ମୁମ୍ବାଇ,୨୩।୪: ରୟାଲ ଚ୍ୟାଲେଞ୍ଜର୍ସ ବେଙ୍ଗାଲୁରୁ(ଆରସିବି)ର ଯୁବ ବ୍ୟାଟ୍ସମ୍ୟାନ ଦେବଦତ୍ତ ପଡିକାଲ୍ ଆଇପିଏଲ ୨୦୨୧ରେ ପ୍ରଥମ ଶତକ ହାସଲ କରିଛନ୍ତି। ୨୦ ବର୍ଷୀୟ ପଡିକାଲ୍ ୫୧ଟି ବଲରେ ୧୧ ଚୌକା ଓ ୬ଟି ଛକା ସହାୟତାରେ ରାଜସ୍ଥାନ ରୟାଲ୍ସ ବିପକ୍ଷରେ ଅପରାଜିତ ୧୦୧ ରନ କରିଥିଲେ। ଏହି ଇନିଂସ ଆଧାରରେ ଆରସିବି ରାଜସ୍ଥାନକୁ ୧୦ ଉଇକେଟରେ ପରାସ୍ତ କରିଛି। ଏହା ସହିତ ଦଳ ପଏଣ୍ଟ ଟେବୁଲରେ ଶୀର୍ଷରେ ପହଞ୍ଚିଛି। ଚଳିତ ସିଜିନରେ ଏହା ଦ୍ୱିତୀୟ ଶତକ। ଏହାପୂର୍ବରୁ ରାଜସ୍ଥାନ ରୟାଲ୍ସର ଅଧିନାୟକ ସଞ୍ଜୁ ସାମସନ ପଞ୍ଜାବ ବିପକ୍ଷରେ ଏକ ଶତକ ହାସଲ କରିଥିଲେ। ସେ ହେଉଛନ୍ତି ଆଇପିଏଲରେ ଶତକ ହାସଲ କରିଥିବା ତୃତୀୟ ଯୁବ ବ୍ୟାଟ୍ସମ୍ୟାନ, କିନ୍ତୁ ଟାର୍ଗେଟକୁ ପିଛା କରିବା ବେଳେ ସେ ଏହା କରିବାରେ ସବୁଠାରୁ କନିଷ୍ଠ। କେବଳ ଏତିକି ନୁହେଁ, ସେ ଅନ୍ତର୍ଜାତୀୟ ଡେବ୍ୟୁ ପୂର୍ବରୁ ଆଇପିଏଲରେ ଶତକ ହାସଲ କରିଥିବା ଚତୁର୍ଥ ବ୍ୟାଟ୍ସମ୍ୟାନ ମଧ୍ୟ ହୋଇଥିଲେ।
ଦେବଦତ୍ତ ପଡିକାଲ୍ ରାଜସ୍ଥାନ ବିପକ୍ଷରେ ବିରାଟ କୋହଲିଙ୍କ ସହ ଅପରାଜିତ ୧୮୧ ରନ ଭାଗିଦାରୀ ବାଣ୍ଟିଥିଲେ। ଟୁର୍ନାମେଣ୍ଟ ଆରମ୍ଭ ହେବା ପୂର୍ବରୁ ପଡିକାଲ୍ କରୋନା ପଜିଟିଭ ଚିହ୍ନଟ ହୋିଥିଲେ। ଏହି କାରଣରୁ ସେ ବିଳମ୍ବରେ ଦଳରେ ଯୋଗ ଦେଇଥିଲେ ଏବଂ ପ୍ରଥମ ମ୍ୟାଚ ଖେଳିପାରି ନ ଥିଲେ। ବାମହାତୀ ବ୍ୟାଟ୍ସମ୍ୟାନ ଦେବଦତ୍ତ ପଡିକାଲ୍ଙ୍କ ଏହା ହେଉଛି ଦ୍ୱିତୀୟ ସିଜନ। ତାଙ୍କର ପ୍ରଥମ ସିଜନରେ ସେ ୟୁଏଇରେ ୪୭୩ ରନ ସ୍କୋର କରି ୫ଟି ଅର୍ଦ୍ଧଶତକ ସ୍କୋର କରିଥିଲେ। ଆଇପିଏଲ ରେକର୍ଡଗୁଡିକ ବିଷୟରେ କହିବାକୁ ଗଲେ ଦେବଦତ୍ତ ପଡିକାଲ ଶତକ ହାସଲ କରିଥିବା ୩୭ତମ ଖେଳାଳ। ଏପର୍ଯ୍ୟନ୍ତ ୧୮ ଜଣ ଭାରତୀୟ ଏବଂ ୧୯ ଜଣ ବିଦେଶୀ ଖେଳାଳି ଶତକ ହାସଲ କରିଛନ୍ତି।
