କୋରାପୁଟ,୪।୬(ସ୍ବ.ପ୍ର.): ଶାବର ଶ୍ରୀକ୍ଷେତ୍ରରେ ରବିବାର ଦେବସ୍ନାନ ପୂର୍ଣ୍ଣିମା ମହାସମାରୋହରେ ପାଳିତ ହୋଇଯାଇଛି। ଶାବର ଶ୍ରୀକ୍ଷେତ୍ର ମନ୍ଦିର ପରିଚାଳନା କମିଟି ସମ୍ପାଦକ ଜଗବନ୍ଧୁ ସାମଲଙ୍କ ତତ୍ତ୍ୱାବଧାନରେ ଆୟୋଜିତ ଉତ୍ସବରେ ପରିଚାଳନା କମିଟିର ସମସ୍ତ କର୍ମକର୍ତ୍ତା ସାମିଲ ହୋଇ କାର୍ଯ୍ୟକ୍ରମକୁ ସମ୍ପାଦନ କରିଥିଲେ।
ରବିବାର ସକାଳ ମହାଧୂପ, ଆଳତି ପରେ ପାରମ୍ପରିକ ପୂଜାର୍ଚ୍ଚନା କରାଯାଇଥିଲେ। ପରେ ୭ ଘଣ୍ଟା ୩୦ମିନିଟରୁ ୮ଟା ୧୫ ମିନିଟ ମଧ୍ୟରେ ମନ୍ଦିର ପରିସରରେ ଚମ୍ପାବଣରେ ଥିବା ସୁନାକୁଅରୁ ୧୦୮ କଳସ ଜଳ ସଂଗ୍ରହ କରାଥିଲା। ଅପରାହ୍ନ ୧ଟା ୩୦ରୁ ଅପରାହ୍ନ ୧ଟା ମଧ୍ୟରେ ଠାକୁରଙ୍କ ପହଣ୍ଡି କରାଯାଇ ମନ୍ଦିର ପାର୍ଶ୍ୱରେ ଥିବା ସ୍ନାନ ମଣ୍ଡପକୁ ଅଣାଯାଇଥିଲା। ହୋମ ଏବଂ ପୂଜାର୍ଚ୍ଚନା କାର୍ଯ୍ୟ ପରେ ୩ଠାକୁରଙ୍କୁ ୧୦୮ କଳସ ଜଳରେ ସ୍ନାନ କରାଯାଇଥିଲା। ପରେ ଠାକୁରଙ୍କୁ ଗଜବେଶ ସୁସଜ୍ଜିତ କରାଯାଇଥିଲା। ଅପରାହ୍ନ ୩ଟାରେ ଭକ୍ତଙ୍କ ଦର୍ଶନ ନିମନ୍ତେ ଖୋଲାଯାଇଥିଲା। ମହାପ୍ରଭୁଙ୍କ ଦୁଲ୍ଲର୍ଭ ବେଶ ଦେଖିବା ପାଇଁ କୋରାପୁଟ ଜିଲା ସମେତ ଜିଲା ବାହାରରରୁ ହଜାର ହଜାର ଭକ୍ତ ଶାବର ଶ୍ରୀକ୍ଷେତ୍ରରେ ସମାଗମ ହୋଇଛନ୍ତି। ଶାନ୍ତି ଶୃଙ୍ଖଳା ନିମନ୍ତେ କୋରାପୁଟ ଟାଉନ ଥାନା ଅଧିକାରୀ ଧିରେନ ପଟ୍ଟନାୟକଙ୍କ ତତ୍ତ୍ୱାବଧାନରେ ପୋଲିସ ଫୋର୍ସ ମୁତୟନ କରାଯାଇଛି। ରାତି ୯ଟା ୩୦ ମିନିଟ ମଧ୍ୟରେ ଠାକୁରଙ୍କ ଅଣସର ପିଣ୍ଡିକୁ ନିଆଯିବ ବୋଲି ମନ୍ଦିର ପରିଚାଳନା କମିଟି ପକ୍ଷରୁ ସମୟ ଧାର୍ଯ୍ୟ କରାଯାଇଥିବା ସୂଚନା ମିଳିଛି।