ମହାକାଳପଡା,୧୩ା୧୧(ଡି.ଏନ୍.ଏ.): କେନ୍ଦ୍ରାପଡ଼ା ଜିଲା ମହାକାଳପଡା ବ୍ଲକ ଗହୀରମଥା ସଂଲଗ୍ନ ଗ୍ରାମଗୁଡିକରେ ବାର୍ହା ଉପଦ୍ରବ ଦେଖିବାକୁ ମିଳୁଛି। ବାର୍ହା ପଲ ମୁହଁ ଅନ୍ଧାର ହେଲା ପରେ ଜମିରେ ପଶି ବ୍ୟାପକ ଧାନ ଫସଲ ନଷ୍ଟ କରୁଛନ୍ତି। ଫସଲକୁ ବାର୍ହା କବଳରୁ ରକ୍ଷା କରିବାକୁ ଯାଇ ଚାଷୀମାନେ ଧାନ ଜମିରେ ମଞ୍ଚା ବାନ୍ଧି ରାତି ଉଜାଗର ହୋଇ ଜଗି ବସୁଛନ୍ତି। ବିଭିନ୍ନ ସମୟରେ ବାର୍ହା ଆକ୍ରମଣରେ ଲୋକେ ଗୁରୁତର ଆହତ ହେଉଛନ୍ତି। ଗତବର୍ଷ ଜଣେ ମହିଳାଙ୍କ ବାର୍ହା ଆକ୍ରମଣରେ ମୃତ୍ୟୁ ଘଟିଥିଲା।
ବ୍ଲକର ରଟଫଳ, ନରସିଂହପୁର, ଭୋପାଳ, ପାଣିଖିଆ, କାଇତଳା, ତନ୍ତିଆପାଳ, କଳତୁଙ୍ଗା, ଶାସନପୋଟା, ଓସ୍ତିରା ପ୍ରଭୃତିି ଗ୍ରାମର ଚାଷ ଜମିରେ ବାର୍ହା ରାତିରେ ପଶି ଧାନ ଖାଇବା ସହ ଚକଟି ଦେଉଛନ୍ତି। ଚାଷୀଙ୍କ କହିବା ଅନୁସାରେ, ସନ୍ଧ୍ୟା ହେବା ପରେ ନିକଟସ୍ଥ ତଣ୍ଡାକୁଳ ଝାଉଁ ଜଙ୍ଗଲରୁ ପଲ ପଲ ବାର୍ହା ଆସି ଧାନ କିଆରିରେ ପଶି ଏକର ଏକର ଫସଲ ନଷ୍ଟ କରୁଛନ୍ତି। ଏ ନେଇ ବନବିଭାଗକୁ ବାରମ୍ବାର ଅବଗତ କରାଯାଇଥିଲେ ବି କୌଣସି ସୁଫଳ ମିଳୁନି। ଫସଲ ରକ୍ଷା କରିବାକୁ ଯାଇ ଚାଷୀମାନେ ଚାଷଜମି ମଝିରେ ମଞ୍ଚା ବାନ୍ଧି ତା’ ଉପରେ ରାତିରେ ଜଗୁଛନ୍ତି। ବାର୍ହା ପଲ ଦେଖିବା ମାତ୍ରେ ନିଅଁା ହୁଳା ଜଳାଇ, ଟିଣ ବାଡେଇବା ସହ ବାଣ ଫୁଟାଇ ସେମାନଙ୍କୁ ଘଉଡାଉଛନ୍ତି। ନରସିଂହପୁର ଗ୍ରାମର ଚାଷୀ ପ୍ରଫୁଲ୍ଲ ସେଠୀ, କାଳିପଦ ମଣ୍ଡଳ, ରୁନୁ ଜେନା, ପାଣିଖିଆ ଗ୍ରାମର ଭଗବାନ ଟୁଡୁ, ଜୟରାମ ମଣ୍ଡଳ, ବାବୁ ନାୟକ, ପାଗଳା ପରିଡା ପ୍ରମୁଖ ଚାଷୀ ଅଭିଯୋଗ କରିଛନ୍ତି। ଏ ସମ୍ପର୍କରେ ଗହୀରମଥାର ବନ ଅଧିକାରୀ ଦେବାଶିଷ ଭୋଇଙ୍କୁ ପଚାରିବାରେ ବାର୍ହା ଉପଦ୍ରବ ନେଇ ସ୍ଥାନୀୟ ଅଞ୍ଚଳରେ ସଚେତନତା କରାଯାଉଛି। ବନ ବିଭାଗ ପକ୍ଷରୁ ୫ ଜଣିଆ ଟିମ୍କୁ ରାତ୍ରିକାଳୀନ ପାଟ୍ରୋଲିଂ ପାଇଁ ନିୟୋଜିତ ହୋଇଛନ୍ତି। ଚାଷୀଙ୍କ ସୁବିଧା ସକାଶେ ଜଙ୍ଗଲ ପାର୍ଶ୍ୱରେ ତାରବାଡ ତିଆରି କାର୍ଯ୍ୟ ଏବେ ଚାଲିଛି ବୋଲି ସେ କହିଛନ୍ତି।