ନୂଆଦିଲ୍ଲୀ,୯।୧୧(ପି.ଟି.): ନରେନ୍ଦ୍ର ମୋଦି ସରକାରଙ୍କ ବିମୁଦ୍ରୀକରଣ ନିଷ୍ପତ୍ତିକୁ ବିରୋଧୀ ଦଳଗୁଡ଼ିକ ଆର୍ଥିକ ଗଣହତ୍ୟା, ଆପରାଧିକ କାର୍ଯ୍ୟ ଏବଂ ସଂଗଠିତ ଲୁଟ୍ ବୋଲି କହିଛନ୍ତି। ୨୦୧୬ ନଭେମ୍ବର ୮ରେ ପ୍ରଧାନମନ୍ତ୍ରୀ ମୋଦି ପ୍ରଚଳିତ ୫୦୦ ଏବଂ ୧,୦୦୦ ଟଙ୍କିଆ ନୋଟଗୁଡ଼ିକୁ ଅଚଳ ଘୋଷଣା କରିବାରୁ ଦେଶବାସୀ ନାହିଁ ନ ଥିବା ଅସୁବିଧାର ସମ୍ମୁଖୀନ ହୋଇଥିଲେ। କଳାଧନ ଏବଂ ଆତଙ୍କବାଦୀଙ୍କୁ ପାଣ୍ଠି ଯୋଗାଣ ରୋକିବା ସହ ଡିଜିଟାଲ ପେମେଣ୍ଟକୁ ପ୍ରୋତ୍ସାହିତ କରିବା ବିମୁଦ୍ରୀକରଣର ମୁଖ୍ୟ ଲକ୍ଷ୍ୟ ବୋଲି ସେତେବେଳେ ସରକାର କହିଥିଲେ। ତେବେ ଏଥିରୁ କୌଣସି ଲକ୍ଷ୍ୟ ପୂରଣ ହୋଇ ନ ଥିବାବେଳେ ଅର୍ଥନୀତି ଗୁରୁତର ପ୍ରଭାବିତ ହୋଇଥିବାରୁ ବିରୋଧୀ ଦଳଗୁଡ଼ିକ ଭାଜପା ନେତୃତ୍ୱାଧୀନ କେନ୍ଦ୍ର ସରକାରଙ୍କୁ ସମାଲୋଚନା କରିଛନ୍ତି। ବିମୁଦ୍ରୀକରଣ ସ୍ବାଧୀନ ଭାରତରେ ସର୍ବବୃହତ୍ ସଂଗଠିତ ଲୁଟ୍ ଥିଲା ବୋଲି କଂଗ୍ରେସ ଅଭିଯୋଗ କରିବା ସହ ମୋଦି ସରକାରଙ୍କଠାରୁ ଏହା ଉପରେ ଶ୍ୱେତପତ୍ର ଦାବି କରିଛି। ‘୬ ବର୍ଷର ସଂଗଠିତ ଓ ବୈଧିକ ଲୁଟ୍’ ବୋଲି କଂଗ୍ରେସ ଅଧ୍ୟକ୍ଷ ମଲ୍ଲିକାର୍ଜୁନ ଖାର୍ଗେ ଟୁଇଟ୍ କରିଛନ୍ତି। ବିମୁଦ୍ରୀକରଣ ବିପର୍ଯ୍ୟୟରେ ପ୍ରାଣ ହରାଇଥିବା ୧୫୦ ଜଣଙ୍କୁ ସେ ଶ୍ରଦ୍ଧାଞ୍ଜଳି ଜଣାଇଛନ୍ତି। ପ୍ରଧାନମନ୍ତ୍ରୀ ତାଙ୍କର ଦୁଇ ତିନି ଜଣ କୋଟିପତି ବନ୍ଧୁଙ୍କୁ ଭାରତୀୟ ଅର୍ଥନୀତିରେ ମନମାନି କରିବାକୁ ଜାଣିଶୁଣି ସୁଯୋଗ ଦେଇଥିଲେ ବୋଲି କଂଗ୍ରେସ ନେତା ରାହୁଲ ଗାନ୍ଧୀ କହିଛନ୍ତି। ବିମୁଦ୍ରୀକରଣ ଏକ ପ୍ରତାରଣା ଥିଲା ବୋଲି ତୃଣମୂଳ କଂଗ୍ରେସ (ଟିଏମ୍ସି) ମୁଖପାତ୍ର ଡେରେକ୍ ଓ’ବ୍ରିଏନ୍ କହିଛନ୍ତି। ନିଷ୍ପତ୍ତି ପ୍ରତ୍ୟାହାର କରିନେବାକୁ ସେତେବେଳେ ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ମମତା ବାନାର୍ଜୀ ଆହ୍ବାନ ଦେଇଥିଲେ। ନୋଟବନ୍ଦୀ ସରକାରଙ୍କର ଏକ ଆପରାଧିକ କାର୍ଯ୍ୟ ଥିଲା ବୋଲି ସିପିଆଇ(ଏମ୍) ସାଧାରଣ ସମ୍ପାଦକ ସୀତାରାମ ୟେଚୁରୀ ଅଭିଯୋଗ କରିଛନ୍ତି। ମୋଦି ସରକାର ଭାରତୀୟ ଅର୍ଥନୀତି ହତ୍ୟାର ୬ ବର୍ଷ ପୂର୍ତ୍ତି ପାଳନ କରୁଛନ୍ତି, ଯେତେବେଳେ ଦେଶରେ ନଗଦ ଅର୍ଥ କାରବାର ୩୦.୮୮ ଲକ୍ଷ କୋଟି ଟଙ୍କାରେ ପହଞ୍ଚତ୍ଛି। ମୁଦ୍ରାସ୍ଫୀତି ବେଳେ ଜନସାଧାରଣ ସହିଥିବା ଯନ୍ତ୍ରଣା ସବୁଠୁ ବଡ଼ ଜୁମ୍ଲା ଥିଲା ବୋଲି ୟେୁଚରୀ ଟୁଇଟ୍ କରିଛନ୍ତି। ପ୍ରଧାନମନ୍ତ୍ରୀ ଦେଇଥିବା ପ୍ରତିଶ୍ରୁତିର ଅନୁଧ୍ୟାନ କରି ବିମୁଦ୍ରୀକରଣ ଉପରେ ଶ୍ୱେତପତ୍ର ପ୍ରକାଶ କରନ୍ତୁ ବୋଲି ସିପିଆଇ ନେତା ବିନୟ ବିଶ୍ୱମ୍ କହିଛନ୍ତି।