ନୂଆଦିଲ୍ଲୀ,୧୭।୧: ଭାଜପା କାର୍ଯ୍ୟକାରିଣୀ ବୈଠକର ଦ୍ୱିତୀୟ ଦିନରେ ଜେ.ପି. ନଡ୍ଡାଙ୍କୁ ପୁଣିଥରେ ଅଧ୍ୟକ୍ଷ କରାଯାଇଛି। ଲୋକ ସଭା ନିର୍ବାଚନକୁ ଦୃଷ୍ଟିରେ ରଖି ତାଙ୍କ କାର୍ଯ୍ୟକାଳକୁ ଜୁନ୍ ୨୦୨୪ ଯାଏ ବୃଦ୍ଧି କରାଯାଇଛି। ପୂର୍ବରୁ ରାଜନାଥ ସିଂହ, ଲାଲକୃଷ୍ଣ ଆଡଭାଣୀ ଦୁଇ କିମ୍ବା ଅଧିକ ଥର ପାଇଁ ଅଧ୍ୟକ୍ଷ ହୋଇଥିଲେ। ଏବେ ନଡ୍ଡା ତୃତୀୟ ନେତା ଭାବେ ଦଳର ନେତୃତ୍ୱ ପାଇଛନ୍ତି।
ମୋଦି ସରକାରରେ ସ୍ବାସ୍ଥ୍ୟମନ୍ତ୍ରୀ ଥିବା ନଡ୍ଡାଙ୍କ ସଂଗଠନର ଅଭିଜ୍ଞତା ରହିଛି। ଭାଜପା ଅଧ୍ୟକ୍ଷ ହେବା ପୂର୍ବରୁ ନଡ୍ଡା ଜମ୍ମୁ-କଶ୍ମୀର ଏବଂ ୟୁପିର ପ୍ରଭାରୀ ମହାସଚିବ ଥିଲେ। ୨୦୧୦ରେ ସେ ଜାତୀୟ ରାଜନୀତିରେ ପ୍ରବେଶ କରିଥିଲେ, ସେତେବେଳେ ନୀତିନ ଗଡକରୀ ତାଙ୍କୁ ଦଳର ସଚିବ ଭାବେ ନିଯୁକ୍ତ କରିଥିଲେ।
ହିମାଚଳ ପ୍ରଦେଶ ହେଉଛି ନଡ୍ଡାଙ୍କ ଗୃହ ରାଜ୍ୟ। ଏଠାରେ ନିକଟରେ ହୋଇଥିବା ନିର୍ବାଚନରେ ଦଳ ପରାଜୟର ସମ୍ମୁଖୀନ ହୋଇଥିଲା। ଏହି ପରାଜୟ ପରେ ନଡ୍ଡାଙ୍କ ପଦବୀ ବିପଦରେ ଥିବା କୁହାଯାଉଥିଲା। ହେଲେ ସେଭଳି କିଛି ହୋଇନାହିଁ। ସେ ପୁଣିଥରେ ଅଧ୍ୟକ୍ଷ ଭାବେ ନିର୍ବାଚିତ ହୋଇଛନ୍ତି। ତେବେ କାହିଁକି, ଆସନ୍ତୁ ଜାଣିବା…
-ମୋଦି-ଶାହାଙ୍କ ନିଷ୍ପତ୍ତିକୁ କାର୍ଯ୍ୟକାରୀ କରିବାରେ ସିଦ୍ଧହସ୍ତ:
୨୦୨୧ରେ ମୋଦି କ୍ୟାବିନେଟରେ ପରିବର୍ତ୍ତନ ହୋଇଥିଲା। ପ୍ରଧାନମନ୍ତ୍ରୀଙ୍କ ବାସଭବନରେ ନୂତନ ନାମଙ୍କୁ ନେଇ ମୋଦି, ଅମିତ ଶାହା ଏବଂ ନଡ୍ଡାଙ୍କ ମଧ୍ୟରେ ବୈଠକ ଅନୁଷ୍ଠିତ ହୋଇଥିଲା। ଏହି ବୈଠକରେ କିଛି ବଳିଷ୍ଠ ମନ୍ତ୍ରୀଙ୍କୁ ହଟାଇବkା ଉପରେ ସହମତି ପ୍ରକାଶ ପାଇଥିଲା। ଏଥିମଧ୍ୟରେ ରବି ଶଙ୍କର ପ୍ରସାଦ, ପ୍ରକାଶ ଜାଭେଦକର ଏବଂ ହର୍ଷ ବର୍ଦ୍ଧନଙ୍କ ନାମ ଅନ୍ତର୍ଭୁକ୍ତ ଥିଲା। ମନ୍ତ୍ରୀଙ୍କଠାରୁ ଇସ୍ତଫା ପଠାଇବା ଦାୟିତ୍ୱ ନଡ୍ଡାଙ୍କୁ ଦିଆଯାଇଥିଲା। ନାଡା ସମସ୍ତ ୧୨ ମନ୍ତ୍ରୀଙ୍କୁ ଡାକି ସେମାନଙ୍କ ଇସ୍ତଫା ପିଏମ୍ଓକୁ ପଠାଇବାକୁ କହିଥିଲେ। ଏହି ଯୋଜନା ଏତେ ସୁରୁଖୁରୁରେ କାର୍ଯ୍ୟକାରୀ ହେଲା ଯେ ଆରମ୍ଭରେ କେହି ବି ସୂଚନା ପାଇ ନ ଥିଲେ।
-ବିହାର-ୟୁପିରେ ସର୍ବୋତ୍ତମ ପ୍ରଦର୍ଶନ ପାଇଁ ପୁରସ୍କୃତ:
ନଡ୍ଡାଙ୍କୁ ୨୦୨୦ ରେ ବିଜେପିର ଜାତୀୟ ଅଧ୍ୟକ୍ଷ କରାଯାଇଥିଲା। ଏହା ପରେ ପ୍ରାୟ ୧୪ ଟି ରାଜ୍ୟରେ ବିଧାନସଭା ନିର୍ବାଚନ ଅନୁଷ୍ଠିତ ହୋଇଛି। ଏଥିରେ ୫ ରାଜ୍ୟରେ ଭାଜପା ଏକାକୀ ସରକାର ଗଠନ କରିଥିବାବେଳେ୨ ରାଜ୍ୟରେ ମେଣ୍ଟ ସରକାର ଗଠନ କରିବାରେ ସଫଳ ହୋଇଥିଲା।
ନଡ୍ଡାଙ୍କ ନେତୃତ୍ୱରେ ବିହାର ଏବଂ ୟୁପିରେ ଭାଜପା ଭଲ ପ୍ରଦର୍ଶନ କରିଥିଲା। ଭାଜପା ୭୪ଟି ସିଟ ଜିତି ବିହାରରେ ଦ୍ୱିତୀୟ ବୃହତ୍ତମ ଦଳ ହୋଇଥିବାବେଳେ ୟୁପିରେ ୨୫୦ ରୁ ଅଧିକ ସିଟ୍ ଜିତି ସରକାର ଗଠନ କରିଛି। ଏହି ଦୁଇଟି ରାଜ୍ୟରେ ମୋଟ ୧୨୦ ଲୋକସଭା ଆସନ ଅଛି।
-ଏବେ ମିଶନ ୨୦୨୪ ମୋଡ୍ରେ ନଡ୍ଡା, ୯ ରାଜ୍ୟରେ ଦଳକୁ ମଜଭୂତ କରିବା ଲକ୍ଷ୍ୟ:-
୨୦୨୩ ରେ ନିର୍ବାଚନ ହେବାକୁ ଥିବା ୯ ରାଜ୍ୟ ମଧ୍ୟରୁ ୫ ରାଜ୍ୟରେ ଭାଜପା ମିଳିତ ସରକାର ଅଛି। ଅର୍ଥାତ ଏହି ୫ ରାଜ୍ୟରେ ଭାଜପା ସାମ୍ନାରେ ଏକ ଚ୍ୟାଲେଞ୍ଜ ମଧ୍ୟ ରହିଛି। ସେହିଭଳି ୪ ରାଜ୍ୟ ତେଲେଙ୍ଗାନା, ରାଜସ୍ଥାନ, ମିଜୋରାମ ଏବଂ ଛତିଶଗଡରେ ଜିତିବା ମଧ୍ୟ ଦଳ ପାଇଁ ଆହ୍ବାନ ପାଲଟିବ ବୋଲି କୁହାଯାଉଛି। ଏମିତିରେ ନଡ୍ଡାଙ୍କ ଅଧ୍ୟକ୍ଷତାରେ ଦଳର ହାଇକମାଣ୍ଡ ସମସ୍ତ ରାଜ୍ୟକୁ ହାତେଇବା ଲାଗି ରଣନୀତି ପ୍ରସ୍ତୁତ କରିପାରିବ। ଏହାଛଡ଼ା ମେଣ୍ଟ ସରକାର ଗଠନ କରିବା ଦିଗରେ ମଧ୍ୟ କାମ କରିପାରିବ। ମୋଦି-ଶାହଙ୍କ ବିଶ୍ୱସନୀୟ ହୋଇଥିବାରୁ ନଡ୍ଡା ଏହି କାମ ସହଜରେ କରିପାରିବେ।