କାମାକ୍ଷାନଗର, ୧୯।୭(ସୁଧୀର ପରିଡ଼ା): ଛତୁଚାଷର ହବ୍ ପାଲଟିଛି ଢେଙ୍କାନାଳ ଜିଲାର କାମାକ୍ଷାନଗର ଉପଖଣ୍ଡ। ଅଞ୍ଚଳର ଅନୁକୂଳ ଜଳବାୟୁ ଛତୁ ଚାଷ ପାଇଁ ଉପଯୋଗୀ ସାବ୍ୟସ୍ତ ହୋଇଥିବାବେଳେ ବର୍ଷସାରା ଏହାର ଚାହିଦା ରହୁଛି। ତେଣୁ ଯୁବପିଢ଼ି ଏବେ ଏହି ଚାଷ କରିବାକୁ ବିଶେଷ ଭାବେ ଆଗ୍ରହୀ ହେଉଛନ୍ତି। ଫଳରେ କାମାକ୍ଷାନଗର ଅଞ୍ଚଳର ଚାହିଦା ମେଣ୍ଟାଇବା ପରେ ଏବେ ଏଠାରୁ ଜିଲା ବାହାରକୁ ରପ୍ତାନି ହେଉଛି କୁଇଣ୍ଟାଲ କୁଇଣ୍ଟାଲ ଛତୁ। ଅଞ୍ଚଳର ବହୁ ଶିକ୍ଷିତ, ଅର୍ଦ୍ଧଶିକ୍ଷିତ ଯୁବପିଢ଼ି ଏହାକୁ ବୃତ୍ତିଭାବେ ଗ୍ରହଣ କରି ଲକ୍ଷାଧିକ ଟଙ୍କା ରୋଜଗାର କରୁଥିବାବେଳେ ଏହାଦ୍ୱାରା ପ୍ରତ୍ୟକ୍ଷ ଏବଂ ପରୋକ୍ଷ ଭାବେ ସୃଷ୍ଟି ହେଉଛି ବ୍ୟାପକ ନିଯୁକ୍ତି ସୁଯୋଗ।
କାମାକ୍ଷାନଗର ଉପଖଣ୍ଡ ପରଜଙ୍ଗ ବ୍ଲକର ପଥରଖମ୍ବ, ଜୟପୁରାକାଟେଣି, ମୁକ୍ତାପଶି, ବଡ଼ଝରା, ଶୁଣ୍ଢିକାଟେଣି, କାମାକ୍ଷାନଗର ବ୍ଲକର ଚୁଳିଆ, ବାଉଁଶପାଳ, ସମାଟାଙ୍ଗି, ବିଜାସାହି, ଆଲୁଅଝରଣ ଅଞ୍ଚଳରେ ବ୍ୟାପକ ପରିମାଣର ପାଳ ଛତୁ ଚାଷ ହେଉଛି। ଜଙ୍ଗଲିଆ ଥଣ୍ଡା ପରିବେଶରେ ଉତ୍ପାଦନ ଆଶାତୀତ ହେଉଛି। ଅଞ୍ଚଳରୁ ଦୈନିକ ପ୍ରାୟ ୧୦୦ କୁଇଣ୍ଟାଲ ଛତୁ ବାହାରୁଥିବାବେଳେ ବ୍ୟବସାୟୀଙ୍କ ଜରିଆରେ ଚାଷୀମାନେ କେନ୍ଦୁଝର, ଯାଜପୁର, ଅନୁଗୋଳ, ସମ୍ବଲପୁର ଜିଲାକୁ ରପ୍ତାନି କରୁଛନ୍ତି। ଛତୁ ଉତ୍ପାଦନ ପାଇଁ ପ୍ରସ୍ତୁତ ବେଡ୍ ପିଛା ୮୦ରୁ ୯୦ଟଙ୍କା ଖର୍ଚ୍ଚ ହେଉଥିବାବେଳେ ଏଥିରୁ ୧ରୁ ଦେଢ଼ କେଜି ଯାଏ ଛତୁ ବାହାରିଥାଏ। ଚାଷୀମାନେ ବ୍ୟବସାୟୀଙ୍କୁ କେଜି ପିଛା ୧୫୦ରୁ ୧୭୦ ଟଙ୍କାରେ ବିକୁଥିବାବେଳେ ଖୋଲା ବଜାରରେ ଏହା ୨୦୦ରୁ ୨୨୦ ଟଙ୍କାରେ ମିଳୁଛି। ଅକ୍ଟୋବରରୁ ଜୁଲାଇ ମଧ୍ୟରେ ସାଧାରଣତଃ ଛତୁ ଛାଷ ପାଇଁ ଜଳବାୟୁ ଅନୁକୂଳ ଥାଏ। ୧ ଲକ୍ଷ ଟଙ୍କା ବିନିଯୋଗ କଲେ ଏବଂ ପାଗ ଭଲ ରହିଲେ ହାରାହାରି ୨ରୁ ଅଢ଼େଇ ଲକ୍ଷ ଟଙ୍କା ଲାଭ ହୋଇଥାଏ ବୋଲି ଚାଷୀମାନେ କହିଛନ୍ତି।
ଛତୁ ଚାଷ ଏକ ଲାଭଜନକ ବ୍ୟବସାୟ ହୋଇଥିବାରୁ ରାଜ୍ୟ ବାହାରକୁ କାମ କରିବାକୁ ଚାଲିଯାଉଥିବା ଯୁବକମାନେ ଏବେ ଏଥିରେ ମନୋନିବେଶ କରିବାକୁ ଆଗଭର ହେଉଛନ୍ତି। ଏହାଦ୍ୱାରା ଉପଖଣ୍ଡର ଶତାଧିକ ପରିବାରର ଆର୍ଥିକସ୍ଥିତି ମଜଭୁତ୍ ହୋଇପାରିଛି। ସରକାରୀସ୍ତରରେ ଉନ୍ନତ ଜ୍ଞାନକୌଶଳ, ପ୍ରୋତ୍ସାହନ ସାଙ୍ଗକୁ ବଜାର ସୁବିଧା ଯୋଗାଇ ଦିଆଗଲେ କାମାକ୍ଷାନଗର ଉପଖଣ୍ଡ ଛତୁ ଚାଷରେ ଆହୁରି ଆଗକୁ ଯିବ ବୋଲି ବୁଦ୍ଧିଜୀବୀମାନେ ମତବ୍ୟକ୍ତ କରିଛନ୍ତି।