କେନ୍ଦୁଝର,୧୩ା୧୨(ନରେଶ ଚନ୍ଦ୍ର ପଟ୍ଟନାୟକ): କେନ୍ଦୁଝର ଜିଲା ବାଂଶପାଳ ବ୍ଲକ ଅନ୍ତର୍ଗତ ଜନ୍ତାରୀ ଗ୍ରାମରେ ବହୁ ପୁରାତନ ଜନଜାତିର ୧୧ ଜଣ ଜୁଆଙ୍ଗଙ୍କ ମୃତ୍ୟୁ ଘଟଣାକୁ ନେଇ ଜାତୀୟ ମାନବାଧିକାର କମିଶନ (ଏନ୍ଏଚ୍ଆର୍ସି) ଓଡ଼ିଶା ରାଜ୍ୟ ସରକାରଙ୍କ ମୁଖ୍ୟ ଶାସନ ସଚିବଙ୍କୁ ବୁଧବାର ରିପୋର୍ଟ ମାଗିଛନ୍ତି। ଉକ୍ତ ଘଟଣାରେ କ’ଣ ପଦକ୍ଷେପ ନିଆଯାଇଛି ତାହାର ସବିଶେଷ ରିପୋର୍ଟ ମାଗିଛନ୍ତି। ଏହି ଘଟଣାକୁ ନେଇ ସୁପ୍ରିମକୋର୍ଟ ଓକିଲ ତଥା ମାନବାଧିକାର କର୍ମୀ ରାଧାକାନ୍ତ ତ୍ରିପାଠୀ ଗତ ୨୯ ଅକ୍ଟୋବରରେ ଏକ ପିଟିଶନ ଦାଖଲ କରିଥିଲେ। ରାଜ୍ୟ ସରକାରଙ୍କ ସ୍ବାସ୍ଥ୍ୟ ଓ ପରିବାର କଲ୍ୟାଣ ବିଭାଗ, ଆଦିବାସୀ ମଙ୍ଗଳ ବିଭାଗର ଅବହେଳା ଯୋଗୁ ଏଭଳି ଘଟଣା ଘଟିଥିବା ବେଳେ ଉକ୍ତ ଅଞ୍ଚଳରେ ବସବାସ କରୁଥିବା ଜୁଆଙ୍ଗମାନେ ଅଭାବ ଅନଟନ ମଧ୍ୟରେ ରହିବା ସହ ମୌଳିକ ସୁବିଧା ପାଇପାରୁନାହନ୍ତି। ଗୋନାସିକା ପ୍ରାଥମିକ ସ୍ବାସ୍ଥ୍ୟକେନ୍ଦ୍ର, ଗୋନାସିକାଠାରୁ ୧୫ କିମି ଓ ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ର, ବାଂଶପାଳଠାରୁ ୪୦ କିମି ଦୂରରେ ଏହି ଗ୍ରାମଟି ଅବସ୍ଥିତ। ଏଠାରେ ପାଖାପାଖି ୧୦୦ଟି ଜୁଆଙ୍ଗ ପରିବାର ବସବାସ କରୁଛନ୍ତି। ଜୁଆଙ୍ଗ ହେଉଛି ରାଜ୍ୟର ୧୩ଟି ସମ୍ବେଦନଶୀଳ ଆଦିବାସୀ ଗ୍ରୁପ (ପିଭିଟିଜି) ମଧ୍ୟରୁ ଅନ୍ୟତମ। ରାଜ୍ୟର ୬୨ଟି ଆଦିବାସୀ ସଂପ୍ରଦାୟ ମଧ୍ୟରୁ ୧୩ଟି ପୁରାତନ ଜନଜାତି ବର୍ଗର ଅଟନ୍ତି। ରାଜ୍ୟରେ ୨୦୧୧ ଜନଗଣନା ଅନୁଯାୟୀ, ଜୁଆଙ୍ଗଙ୍କ ସଂଖ୍ୟା ୪୭,୦୯୫ମଧ୍ୟରୁ କେନ୍ଦୁଝର ଜିଲାର ବାଂଶପାଳ, ତେଲକୋଇ ଓ ହରିଚନ୍ଦନପୁର ବ୍ଲକରେ ୨୬,୭୦୭ଜଣ ଅଛନ୍ତି। ରାଜ୍ୟ ସରକାରଙ୍କ ବିଜୁ ସ୍ବାସ୍ଥ୍ୟ କଲ୍ୟାଣ ଯୋଜନାରେ ଏହି ଗ୍ରାମର ଜୁଆଙ୍ଗମାନେ ହିତାଧିକାରୀ ହୋଇ ନ ଥିବା ବେଳେ କେନ୍ଦୁଝର ଜିଲାରେ ନିଜସ୍ବ ଜିଲା ଖଣିଜ ପ୍ରତିଷ୍ଠାନ ପାଣ୍ଠିରୁ ସେମାନଙ୍କୁ ବିଶୁଦ୍ଧ ପାନୀୟ ଜଳ ଯୋଗାଣ କେନ୍ଦୁଝର ଶିକ୍ଷା, ସ୍ବାସ୍ଥ୍ୟସେବା ଆଦି ଅତ୍ୟାବଶ୍ୟକୀୟ ସୁବିଧା ଯୋଗାଇବା ଦେବା ଉପରେ ଆଇନଜୀବୀ ତ୍ରିପାଠୀ କହିଛନ୍ତି।