ଖପ୍ରାଖୋଲ, ୧୩ା୩(ଡି.ଏନ.ଏ.):ସରକାର ଶିକ୍ଷାର ବିକାଶ ପାଇଁ ବିଦ୍ୟାଳୟଗୁଡ଼ିକର ରୂପାନ୍ତରଣ କରୁଛନ୍ତି। ଛାତ୍ରୀଛାତ୍ରଙ୍କୁ ସ୍କୁଲପ୍ରତି ଆକୃଷ୍ଟ କରିବା ପାଇଁ ସୋନ୍ଦର୍ଯ୍ୟକରଣ କରାଯାଇ ଶିକ୍ଷଣୀୟ ପରିବେଶ ସୃଷ୍ଟି କରାଯାଉଛି। ହେଲେ ବଲାଙ୍ଗୀର ଜିଲା ଖପ୍ରାଖୋଲ ବ୍ଲକ ଚଙ୍ଗରିଆ ପଞ୍ଚାୟତ ଅନ୍ତର୍ଗତ ଲୁହାଖାନ ପ୍ରାଥମିକ ବିଦ୍ୟାଳୟ ଦେଖିଲେ ଜାଣି ହେଉଛି ଶିକ୍ଷା ବ୍ୟବସ୍ଥାର ବିକଳ ଚିତ୍ର। ବିଦ୍ୟାଳୟଟି ବ୍ଲକ ସଦର ମହକୁମାଠାରୁ ପ୍ରାୟ ୫୦ କିମି ଦୂରରେ ଅବସ୍ଥିତ। ବିଦ୍ୟାଳୟରେ ପ୍ରଥମରୁ ପଞ୍ଚମ ଶ୍ରେଣୀ ଯାଏ ଥିବା ବେଳେ ୩୯ ଜଣ ଛାତ୍ରୀ ଛାତ୍ର ଅଧ୍ୟୟନ କରୁଛନ୍ତି। ଦୁଇ ଜଣ ଶିକ୍ଷକ ଅଛନ୍ତି। ହେଲେ ବିଦ୍ୟାଳୟରେ ପଢିବା ପାଇଁ ଭଲ ଶ୍ରେଣୀଗୃହ ନାହିଁ। ଗ୍ରାମବାସୀଙ୍କ ସହାୟତାରେ ନଡ଼ା ଛପର ଛାମୁଡିଆ ନିର୍ମାଣ କରାଯାଇଛି। ଆଉ ଏହି ଛପର ତଳେ ପଢୁଛନ୍ତି ଛାତ୍ରୀଛାତ୍ର। ଏନେଇ ଗ୍ରାମବାସୀ ଅନେକଥର ପ୍ରଶାସନକୁ ଜଣାଇଥିଲେ ମଧ୍ୟ କିଛି ଲାଭ ହୋଇନାହିଁ। ବିଦ୍ୟାଳୟ ୧୯୭୩ରେ ଆରମ୍ଭ ହୋଇଥିବା ବେଳେ ଦୁଇଟି କୋଠରି ମଧ୍ୟ ରହିଛି। ହେଲେ ତାହା ବିପଦସଙ୍କୁଳ ହୋଇଥିବା ବେଳେ ସିମେଣ୍ଟ ଅତଡ଼ା ଖସୁଛି। ଫଳରେ ଛାତ୍ରୀଛାତ୍ରଙ୍କ ସୁରକ୍ଷା ଦୃଷ୍ଟିରୁ କିଛି ମାସ ଗଛତଳେ ଶିକ୍ଷାଦାନ ହେଉଥିବା ବେଳେ ପରେ ଗ୍ରାମବାସୀ ଏକ ନଡ଼ା ଛପର ଛାମୁଡିଆ କରିଦେଇଛନ୍ତି। ଏ ନେଇ ଖପ୍ରାଖୋଲ ବ୍ଲକ ସହ ଶିକ୍ଷା ଅଧିକାରୀ ମିନିକେତନ ବରିହାଙ୍କୁ ପଚାରିବାରୁ ବିଦ୍ୟାଳୟ ସମସ୍ୟା ସମ୍ପର୍କରେ ଅବଗତ ଅଛୁ। ଶିକ୍ଷା ବିଭାଗରୁ ଏବେ ନିର୍ମାଣ କାମ ହେଉ ନଥିବା ବେଳେ କୋଠା ପାଇଁ ବ୍ଲକ ପ୍ରଶାସନକୁ ଅବଗତ କରାଯାଇଛି। ଖରାଦିନ ମଧ୍ୟରେ ଘର କରିବାକୁ ଚେଷ୍ଟା କରାଯିବ ବୋଲି କହିଛନ୍ତି।