ଖୋର୍ଦ୍ଧା ଅଫିସ,୧୩ା୧୨: ଗରିବ ଲୋକଙ୍କ ଚିକିତ୍ସା ସୁବିଧା ନିମନ୍ତେ ରାଜ୍ୟ ସରକାର ମୁଖ୍ୟମନ୍ତ୍ରୀ ରିଲିଫ ଫଣ୍ଡ (ସିଏମ୍ଆର୍ଏଫ୍) ବ୍ୟବସ୍ଥା କରିଛନ୍ତି। ତେବେ ଏହି ଯୋଜନା ଖୋର୍ଦ୍ଧା ଜିଲାରେ ଫେଲ୍ ମାରିଛି। ମୁଖ୍ୟମନ୍ତ୍ରୀଙ୍କ ଅନୁମୋଦନ ସତ୍ତ୍ୱେ ସ୍ଥାନୀୟ ପ୍ରଶାସନର ଅବହେଳା ଯୋଗୁ ଜଣେ ରୋଗୀ ଟଙ୍କା ପାଇବାରୁ ବଞ୍ଚିତ ହୋଇଛନ୍ତି। ବୋଲଗଡ଼ ତହସିଲ ଅଧୀନ ଗୋପୀନାଥପୁର ଗ୍ରାମର ବଂଶୀଧର ରାଉତଙ୍କ କ୍ଷେତ୍ରରେ ଏହା ଦେଖିବାକୁ ମିଳିଛି।
ସୂଚନା ମୁତାବକ, ବଂଶୀଧର ଏକ କ୍ରନିକ ରୋଗରେ ଆକ୍ରାନ୍ତ ହୋଇ ଚିକିତ୍ସିତ ହେଉଛନ୍ତି। ସିଏମ୍ଆର୍ଏଫ୍ର ସହଯୋଗ ଲାଗି ମୁଖ୍ୟମନ୍ତ୍ରୀଙ୍କୁ ଅନୁରୋଧ କରିଥିଲେ। ମୁଖ୍ୟମନ୍ତ୍ରୀ ରିଲିଫ ଫଣ୍ଡରୁ ବଂଶୀଧରଙ୍କ ଚିକିତ୍ସା ଲାଗି ୧ଲକ୍ଷ ଟଙ୍କା ସହାୟତା ରାଶି ଘୋଷଣା କରାଯାଇଛି। ଏହି ଟଙ୍କା ବଂଶୀଧରଙ୍କୁ ପ୍ରଦାନ ଲାଗି ମୁଖ୍ୟମନ୍ତ୍ରୀଙ୍କ କାର୍ଯ୍ୟାଳୟ ପତ୍ରାଙ୍କ ୨୨୭୯/୧୫।୭।୨୦ରେ ଖୋର୍ଦ୍ଧା ଜିଲା ପ୍ରଶାସନକୁ ଚିଠି ଲେଖିଥିଲେ। ଜିଲା ପ୍ରଶାସନର ଜରୁରିକାଳୀନ ବିଭାଗ(ମୁଖ୍ୟମନ୍ତ୍ରୀ କାର୍ଯ୍ୟାଳୟ ଅନୁମୋଦନ କ୍ରମେ) ବଂଶୀଧରଙ୍କୁ ଏହି ଟଙ୍କା ପଇଠ ଲାଗି ବିଭାଗୀୟ ପତ୍ରାଙ୍କ ସଂଖ୍ୟା ୧୩୦୪୭/୨୪।୮।୨୦ରେ ରୋଗୀଙ୍କ ଠିକଣାରେ ବୋଲଗଡ଼ ତହସିଲଦାରଙ୍କ ପରିବର୍ତ୍ତେ ବେଗୁନିଆ ତହସିଲଦାରଙ୍କ ନିକଟକୁ ପଠାଇ ଦେଇଥିଲେ। ଫଳରେ ରୋଗୀ ଟଙ୍କା ପାଇବାରେ ବାଧା ଉପୁଜିଛି। ସିଏମ୍ଆର୍ଏଫ୍ରୁ ୧ ଲକ୍ଷ ଟଙ୍କା ମିଳିଥିବା ରୋଗୀଙ୍କ ସମ୍ପର୍କୀୟଙ୍କ ନିକଟକୁ ପତ୍ର ଆସିଥିବା ସତ୍ତ୍ୱେ ତାଙ୍କୁ କୌଣସି ସହାୟତା ମିଳି ନ ଥିଲା। ଏନେଇ ବଂଶୀଧରଙ୍କ ସମ୍ପର୍କୀୟ ବୋଲଗଡ଼ ତହସିଲକୁ ବାରମ୍ବାର ଦୌଡି ନିରାଶ ହେବା ପରେ ଜିଲା ପ୍ରଶାସନ ଜରୁରିକାଳୀନ ବିଭାଗ ସହ ଯୋଗାଯୋଗ କରିଥିଲେ। ବିଭାଗୀୟ କର୍ତ୍ତୃପକ୍ଷ ବେଗୁନିଆ ତହସିଲରେ ଯୋଗାଯୋଗ କରିବାକୁ କହିଥିଲେ। ଡିସେମ୍ବର ୩ରେ ବଂଶୀଧରଙ୍କ ସମ୍ପର୍କୀୟ ବେଗୁନିଆ ତହସିଲଦାରଙ୍କୁ ଲିଖିତ ଭାବେ ଅନୁରୋଧ କରିଥିଲେ। ତେବେ ୯ଦିନ ବିତିଯାଇଥିଲେ ମଧ୍ୟ କୌଣସି ପଦକ୍ଷେପ ନିଆଯାଇନାହିଁ। ଅନ୍ୟପଟେ ବିକାଶଙ୍କ ଅବସ୍ଥା ଦିନକୁ ଦିନ ଖରାପ ହେବାକୁ ଲାଗିଛି। ସିଏମଆରଏଫରୁ ଆର୍ଥିିକ ସହାୟତା ସତ୍ତ୍ୱେ ସ୍ଥାନୀୟ ପ୍ରଶାସନର ଅବହେଳାରୁ ବଂଶୀଧର ଏଥିରୁ ବଞ୍ଚିତ ହୋଇଛନ୍ତି। ଏନେଇ ଜିଲାପାଳ ସନତ ମହାନ୍ତିଙ୍କ ମତାମତ ମିଳିପାରିନାହିଁ।