ଖ୍ରୀଷ୍ଟଚର୍ଚ୍ଚ,୯।୧: ନ୍ୟୁଜିଲାଣ୍ଡ ବ୍ୟାଟର ଡେଭନ କନଓ୍ବେ ରବିବାର ଏଭଳି ଏକ ରେକର୍ଡ ନିଜ ନାମରେ କରିଛନ୍ତି, ଯାହାକୁ କ୍ରିକେଟ ଇତିହାସରେ କୌଣସି ଖେଳାଳି ହାସଲ କରିପାରି ନ ଥିଲେ। ସେ ବିଶ୍ୱର ପ୍ରଥମ କ୍ରିକେଟର ଭାବେ କ୍ୟାରିୟରର ପ୍ରଥମ ୫ ଟେଷ୍ଟର ପ୍ରଥମ ଇନିଂସରେ ୫୦ରୁ ଊର୍ଦ୍ଧ୍ୱ ରନ୍ କରିଛନ୍ତି। ଖ୍ରୀଷ୍ଟଚର୍ଚ୍ଚଠାରେ ଚାଲିଥିବା ବାଂଲାଦେଶ ବିପକ୍ଷ ଦ୍ୱିତୀୟ ଟେଷ୍ଟରେ ଅପରାଜିତ ୯୯ ରନ୍ର ପାଳି ଅବସରରେ ଏହି ରେକର୍ଡ ନିଜ ନାମରେ କରିଛନ୍ତି ଦକ୍ଷିଣ ଆଫ୍ରିକାରେ ଜନ୍ମିତ କନଓ୍ବେ।
ଗତ ବର୍ଷ ଇଂଲଣ୍ଡ ବିପକ୍ଷ ଦୁଇ ମ୍ୟାଚ୍ ବିଶିଷ୍ଟ ଟେଷ୍ଟ ସିରିଜ୍ରେ ପଦାର୍ପଣ କରିଥିବା ବାମହାତୀ ବ୍ୟାଟର ଲଡର୍ସଠାରେ ପର୍ଦାପଣ ମ୍ୟାଚ୍ରେ ଦ୍ୱିଶତକ ଲଗାଇଥିଲେ। ଏଜ୍ବାଷ୍ଟନରେ ଅନୁଷ୍ଠିତ ଦ୍ୱିତୀୟ ଟେଷ୍ଟରେ ସେ ଖେଳିଥିଲେ ୮୦ ରନ୍ର ଇନିଂସ। ଏହାପରେ ଭାରତ ବିପକ୍ଷ ବିଶ୍ୱ ଟେଷ୍ଟ ଚାମ୍ପିୟନଶିପ୍ (ଡବ୍ଲ୍ୟୁଟିସି) ଫାଇନାଲରେ ୫୪ ରନ୍ କରିଥିଲେ। ଗତ ସପ୍ତାହରେ ବାଂଲାଦେଶ ବିପକ୍ଷ ପ୍ରଥମ ଟେଷ୍ଟର ପ୍ରଥମ ପାଳିରେ କନଓ୍ବେ ଖେଳିଥିଲେ ୧୨୨ ରନ୍ର ଶତକୀୟ ପାଳି।
ଚଳିତ ଦ୍ୱିତୀୟ ଟେଷ୍ଟରେ ଏପର୍ଯ୍ୟନ୍ତ ନଟ୍ଆଉଟ୍ ଥିବା ୩୦ ବର୍ଷୀୟ ବ୍ୟାଟର ୧୪୮ ବଲର ସମ୍ମୁଖୀନ ହୋଇ ୯୯ ରନ୍ କରିଛନ୍ତି। ତାଙ୍କ ପାଳିରେ ୧୦ ଚୌକା ଓ ଏକ ଛକା ସାମିଲ ରହିଛି।
