କେନ୍ଦୁଝର,୨।୧(ସ୍ବ.ପ୍ର.)-ପ୍ରତ୍ୟେକ ବର୍ଷ ଆରମ୍ଭରେ ମା’ ତାରିଣୀ ପୀଠରେ ଭକ୍ତଙ୍କ ଭିଡ଼ ଜମେ। ଦୂରଦୂରାନ୍ତରୁ ଭକ୍ତମାନେ ଆସି ମା’ଙ୍କୁ ଦର୍ଶନ କରିବା ସହ ପୂଜାର୍ଚ୍ଚନା କରି ନବବର୍ଷ କିପରି ଭଲରେ କଟିବ ଓ ସମସ୍ତଙ୍କର ମଙ୍ଗଳ ହେବ ସେ ଆଶିଷ ନେଇ ଫେରିଥାନ୍ତି। ଚଳିତବର୍ଷ କୋଭିଡ୍ କଟକଣା ପାଇଁ ମନ୍ଦିର ବନ୍ଦ ରହିଥିଲା। ତେବେ ମନ୍ଦିର ପ୍ରଶାସନ ପକ୍ଷରୁ ଭକ୍ତଙ୍କ ଲାଗି ଅନ୍ଲାଇନ ଦର୍ଶନ ବ୍ୟବସ୍ଥା କରାଯାଇଥିଲା। ବହୁ ଆଶାରେ ଆସିଥିବା ଭକ୍ତମାନେ ମୁଖଶାଳା ନିକଟରେ ମା’ଙ୍କୁ ଅନଲାଇନରେ ଏବଂ ସୋସିଆଲ ମିଡିଆରେ ଲାଇଭ ଦର୍ଶନ କରିଛନ୍ତି। ଏଥିପାଇଁ ମନ୍ଦିର ପ୍ରଶାସନ ପକ୍ଷରୁ ୧୨ ଫୁଟରେ ୮ ଫୁଟର ଏଲ୍ଇଡି ଲଗାଇବା ସହ ସୋସିଆଲ ମିଡିଆରେ ଦର୍ଶନ ବ୍ୟବସ୍ଥା କରାଯାଇଥିଲା ବୋଲି ମା’ ତାରିଣୀ ଟ୍ରଷ୍ଟର ସଭାପତି ରାଜେନ୍ଦ୍ର ପଟ୍ଟନାୟକ କହିଛନ୍ତି।
ମା’ ଙ୍କ ପାଖରେ ପାରମ୍ପାରିକ ପୂଜାନୀତି ଅନୁଷ୍ଠିତ ହୋଇଥିଲା। କେବଳ ପୂଜକମାନଙ୍କୁ ଅନୁମତି ମିଳିଥିଲା। ଭକ୍ତମାନେ ସକାଳ ଆଳତିର ଲାଇଭ୍ ଦର୍ଶନ କରିବା ସହ ପୂଜାର୍ଚ୍ଚନା ଏଲ୍ଇଡି ସ୍କ୍ରିନରେ ଦେଖିବାର ସୁଯୋଗ ପାଇଥିଲେ। ୯ ମାସ ପରେ ଭକ୍ତମାନେ ମା’ଙ୍କ ଦର୍ଶନ କରିବାକୁ ସୁଯୋଗ ପାଇ ଖୁସି ବ୍ୟକ୍ତ କରିଥିଲେ। ରାଜ୍ୟର ଅନେକ ସ୍ଥାନରେ କୋଭିଡ୍ କଟକଣା ମଧ୍ୟରେ ମନ୍ଦିର ଖୋଲିବାକୁ ଅନୁମତି ଦିଆଯାଇଥିବା ବେଳେ ତାରିଣୀ ମନ୍ଦିରରେ ଅନୁମତି ନ ମିଳିବା ନେଇ ଅନେକେ ଦୁଃଖ ପ୍ରକାଶ କରିଛନ୍ତି। ଏ ସମ୍ପର୍କରେ ଜିଲାପାଳ ଆଶିଷ ଠାକରେ କହିଛନ୍ତି ଯେ, ଏହି ମନ୍ଦିରର ମରାମତି କାମ ଚାଲିଛି। ଏଣୁ ମନ୍ଦିର ଖୋଲିବା ଓ ମା’ଙ୍କ ଦର୍ଶନ ପାଇଁ କାୈଣସି ନିଷ୍ପତ୍ତି ହୋଇନାହିଁ। କୋଭିଡ୍ ଆଇନ ଅନୁସାରେ ସମସ୍ତ ବ୍ୟବସ୍ଥା ମନ୍ଦିର ପ୍ରଶାସନ ପକ୍ଷରୁ କରାଯିବା ପରେ ଖୋଲିବା ପାଇଁ ନିଷ୍ପତ୍ତି ନିଆଯିବ।