ବଡ଼ଗାଁ, ୧୦।୪(ଡି.ଏନ୍.ଏ.): ସୁନ୍ଦରଗଡ଼ ଜିଲାକୁ ଗସ୍ତରେ ଆସିଥିବା ଜାତୀୟ ଜନଜାତି ଆୟୋଗ ସଦସ୍ୟ ଅନନ୍ତ ନାୟକ ରାଉରକେଲାରେ ଶନିବାର ଆୟୋଜିତ ଆଦିବାସୀ ମହୋତ୍ସବ କାର୍ଯ୍ୟକ୍ରମରେ ଯୋଗ ଦେଇଥିଲାବେଳେ ରବିବାର ବଡ଼ଗାଁ ବ୍ଲକର ଭୋଇପାଲି ଗ୍ରାମକୁ ଆସି ଲୋକଙ୍କ ସମସ୍ୟା ଓ ଅଭିଯୋଗ ଶୁଣିଥିଲେ। ଜନଜାତି ଆୟୋଗ ସଦସ୍ୟ ନାୟକ ମାନସିକ କରିଥିବାରୁ ପ୍ରଥମେ ଗୋଣ୍ଡ ସମାଜର ଆରାଧ୍ୟା ଦେବତା ଶ୍ରୀ ଜଂଘା ବଡଦେଓଙ୍କ ମନ୍ଦିରକୁ ଯାଇ ପୂଜାର୍ଚ୍ଚନା କରିଥିଲେ। ଏହା ପରେ ସେ ଲୋକଙ୍କ ଆପତ୍ତି ଅଭିଯୋଗ ଶୁଣିଥିଲେ। କୁରେଇବଗା ଗ୍ରାମରେ ୫୦ବର୍ଷ ହେଲା ଚାଷ କରିଆସୁଥିବା ଜଣେ ଆଦିବାସୀଙ୍କ ଦଖଲ ଜମିକୁ ରାଜସ୍ବ ବିଭାଗ ନେଇଯିବା, ପାଣ୍ଡେରପାଲି ଗାଁରେ ୪୦ ବର୍ଷ ଚାଷ କରିଆସୁଥିବା ବ୍ୟକ୍ତିଙ୍କୁ ଜଙ୍ଗଲ ଜମି ଅଧିକାର ଦିଆଯାଇ ନ ଥିବା, ବଡ଼ଗାଁ ସରକାରୀ ଲାଇସେନ୍ସପ୍ରାପ୍ତ ଦେଶୀ ମଦ ଭାଟି ସ୍ଥାନାନ୍ତର ଆଦି ଆଉ କେତେକ ଅଭିଯୋଗ ଗ୍ରାମବାସୀ ଜନଜାତି ଆୟୋଗ ସଦସ୍ୟ ନାୟକଙ୍କୁ ଜଣାଇଥିଲେ। ଲୋକଙ୍କ ଆପତ୍ତି ଅଭିଯୋଗ ଶୁଣିବା ପରେ ସେଠାରେ ଉପସ୍ଥିତ ଅଧିକାରୀମାନଙ୍କୁ ସମସ୍ୟାର ସମାଧାନ ପାଇଁ ନିର୍ଦ୍ଦେଶ ଦେଇଥିଲେ। ଗ୍ରାମବାସୀ ଦେଶୀ ମଦଭାଟି ଜନବସତି ମଧ୍ୟରେ ଥିବା ଓ ବାଳିକା ଉଚ୍ଚ ବିଦ୍ୟାଳୟ ନିକଟ ରାସ୍ତା ପାଶର୍ବରେ ଥିବାରୁ ବାରମ୍ବାର ଅଭିଯୋଗ ସତ୍ତ୍ୱେ ସ୍ଥାନାନ୍ତର କରାଯାଉ ନ ଥିବା ଜଣାଇ ତୁରନ୍ତ ଏହା ଉପରେ ପଦକ୍ଷେପ ନେବାକୁ ଦାବି କରିଥିଲେ। ଏ ନେଇ ଜନଜାତି ଆୟୋଗ ସଦସ୍ୟ ଅନନ୍ତ ନାୟକ ଜିଲା ଅବକାରୀ ଅଧୀକ୍ଷକ ନରୋତ୍ତମ ମିଶ୍ରଙ୍କୁ କେତେମାସ ମଧ୍ୟରେ ଭାଟି ସ୍ଥାନାନ୍ତର କରିବେ ପ୍ରଶ୍ନ କରିଥିଲେ। ଅବକାରୀ ଅଧୀକ୍ଷକ ମିଶ୍ର ୬ ମାସ ମଧ୍ୟରେ ଭାଟି ସ୍ଥାନାନ୍ତର କରିଦିଆଯିବ ବୋଲି ସେଠାରେ ଜଣାଇଥିଲେ। ଏହି କାର୍ଯ୍ୟକ୍ରମରେ ଜିଲା ମଙ୍ଗଳ ଅଧିକାରୀ ପବିତ୍ର ମୋହନ ପ୍ରଧାନ, ଅତିରିକ୍ତ ଜିଲା ଶିକ୍ଷା ଅଧିକାରୀ ସାରଙ୍ଗଧର ବରିହା, ପିଡବ୍ଲ୍ୟୁଡିର ଏଇଇ ଦିଲ୍ଲୀପ କୁମାର ପତି, ସହକାରୀ ଯନ୍ତ୍ରୀ ସୁରଥ ନାଏକ, ଏସଇ ମୂରଲୀଧର ମିଶ୍ର, ବଡ଼ଗାଁ ବ୍ଲକ ମଙ୍ଗଳ ଅଧିକାରୀ ଦିଲ୍ଲୀପ କୁମାର ମାଝିଙ୍କ ସହିତ ବିଭିନ୍ନ ବିଭାଗର ଅଧିକାରୀମାନେ ଉପସ୍ଥିତ ଥିଲେ।
