ବିଶ୍ୱ ଶକ୍ତି ସଂରକ୍ଷଣ ଦିବସ ପ୍ରତିବର୍ଷ ୧୪ ଡିସେମ୍ବରରେ ବିଶ୍ୱବ୍ୟାପୀ ପାଳନ କରାଯାଇଥାଏ। ଆମର ଦୈନନ୍ଦିନ ଜୀବନରେ ଶକ୍ତି ବ୍ୟବହାର, ସଂରକ୍ଷଣ, ଅଭାବ ଓ ବିଶ୍ୱର ଇକୋସିଷ୍ଟମର ସ୍ଥାୟିତ୍ୱ ଉପରେ ଏହାର ପ୍ରଭାବକୁ ଦର୍ଶାଇବା ପାଇଁ ବିଶ୍ୱବ୍ୟାପୀ ଏହି ଦିବସ ପାଳନ କରାଯାଏ ।
ଶକ୍ତି ଉପରେ ମାନବଜାତିର ଭବିଷ୍ୟତ ସାମ୍ନା କରୁଥିବା ଗୁରୁତ୍ୱପୂର୍ଣ୍ଣ ପ୍ରସଙ୍ଗଗୁଡ଼ିକ ଉପରେ ଏହା ଆମର ଧ୍ୟାନକୁ କେନ୍ଦ୍ରିତ କରିଥାଏ। ଏହି ଦିନ ଏହା ସହିତ ଜଡିତ ବିଷୟଗୁଡ଼ିକ ଉପରେ ଏକ ସଚେତନତା ସୃଷ୍ଟି କରିବା ଉଦ୍ଦେଶ୍ୟରେ ଏହି ଦିବସ ପାଳନ କରାଯାଇଥାଏ। ଏହି ଅବସରରେ ପବନ, ସୌର, ଜୁଆର ଆଦି ବିକଳ୍ପ ତଥା ଅକ୍ଷୟ ସବୁଜ ଶକ୍ତିର ବ୍ୟବହାର ଉପରେ ଗୁରୁତ୍ୱାରୋପ କରାଯାଇଥାଏ। ସବୁଜ ଶକ୍ତିର ବ୍ୟବହାର ଦ୍ୱାରା କିପରି ବିଭିନ୍ନ ପ୍ରଦୂଷଣକୁ ରୋକା ଯାଇପାରିବ ସେ ନେଇ ବିଭିନ୍ନ କାର୍ଯ୍ୟକ୍ରମମାନ ଆୟୋଜିତ ହୋଇଥାଏ।
ଶକ୍ତି ବ୍ୟବହାର ହେଉଛି ବିଶ୍ୱରେ ବୃଦ୍ଧି ପାଉଥିବା ତାପମାତ୍ରାର ଏକ ପ୍ରମୁଖ କାରଣ; ଯାହାର ପ୍ରଭାବରେ ଜଳବାୟୁ ପରିବର୍ତ୍ତନ ହେବାରେ ଲାଗିଛି। ଯେହେତୁ ଆମେ ସମସ୍ତେ ବିପଦପୂର୍ଣ୍ଣ ତଥ୍ୟ ବିଷୟରେ ଜାଣିଛୁ ଯେ ସମସ୍ତ ପାରମ୍ପରିକ ଶକ୍ତିର ଉତ୍ସ ଶୀଘ୍ର ହ୍ରାସ ପାଉଛି। ପ୍ରତ୍ୟେକ ଦିନ ସମଗ୍ର ବିଶ୍ୱରେ ମାନବ ଜନସଂଖ୍ୟା ସଭ୍ୟ ଜୀବନଯାପନ ପାଇଁ ଶକ୍ତିର ବହୁବିଧ ବ୍ୟବହାର କରିଥାନ୍ତି ।
ଏହି ଉତ୍ସଗୁଡ଼ିକ ହେଉଛି ମାନବ ବିକାଶର ଗୁରୁତ୍ୱପୂର୍ଣ୍ଣ ଅଂଶବିଶେଷ; ଯାହା ପର୍ଯ୍ୟାପ୍ତ ଖାଦ୍ୟ, ଆଶ୍ରୟ, ପୋଷାକ, ଜଳ, ପରିମଳ, ଔଷଧ, ବିଦ୍ୟାଳୟ, ପରିବହନ,ଔଦ୍ୟୋଗିକ ପ୍ରୟୋଗ, ସୂଚନା ବିକାଶ ଆଦିକୁ ଅନ୍ତର୍ଭୁକ୍ତ କରିଥାଏ ଏବଂ ଆଧୁନିକ ଜୀବନଯାପନ ପ୍ରଣାଳୀକୁ ପ୍ରୋତ୍ସାହିତ କରିଥାଏ।
ଶକ୍ତି ବ୍ୟବହାରକୁ ପ୍ରାୟତଃ ବିକାଶର ଏକ ଗୁରୁତ୍ୱପୂର୍ଣ୍ଣ ସୂଚକ ଭାବରେ ବିବେଚନା କରାଯାଏ। ଲୋକ ଏବଂ ଦେଶର ଅଗ୍ରଗତି ସହିତ ଶକ୍ତି ବ୍ୟବହାର ବୃଦ୍ଧି ପାଇବାରେ ଲାଗିଥାଏ।
ବାଣିଜି୍ୟକ ଶକ୍ତିର ଏହି ଉତ୍ସଗୁଡ଼ିକ କେବଳ ସୀମିତ ପରିମାଣରେ ଉପଲବ୍ଧ। ଉତ୍ପାଦନ ଅନୁପାତରେ ବର୍ତ୍ତମାନର ଗଚ୍ଛିତ ଥିବା ତୈଳ ପ୍ରାୟ ୪୫ ବର୍ଷ, ଗ୍ୟାସ ପ୍ରାୟ ୬୫ ବର୍ଷ, କୋଇଲା ପ୍ରାୟ ୨୦୦ ବର୍ଷ ପରେ ଶେଷ ହୋଇଯିବ ବୋଲି ଆକଳନ କରାଯାଇଛି।