ କେନ୍ଦ୍ରରେ ଯୋଗାଭ୍ୟାସ କରୁଥିବାବେଳେ କୋଲକାତାରେ ରବିବାର ଅନୁଷ୍ଠିତ ହୋଇଥିବା ନବମ ଅନ୍ତର୍ଜାତୀୟ ଯୋଗ ମହୋତ୍ସବରେ ଭାଗନେଇ କୃତିତ୍ୱ ଅର୍ଜନ କରିଛନ୍ତି। ସାଇ କାପ୍ରା ଫ୍ରେଣ୍ଡସ୍ ଆସୋସିଏଶନ୍ ପକ୍ଷରୁ ଆୟୋଜିତ ମହୋତ୍ସବରେ ସ୍ମୃତିରେଖାଙ୍କୁ ରବିବାର ସମ୍ମାନିତ କରାଯାଇଛି। ତେବେ ମେ ୨୩ରେ ଗୁଜରାଟର ଅହମ୍ମଦାବାଦଠାରେ ଆୟୋଜିତ ନବମ ସର୍ବଭାରତୀୟ ସାଂସ୍କୃତିକ ନୃତ୍ୟ ପ୍ରତିଯୋଗିତା ମହୋତ୍ସବରେ ଭାଗନେଇ ସ୍ମୃତିରେଖା ସମ୍ବଲପୁରୀ ନୃତ୍ୟ ପ୍ରଦର୍ଶନ କରି ପ୍ରଥମ ସ୍ଥାନ ଅଧିକାର କରି କୃତିତ୍ୱ ଅର୍ଜନ କରିଥିଲେ। ସେହିପରି କୋଲକାତାରେ ଜୁନ ୨୭ରେ ଅନୁଷ୍ଠିତ ଜାତୀୟ ସାଂସ୍କୃତିକ ନୃତ୍ୟ ପ୍ରତିଯୋଗିତାରେ ଭାଗନେଇ ସ୍ମୃତିରେଖା କୃତିତ୍ୱ ଅର୍ଜନ କରି ଡେରାବିଶ ବ୍ଲକ ଓ କେନ୍ଦ୍ରାପଡା ଜିଲାକୁ ଗର୍ବିତ କରିଛନ୍ତି। ରୟାଲ ଡ୍ୟାନ୍ସ ଗ୍ରୁପର ଛାତ୍ରୀ ଭାବେ ଉଭୟ ଅହମ୍ମଦାବାଦ ଓ କୋଲକାତାରେ ସ୍ମୃତିରେଖା ଭାଗ ନେଇଥିଲେ। ତେବେ ଏହି ଖବର ଜଣାପଡ଼ିବା ପରେ ସ୍ମୃତିରେଖାଙ୍କୁ ବିଭିନ୍ନ ମହଲରୁ ଶୁଭେଚ୍ଛାର ଶୁଅ ଛୁଟିବାରେ ଲାଗିଛି। ବାପା କୈଳାସ ଚନ୍ଦ୍ର ପାଣି, ମାଆ ପ୍ରଜ୍ଞା ପ୍ରାରମ୍ଭିକା, ଅଜା ନିରଞ୍ଜନ ଦାଶ ଓ ଆଈ ଗୀତାଞ୍ଜଳି ନିଜର ପ୍ରତିକ୍ରିୟାରେ ସ୍ମୃତିରେଖା ଜଣେ ଭଲ ଛାତ୍ରୀ ବୋଲି କହିଛନ୍ତି। ନୃତ୍ୟ ଓ ଯୋଗାଭ୍ୟାସ ପ୍ରତି ଥିବା ରୁଚି ପାଇଁ ପରିବାର ପକ୍ଷରୁ ଅଧିକ ପ୍ରୋତ୍ସାହନ ଦିଆଯାଉଛି।