ସେମିଳିଗୁଡ଼ା/ସୁନାବେଡ଼ା, ୧୯।୫(ସ୍ବ.ପ୍ର.): ଅନ୍ୟତ୍ର ବଦଳି ସତ୍ତ୍ୱେ ସେମିଳିଗୁଡ଼ା ଏବିଇଓ ଜସନ ବେନିଆ ଗାଦି ଛାଡୁନାହାନ୍ତି। ମାସେ ହେଲାଣି ସେ ବଦଳି ସ୍ଥାନକୁ ନ ଯାଇ ଏଠାରେ ଅଛନ୍ତି। ତାଙ୍କର ରାୟଗଡ଼ା ଜିଲା ଚନ୍ଦ୍ରପୁର ବ୍ଲକ୍କୁ ୨୦ା୪ା୨୨ରେ ବଦଳି ହୋଇଛି। ୧୯୯୧ରେ ସେମିଳିଗୁଡ଼ା ବ୍ଲକ ସୋରିଷପଦର ଅଞ୍ଚଳର ଏକ ବିଦ୍ୟାଳୟରେ ଶିକ୍ଷାକର୍ମୀ ଭାବେ ଚାକିରି ଜୀବନ ଆରମ୍ଭ କରିଥିବା ବେନିଆ ୨୦୧୩ରେ ଏବିଇଓ ରୂପେ ପଦୋନ୍ନତି ପାଇଥିଲେ। ଏକକାଳୀନ ୫୬ ଜଣ ଏବିଇଓଙ୍କ ବଦଳି ହୋଇଥିଲା। ସେଥିରେ ୨୫ ନମ୍ବରରେ ବେନିଆଙ୍କ ନାମ ରହିଥିଲା। ସେ ବଦଳି ଜାଗାକୁ ନ ଯିବା ନେଇ ପଚାରିବାକୁ ଜିଲା ଶିକ୍ଷା ଅଧିକାରୀ ରାମଚନ୍ଦ୍ର ନାହାକଙ୍କୁ ଯୋଗାଯୋଗ କରିଥିଲେ ମଧ୍ୟ ସେ ଫୋନ୍ କାଟି ଦେଇଥିଲେ।