ଉତ୍ତରାଖଣ୍ଡ ଭାରତର ଏକ ସୁନ୍ଦର ରାଜ୍ୟ, ଯାହା ଦେବଭୂମି ବା ଦେବତାଙ୍କ ଭୂମି ଭାବେ ବେଶ୍ ପ୍ରସିଦ୍ଧି ଲାଭ କରିଛି। ପର୍ଯ୍ୟଟକଙ୍କ ଦେଖିବା ନିମନ୍ତେ ଏଠାରେ ରହିଛି ଅନେକ ଧାର୍ମିକପୀଠ, ଶୈଳନିବାସ, ବନ୍ୟପ୍ରାଣୀ ଅଭୟାରଣ୍ୟ ଇତ୍ୟାଦି। ପର୍ଯ୍ୟଟନ ବ୍ୟତୀତ ବହୁ ଦୁଃସାହସିକ କ୍ରୀଡ଼ାର
ମଜା ନେବା ପାଇଁ ବି ଦେଶବିଦେଶରୁ ପର୍ଯ୍ୟଟକ
ଏଠାକୁ ଆସିଥାନ୍ତି…
ଉତ୍ତରାଖଣ୍ଡ ଭାରତର ଏକ ସୁନ୍ଦର ତଥା ଶାନ୍ତିପୂର୍ଣ୍ଣ ପର୍ଯ୍ୟଟନ କେନ୍ଦ୍ର ।
ଦେବଭୂମି ଭାବେ ପରିଚିତ ଏହି ସ୍ଥାନଟି ନିଜର ଶାନ୍ତ ବାତାବରଣ, ମନମୋହକ ଦର୍ଶନୀୟ ସ୍ଥାନ ତଥା ଅପୂର୍ବ ପ୍ରାକୃତିକ ଦୃଶ୍ୟ ପାଇଁ ବେଶ୍ ଲୋକପ୍ରିୟତା ହାସଲ କରିପାରିଛି। ତେବେ କରୋନା ମହାମାରୀ ପାଇଁ ଏଠାରେ ପର୍ଯ୍ୟଟକଙ୍କ ଆଗମନକୁ ନେଇ ଅନେକ କଟକଣା ଜାରି କରାଯାଇଥିଲା। କିନ୍ତୁ ଏବେ ଅନେକ ନିୟମ କୋହଳ କରାଯାଇଥିବାରୁ ଧୀରେ ଧୀରେ ଏଠାକୁ ପର୍ଯ୍ୟଟକଙ୍କର ସଂଖ୍ୟା ବୃଦ୍ଧି ପାଇବାରେ ଲାଗିଲାଣି।
ପ୍ରମୁଖ ପର୍ଯ୍ୟଟନସ୍ଥଳୀ ଉତ୍ତରାଖଣ୍ଡରେ ଏମିତି ଅନେକ ପର୍ଯ୍ୟଟନସ୍ଥଳୀ ରହିଛି, ଯେଉଁଠାକୁ କେବଳ ଭାରତୀୟ ପର୍ଯ୍ୟଟକ ନୁହେଁ ବିଦେଶୀ ଆଗନ୍ତୁକ ବି ବୁଲିବାକୁ ଆସିଥାନ୍ତି। ଯେମିତି କି ନୈନିତାଲ୍ ଓ ମସୌରୀ। ଏସବୁ ବ୍ୟତୀତ ଏଠାକାର କେତେକ ପ୍ରମୁଖ ପର୍ଯ୍ୟଟନସ୍ଥଳୀ ମଧ୍ୟରେ ରହିଛି: କେଦାରନାଥ, ଗଙ୍ଗୋତ୍ରୀ, ଯମୁନୋତ୍ରୀ, ବଦ୍ରିନାଥ, ଅଲମୋଡ଼ା, ଋଷିକେଶ, ହେମକୁଣ୍ଡ ସାହିବ, ଭ୍ୟାଲୀ ଅଫ୍ ଫ୍ଲାଓ୍ବାରସ୍ ନ୍ୟାଶନାଲ୍ ପାର୍କ, ଡେରାଡୁନ, ହରିଦ୍ୱାର, ରାନୀକ୍ଷେତ୍, ଔଲି, ଭୀମତାଲ୍ ଇତ୍ୟାଦି ଅନ୍ୟତମ।
ଲୋକପ୍ରିୟ ଭୋଜନ
ଆଳୁ ଓ ଟମାଟୋର ଝୋଳ, ଫାନୁ, ଚୈନସୁ, କୁମାଉନୀ ରାଇତା, ଭାଙ୍ଗ ଚଟଣୀ, କପ୍ପା, ଆଳୁ କେ ଗୁଟ୍ଖେ, ଝଙ୍ଗୋରା କି ଖୀର୍, ସିଙ୍ଗୋରୀ, ଡୁବୁକ୍ ଇତ୍ୟାଦି ହେଉଛି ଏଠାକାର ପ୍ରମୁଖ ଭୋଜନ। ଏହାଛଡ଼ା ସବୁ ବର୍ଗର ପର୍ଯ୍ୟଟକଙ୍କ ପାଇଁ ଏଠାରେ ଭିନ୍ନ ଭିନ୍ନ ଭୋଜନର ସୁବିଧା ମଧ୍ୟ ଉପଲବ୍ଧ ଅଛି।
ଜାଣିବା କଥା
ଦେବଭୂମି ଉତ୍ତରାଖଣ୍ଡକୁ ପର୍ଯ୍ୟଟକଙ୍କର ଆଗମନକୁ ନେଇ କିଛିଟା ନିୟମ ଏବେ ବି ରହିଛି। ଯେମିତି କି:
-ଏଠାରେ ଥିବା କଣ୍ଟେନ୍ମେଣ୍ଟ ଜୋନ୍କୁ କୌଣସି ବି ଲୋକଙ୍କୁ ପ୍ରବେଶ କରିବା ପାଇଁ ଅନୁମତି ମିଳିବ ନାହିଁ।
-ଏଠାରେ ଥିବା ରେଷ୍ଟୁରାଣ୍ଟଗୁଡ଼ିକ ସକାଳ ୭ରୁ ସନ୍ଧ୍ୟା ୭ ଯାଏ ଖୋଲାଯାଏ। ପର୍ଯ୍ୟଟକ ଏହି ସମୟ ଭିତରେ ହିଁ ନିଜ ପାଇଁ ଖାଦ୍ୟ ଯୋଗାଡ କରିନେବା ଦରକାର।
-ତା’ଛଡ଼ା ଉତ୍ତରାଖଣ୍ଡକୁ ପ୍ରବେଶ କରିବା ପାଇଁ ପର୍ଯ୍ୟଟକଙ୍କୁ ସ୍ଥାନୀୟ ଓ୍ବେବସାଇଟ୍ରେ ପଞ୍ଜୀକରଣ କରିବାକୁ ହୋଇଥାଏ।
-ଏଥିସହିତ ସମସ୍ତ ପର୍ଯ୍ୟଟକଙ୍କୁ ନିଜ ସାଥିରେ ଚାରି ଦିନ ତଳର କୋଭିଡ୍ ନେଗେଟିଭ୍ ସାର୍ଟିଫିକେଟ୍ ନେଇ କି ଆସିବା ନିହାତି ଜରୁରୀ।
-ଏସବୁ ପରେ ବି କରୋନା ସମ୍ପର୍କିତ ସରକାରଙ୍କ ଦ୍ୱାରା ଜାରି କରାଯାଇଥିବା ସମସ୍ତ ନିୟମାବଳୀ ମାନିବାକୁ ଏଠାରେ ବେଶ୍ ଗୁରୁତ୍ୱ ଦିଆଯାଇଥାଏ।