ଦିଗପହଣ୍ଡି,୮ା୧୦(ଡି.ଏନ.ଏ.): ଗ୍ରାମାଞ୍ଚଳର ବିକାଶ ପାଇଁ କେନ୍ଦ୍ର ଓ ରାଜ୍ୟ ସରକାର ବିଭିନ୍ନ ଯୋଜନା ପ୍ରଣୟନ କରିଛନ୍ତି। କିନ୍ତୁ ସେହି ସବୁ ଯୋଜନାର ସୁଫଳ ଲୋକଙ୍କ ନିକଟରେ ପହଞ୍ଚି ପାରୁନାହିଁ। ଦିଗପହଣ୍ଡି ବ୍ଲକ ବଡ଼ଡମ୍ବୁଳା ପଞ୍ଚାୟତ ଅଧୀନ ଛଣବଗଡ଼ ଏବଂ ତଡ଼ା ଏହାର ଏକ ଉଦାହରଣ ମାତ୍ର। ଭାଜପାର ପୂର୍ବତନ ରାଜ୍ୟ ସମ୍ପାଦକ ଶ୍ରୀକାନ୍ତ ପାଢ଼ୀ ଶୁକ୍ରବାର ଏହି ୨ ଗାଁରେ ପହଞ୍ଚିବା ପରେ ତାଙ୍କୁ ଗ୍ରାମବାସୀଙ୍କ ପକ୍ଷରୁ ବିପୁଳ ସମ୍ବର୍ଦ୍ଧନା ଦିଆଯାଇଥିଲା। ସେ ଏହି ୨ ଗ୍ରାମକୁ ଗସ୍ତ କରି ସ୍ଥିତି ଅନୁଧ୍ୟାନ କରି ଫେରିଛନ୍ତି। ସେ କହିବା ପ୍ରକାରେ ଉଭୟ ଗାଁରେ ୫୬ ପରିବାର ବସବାସ କରୁଥିବା ବେଳେ ଏହି ୨ ଗାଁର ଲୋକମାନେ ବିକାଶ କ’ଣ ଜାଣନ୍ତି ନାହିଁ। ଗ୍ରାମ୍ୟ ସଡ଼କ ନିର୍ମାଣ ଯୋଜନାରେ କୋଟି କୋଟି ଟଙ୍କା ଖର୍ଚ୍ଚ କରାଯାଉଥିବା ବେଳେ ଏହି ୨ ଗାଁକୁ ପକ୍କା ରାସ୍ତାଟିଏ ନାହିଁ। ଗ୍ରାମକୁ ଯିବାକୁ ହେଲେ କହ୍ନେଇ ନାଳ ଡ୍ୟାମର ହିଡ ଦେଇ ପାହାଡିଆ ଘାଟିରେ ରହିଛି ୨ ଚଲାପଥ। ଗାଁର ଚତୁର୍ଦ୍ଦିଗକୁ ଘେରି ରହିଛି କେରାଣ୍ଡି ମାଳ ପାହାଡ଼। ବର୍ଷା ଦିନେ ପାହାଡି ଝରଣା ଜଳରେ ୨ ଗ୍ରାମକୁ ଜଳବନ୍ଦୀ କରିଥାଏ। ଦିଗପହଣ୍ଡି ସଦର ମହକୁମାଠାରୁ ପ୍ରାୟ ୧୩ କିମି ଦୂରରେ ଅବସ୍ଥିତ ଏହି ୨ ଗାଁ। ସ୍ବାସ୍ଥ୍ୟକେନ୍ଦ୍ରଠାରୁ ପ୍ରାୟ ୮ କିମି ଦୂରରେ ଅବସ୍ଥିତ ଏହି ଗ୍ରାମରେ ବହୁ ଶିଶୁ ପୁଷ୍ଟିହୀନତାର ଶିକାର ହେଉଥିବା ବେଳେ ଗର୍ଭବତୀମାନଙ୍କ ଅବସ୍ଥା ମଧ୍ୟ ଦୟନୀୟ। ରାସ୍ତା ନଥିବାରୁ ଏଠାକୁ ସ୍ବାସ୍ଥ୍ୟ ମିଶନର ଜନନୀ ଏକ୍ସପ୍ରେସ ପହଞ୍ଚିପାରେ ନାହିଁ। ରାସ୍ତା ନଥିବାରୁ ରୋଗୀ ଓ ଗର୍ଭବତୀଙ୍କୁ ପାହାଡିଆ ଘାଟି ରାସ୍ତା ପାର କରି ସ୍ବାସ୍ଥ୍ୟକେନ୍ଦ୍ରକୁ ପହଞ୍ଚାଇବାକୁ ହୁଏ।
ଗ୍ରାମବାସୀଙ୍କ ପାଇଁ ପାହାଡି ଝରଣା ହିଁ ଏକମାତ୍ର ଉତ୍ସ। ଜନଜାତି ବର୍ଗର ଲୋକେ ଦୂଷିତ ଜଳ ପାନ କରି ଝାଡ଼ାବାନ୍ତି ଓ ଅନ୍ୟ ସଂକ୍ରାମକ ରୋଗରେ ପ୍ରାଣ ହରାଇଥିବା ନଜିର ରହିଛି। ସମସ୍ତଙ୍କ ପାଇଁ ଶିକ୍ଷା ଯୋଜନା ଏଠାରେ ନିରର୍ଥକ। ୬ରୁ ୧୪ ବର୍ଷର ପ୍ରାୟ ୪୫ରୁ ଅଧିକ ପିଲା ପାଠ ପଢାରୁ ବଞ୍ଚିତ। ଶିକ୍ଷାର ଆଲୋକ ପାଇନଥିବା ପିଲାମାନେ ବହି ସିଲଟ ଧରିବା ବୟସରେ ଗାଁ ନିକଟ ଜଙ୍ଗଲରୁ କାଠ ସଂଗ୍ରହ କରନ୍ତି। ଜୀବନ ଜୀବିକା ସହ ସଂଗ୍ରାମ କରୁଥିବା ଗାଁର ଗରିବ ଲୋକମାନେ ମହାତ୍ମା ଗାନ୍ଧୀ ଜାତୀୟ ଗ୍ରାମୀଣ ନିଶ୍ଚିତ କର୍ମ ନିଯୁକ୍ତି ଯୋଜନାରୁ ଆଶାଜନକ ସୁଫଳ ପାଇ ପାରୁନାହାନ୍ତି। ଏହି ଯୋଜନା କ’ଣ ସେମାନେ ଜାଣନ୍ତି ନାହିଁ। ଫଳରେ କାମଧନ୍ଦା ନପାଇ ଅନେକ ଯୁବକ ଦାଦନ ଖଟିବାକୁ ବାହାର ରାଜ୍ୟକୁ ଚାଲି ଯାଉଛନ୍ତି। ଗମନାଗମନ, ସ୍ବାସ୍ଥ୍ୟ, ଶିକ୍ଷା ଆଦି ବିଭିନ୍ନ ସରକାରୀ ଯୋଜନାରୁ ବଞ୍ଚିତ ୨ଟି ଗ୍ରାମର ଅଧିବାସୀ ଏବେବି ଆଶା ରଖିଛନ୍ତି ସରକାର ଓ ଜିଲା ପ୍ରଶାସନ ଦିନେ ନା ଦିନେ ତାଙ୍କ ଗାଁ ଉପରେ ସୁଦୃଷ୍ଟି ପକାଇବେ। ଜିଲା ପ୍ରଶାସନ ଏ ଦିଗରେ ଦୃଷ୍ଟି ଦେଇ ଏହି ୨ ଗ୍ରାମର ଲୋକଙ୍କୁ ସରକାରଙ୍କ ସର୍ବନିମ୍ନ ମୌଳିକ ସୁବିଧା ସୁଯୋଗ ଯୋଗାଇ ଦେବା ସହିତ ସମାଜର ମୁଖ୍ୟ ସ୍ରୋତରେ ଏମାନଙ୍କୁ ସାମିଲ କରିବାକୁ ଭାଜପାର ପୂର୍ବତନ ରାଜ୍ୟ ସମ୍ପାଦକ ଦାବି କରିଛନ୍ତି। ସ୍ଥାନୀୟ ପ୍ରଶାସନ ଏଥିପ୍ରତି ଦୃଷ୍ଟି ନ ଦେଲେ ଗ୍ରାମବାସୀଙ୍କ ସହାୟତାରେ ଆନ୍ଦୋଳନ କରାଯିବ ବୋଲି ସେ ଚେତାବନୀ ଦେଇଛନ୍ତି।