ପୁଣେ,୨୮।୩ : ଇଂଲଣ୍ଡ ବିପକ୍ଷ ତୃତୀୟ ତଥା ନିର୍ଣ୍ଣାୟକ ଦିନିକିଆ ମ୍ୟାଚ୍ରେ ଫେଲ୍ ମାରିଛନ୍ତି ଟିମ୍ ଇଣ୍ଡିଆର ତାରକା ବ୍ୟାଟ୍ସମ୍ୟାନମାନେ। ଏହା ସତ୍ତ୍ୱେ ଭ୍ରମଣକାରୀ ଦଳ ଆଗରେ ୩୩୦ ରନ୍ର ବିଶାଳ ଟାର୍ଗେଟ ଛିଡ଼ା କରିଛି ବିରାଟ କୋହଲିଙ୍କ ନେତୃତ୍ୱାଧୀନ ଭାରତୀୟ ଦଳ।
ପୂର୍ବ ମ୍ୟାଚ୍ ଭଳି ଇଂଲଣ୍ଡ ଅଧିନାୟକ ଜୋସ ବଟଲରଙ୍କ ଭାଗରେ ପଡ଼ିଥିଲା ଟସ୍। ପୁଣି ଥରେ ଭାରତକୁ ପ୍ରଥମେ ବ୍ୟାଟିଂ ପାଇଁ ଦେଇଥିଲେ ଆମନ୍ତ୍ରଣ। ରୋହିତ ଶର୍ମା ଓ ଶିଖର ଧାଓ୍ବନଙ୍କ ଓପନିଂ ଯୋଡ଼ି ୧୦୩ ରନ୍ ଯୋଡ଼ିଥିଲା। ରୋହିତ ୩୭ ରନ୍ର ବ୍ୟକ୍ତିଗତ ସ୍କୋରରେ ଆଉଟ୍ ହୋଇଥିବାବେଳେ ଧାଓ୍ବନ (୬୭) ପୂରଣ କରିଥିଲେ ଦିନିକିଆ କ୍ୟାରିୟରର ୩୨ତମ ଅର୍ଦ୍ଧଶତକ। ଏହାପରେ ସ୍ପିନରଙ୍କ ଜାଲରେ ଛନ୍ଦି ହୋଇ ଆଉଟ୍ ହୋଇଥିଲେ ଦଳର ୪ ପ୍ରମୁଖ ବ୍ୟାଟ୍ସମ୍ୟାନ। ଜବାବରେ କାଉଣ୍ଟର ଆଟାକ କରିଥିଲେ ରିଷଭ ପନ୍ତ ଓ ହାର୍ଦ୍ଦିକ ପାଣ୍ଡ୍ୟା। ଦୁହେଁ ୫ମ ଉଇକେଟ ପାଇଁ ଯୋଡ଼ିଥିଲେ ୯୯ ରନ୍। ପନ୍ତ (୭୮ ରନ୍, ୫ ଚୌକା ଓ ୪ ଛକା ) ଓ ହାର୍ଦ୍ଦିକ (୬୪ ରନ, ଚୌକା ଓ ୪ ଛକା) ଆଉଟ୍ ହେବା ପରେ ତାସ ଘର ଭଳି ଭୂଷୁଡ଼ି ପଡ଼ିଥିଲା ଟିମ୍ ଇଣ୍ଡିଆର ବ୍ୟାଟିଂ ଲାଇନ ଅପ୍। ଫଳରେ ୪୮.୨ ଓଭରରେ ଭାରତ ୩୨୯ ରନ୍ରେ ଅଲଆଉଟ୍ ହୋଇଯାଇଥିଲା। ଇଂଲଣ୍ଡ ପକ୍ଷରୁ ମାର୍କ ଉଡ୍ ୩ ଓ ଆଦିଲ ରଶିଦ ୨ ଉଇକେଟ ହାତେଇଥିଲେ।