ଭୁବନେଶ୍ୱର,୧୮।୯(ବ୍ୟୁରୋ): ରବିବାର ପଡୁଛି ପ୍ରବିତ୍ର ଅନନ୍ତ ଚତୁର୍ଦ୍ଦଶୀ। ଏଥିପାଇଁ ରାଜଧାନୀର ଅନନ୍ତ ବାସୁଦେବ ମନ୍ଦିରରେ ପ୍ରତିବର୍ଷ ପ୍ରବଳ ଗହଳି ପରିଲକ୍ଷିତ ହୋଇଥାଏ। ଶ୍ରଦ୍ଧାଳୁମାନେ ପୂଜା କରିବା ସହ ମନ୍ଦିର ବେଢାରେ ପ୍ରସାଦ ସେବନ କରିଥାନ୍ତି। ତେବେ କରୋନା ସଂକ୍ରମଣକୁ ଦୃଷ୍ଟିରେ ରଖି ଅନନ୍ତ ବ୍ରତରେ ଯେପରି ମନ୍ଦିରରେ ଶ୍ରଦ୍ଧାଳୁଙ୍କ ଗହଳି ନ ହୁଏ ସେ ନେଇ ବିଏମ୍ସି ପକ୍ଷରୁ ଗାଇଡ୍ ଲାଇନ୍ ଜାରି କରିଛି। ମନ୍ଦିରରେ ସାଧାରଣ ଦର୍ଶନ ସହିତ ମହାପ୍ରସାଦ ସେବନ ଉପରେ ପ୍ରତିବନ୍ଧକ ଲଗାଯାଇଛି। କେବଳ ବିଧି ପାଳନ ପୂର୍ବକ ପୂଜା ବ୍ୟତୀତ ମନ୍ଦିରରେ ଯେପରି ଅନ୍ୟ କୌଣସି ଉତ୍ସବ ନ ହୁଏ ସେଥିପାଇଁ କଟକଣା ଲଗାଯାଇଛି। ସେବାୟତଙ୍କ ଦ୍ୱାରା ଯଥାରୀତି ପୂଜା କରାଯିବ। ତେବେ ପୂଜାରେ ସମ୍ପୃକ୍ତ ଥିବା ସେବାୟତମାନେ ଯେପରି ଦ୍ୱିତୀୟ ଡୋଜ୍ ଟିକା ନେଇଥିବେ ଓ ସାମାଜିକ ଦୂରତା ଓ ମାସ୍କ ପରିଧାନ କରିବେ, ହାତ ସାନିଟାଇଜ୍ କରିବା ସହ କରୋନା ଗାଇଡ୍ଲାଇନ୍କୁ ପାଳନ କରିବେ ତାହା ଉପରେ ମନ୍ଦିର କର୍ତ୍ତୃପକ୍ଷ ଦୃଷ୍ଟି ଦେବାକୁ ବିଏମ୍ସି ପକ୍ଷରୁ କୁହାଯାଇଛି।