ଧାମନଗର,୪।୧୨(ସନ୍ତୋଷ କୁମାର ମହାପାତ୍ର): ଗତ ସାଧାରଣ ନିର୍ବାଚନ ପରଠାରୁ ଧାମନଗର ଏନ୍ଏସିରେ ଦିନକୁ ଦିନ ବିପର୍ଯ୍ୟସ୍ତ ଅବସ୍ଥା ଦେଖିବାକୁ ମିଳୁଛି। ବହୁ କୋଟି ଟଙ୍କା ମହଜୁଦ ଥାଇ ମଧ୍ୟ କାର୍ଯ୍ୟ ହେଉ ନ ଥିବାରୁ ଅସନ୍ତୋଷ ପ୍ରକାଶ ପାଇଛି। ଅଧ୍ୟକ୍ଷା ଓ କାର୍ଯ୍ୟନିର୍ବାହୀ ଅଧିକାରୀଙ୍କ ମଧ୍ୟରେ ବିବାଦ ଯୋଗୁ ଏନ୍ଏସିରେ ବିକାଶ ହୋଇପାରୁ ନାହିଁ ବୋଲି ଅଭିଯୋଗ ହେଉଛି।
ବିଜେଡି ଅଧ୍ୟକ୍ଷା ନିବେଦିତା ଜେନାଙ୍କ ସହ ୯ଜଣ କାଉନସିଲର ଥିବା ବେଳେ ଭାଜପାର ମାତ୍ର ୨ଜଣ କାଉନସିଲର ଅଛନ୍ତି। ବାତ୍ୟା ‘ଦାନା’ ସମୟରେ ଖାଦ୍ୟ ବଣ୍ଟନକୁ ନେଇ ଅଧ୍ୟକ୍ଷା ଜେନା ଓ କାର୍ଯ୍ୟନିର୍ବାହୀ ଅଧିକାରୀ ସନ୍ତୋଷ କୁମାର ନାୟକଙ୍କ ମଧ୍ୟରେ ବିବାଦ ଥାନା ପର୍ଯ୍ୟନ୍ତ ଯାଇଥିଲା। ଉଭୟଙ୍କ ମଧ୍ୟରେ ତିକ୍ତତା ଥିବାରୁ ଉନ୍ନୟନ କାର୍ଯ୍ୟରେ ବାଧା ସୃଷ୍ଟି ହେଉଛି। ଏନ୍ଏସି ଅଧୀନରେ ୫ କୋଟି ଟଙ୍କା ବ୍ୟୟ ଅଟକଳରେ ନିର୍ମାଣ ହେବାକୁ ଥିବା ସଂସ୍କୃତି ଭବନ ଏବଂ ୭ କୋଟି ଟଙ୍କା ବ୍ୟୟରେ ସ୍ମାର୍ଟ ପାର୍କ ପ୍ରକଳ୍ପ ଟେଣ୍ଡର ସରିଥିଲେ ମଧ୍ୟ କାର୍ଯ୍ୟନିର୍ବାହୀ ଅଧିକାରୀ କାର୍ଯ୍ୟାଦେଶ ନ ଦେବା ଦ୍ୱାରା କାର୍ଯ୍ୟ ହୋଇପାରୁନି ବୋଲି ଅଧ୍ୟକ୍ଷା ଜେନା କହିଛନ୍ତି। ସେହିପରି ପୋଲିସ ହାଉସିଂ ବୋର୍ଡ ପକ୍ଷରୁ ଏନ୍ଏସି କାର୍ଯ୍ୟାଳୟର ନୂତନ ବିଲ୍ଡିଂ ନିର୍ମାଣ ପାଇଁ ପ୍ରାୟ ୭ କୋଟି ଅନୁଦାନ ଆସିଥିଲେ ମଧ୍ୟ ଉକ୍ତ ପ୍ରକଳ୍ପକୁ ଟେଣ୍ଡର କରୁନାହାନ୍ତି। ଗୋଶାଳା ନିର୍ମାଣ ନିମନ୍ତେ ୫ କୋଟି ଟଙ୍କାର ପ୍ରକଳ୍ପକୁ ଏଷ୍ଟିମେଟ ଉପରିସ୍ଥ ଅଧିକାରୀଙ୍କ ନିକଟକୁ ପଠାଯାଇଛି। ଆହୁରି ମଧ୍ୟ ଏନ୍ଏସିରେ ପ୍ରାୟ ୩ କୋଟି ଟଙ୍କା ଅଦ୍ୟାବଧି କାମ ନ ହୋଇ ରହିଛି। କାର୍ଯ୍ୟନିର୍ବାହୀ ଅଧିକାରୀଙ୍କ ଅନିଚ୍ଛା ସତ୍ତ୍ୱେ କୌଣସି କାମର ଟେଣ୍ଡର ହୋଇପାରୁ ନାହିଁ। କମ୍ ମୂଲ୍ୟର ଅଟକଳ କରି କଂକ୍ରିଟ ରାସ୍ତାରେ ଡଷ୍ଟ ପକାଇବା ଆଦି ମନଇଛା କାର୍ଯ୍ୟ କରାଯାଉଛି ବୋଲି ସାଧାରଣରେ ଅଭିଯୋଗ ହେଉଛି।
ଏନ୍ଏସି କାର୍ଯ୍ୟନିର୍ବାହୀ ଅଧିକାରୀ ନାୟକ କହିଛନ୍ତି, ସମସ୍ତ ଅଭିଯୋଗ ଭିତ୍ତିହୀନ ଏବଂ ଏହାର କୌଣସି ସତ୍ୟତା ନାହିଁ। ସମସ୍ତ ପ୍ରକଳ୍ପର ଡିପିଆର୍ (ଏଷ୍ଟିମେଟ୍) ପାଇଁ ଉପରିସ୍ଥ ଅଧିକାରୀଙ୍କ ନିକଟକୁ ପଠାଯାଇଛି। ଟେଣ୍ଡର ନ କରି କୌଣସି କାର୍ଯ୍ୟକାରୀ କରାଯାଉନି। ଅଧ୍ୟକ୍ଷା ବୈଠକ ଡାକୁ ନାହାନ୍ତି। ବୈଠକ ହେଲେ ବିଭିନ୍ନ ବିଷୟରେ ଆଲୋଚନା ହୋଇ ସର୍ବସମ୍ମତିକ୍ରମେ ପ୍ରକଳ୍ପ ଚୟନ କରି ଟେଣ୍ଡର ହୋଇ କାର୍ଯ୍ୟକାରୀ ହୁଅନ୍ତା। ତାଙ୍କୁ ବୈଠକ ଡାକିବାକୁ ପ୍ରସ୍ତାବ ଦେଇଥିଲେ ହେଁ ସେ ସହମତି ହେଉନାହାନ୍ତି ବୋଲି କାର୍ଯ୍ୟନିର୍ବାହୀ ଅଧିକାରୀ କହିଛନ୍ତି। ଫଳରେ ଅନେକ ପ୍ରକଳ୍ପ କାମ ନ ହୋଇ ପଡ଼ିରହିଛି।
‘ଦାନା’ରେ କ୍ଷୟକ୍ଷତିର ପୁନରୁଦ୍ଧାର ନିମିତ୍ତ ରାଜ୍ୟ ସରକାର ଧାମନଗର ପଞ୍ଚାୟତ ସମିତିକୁ ପ୍ରାୟ ୨୦କୋଟି ଟଙ୍କା ଅନୁଦାନ ପ୍ରଦାନ କରିଥିବା ବେଳେ ଏନ୍ଏସିକୁ ଟଙ୍କାଟିଏ ଦିଆଯାଇ ନ ଥିବା ଜଣାପଡ଼ିଛି। ଏନ୍ଏସି ଅଧୀନ ୧୧ ୱାର୍ଡରେ ବାତ୍ୟାରେ ବ୍ୟାପକ କ୍ଷତି ହୋଇଥିବା ନେଇ ରିପୋର୍ଟ ଦିଆଯାଇଥିବା ବେଳେ ସରକାରୀ ଆର୍ଥିକ ସହାୟତା ଯୋଗାଇ ଦିଆ ନ ଯିବାରୁ ବିଭିନ୍ନ ୱାର୍ଡ କାଉନସିଲରଙ୍କ ସହ ସ୍ଥାନୀୟ ଜନସାଧାରଣଙ୍କ ମଧ୍ୟରେ ଅସନ୍ତୋଷ ଦେଖାଯାଇଛି।