ଭୁବନେଶ୍ୱର,୨।୩(ବ୍ୟୁରୋ):ମହାଶିବରାତ୍ରିରେ ଶ୍ରୀଲିଙ୍ଗରାଜ ମନ୍ଦିରକୁ ଯାଇ ମହାପ୍ରଭୁଙ୍କୁ ଦର୍ଶନ କରିପାରିବେ ଭକ୍ତ। ଏ ନେଇ ସୋମବାର ଭୁବନେଶ୍ୱର ଉନ୍ନୟନ କର୍ତ୍ତୃପକ୍ଷ କାର୍ଯ୍ୟାଳୟରେ ଅନୁଷ୍ଠିତ ବୈଠକରେ ବିଏମ୍ସି କମିଶନର ପ୍ରେମଚନ୍ଦ୍ର ଚୌଧାରୀ ଏହି ସୂଚନା ଦେଇଛନ୍ତି। ବୈଠକରେ ଲିଙ୍ଗରାଜ ଦେବଙ୍କ ବିଭିନ୍ନ ସେବାୟତ ଓ ନିଯୋଗ ବୃନ୍ଦ, ବିଏମ୍ସିର ପଦାଧିକାରୀ ଓ ଜିଲା ପ୍ରଶାସନ ଅଧିକାରୀମାନେ ଯୋଗଦେଇ ଜାଗର ଯାତ୍ରାର ପ୍ରସ୍ତୁତି, ମନ୍ଦିରକୁ ଭକ୍ତଙ୍କ ଯିବାର ଅନୁମତି ପ୍ରକ୍ରିୟା ନେଇ ଆଲୋଚନା ହୋଇଛି। କୋଭିଡ ନିୟମ ମାନି ଭକ୍ତମାନେ ମନ୍ଦିର ଭିତରକୁ ଯିବେ। ସେହିଭଳି କେବଳ ଆଡ଼କାଠ ପର୍ଯ୍ୟନ୍ତ ଯାଇ ଭକ୍ତମାନେ ଠାକୁରଙ୍କୁ ଦେଖିପାରିବେ। ଅନ୍ୟପଟେ ୧୨ ବର୍ଷରୁ କମ୍ ଓ ୬୦ବର୍ଷରୁ ଊର୍ଦ୍ଧ୍ୱ ବ୍ୟକ୍ତିମାନଙ୍କୁ ମନ୍ଦିର ପ୍ରବେଶକୁ ବାରଣ କରାଯାଇଛି। ଏପରିକି ଏହି ନିୟମ ସେବାୟତଙ୍କ ପରିବାର ସଦସ୍ୟମାନଙ୍କ ପାଇଁ ମଧ୍ୟ ଲାଗୁ ରହିବ। କିନ୍ତୁ ସେବାୟତ ଭାବେ କାର୍ଯ୍ୟ କରୁଥିବା ବ୍ୟକ୍ତିଙ୍କ ପାଇଁ ଏହି ବୟସସୀମା ଲାଗୁ ହେବ ନାହିଁ।
କୋଭିଡ୍ ନିୟମକୁ କଡ଼ାକଡ଼ି କରିବା ପାଇଁ ବାହାରୁ ସାମାଜିକ ଦୂରତ୍ୱ ରକ୍ଷା କରି ଏକାଥରକେ ନିର୍ଦ୍ଦିଷ୍ଟ ସଂଖ୍ୟାର ଭକ୍ତଙ୍କୁ ପ୍ରବେଶ ପାଇଁ ବ୍ୟବସ୍ଥା କରାଯିବ। ଯିବା ପୂର୍ବରୁ ବାହାରେ ସ୍କ୍ରିନିଂ କରାଯିବା ସହ ସନ୍ଦେହ ହେଲେ ଟେଷ୍ଟିଂ କରାଯିବ। ଏଥିପାଇଁ ମନ୍ଦିର ନିକଟରେ ବିଏମ୍ସି ଓ ସ୍ବାସ୍ଥ୍ୟ ବିଭାଗ ପକ୍ଷରୁ ୨ଟି ସ୍ବତନ୍ତ୍ର କ୍ୟାମ୍ପ କରାଯିବ। ସନ୍ଦିଗ୍ଧ ଭକ୍ତଙ୍କ ଆଣ୍ଟିଜେନ ପରୀକ୍ଷା କରାଯିବ। ପଜିଟିଭ ଚିହ୍ନଟ ହେଲେ ମନ୍ଦିରକୁ ଛଡ଼ା ନ ଯାଇ ଅବସ୍ଥା ଅନୁସାରେ ପଦକ୍ଷେପ ନିଆଯିବ। ଅତ୍ୟଧିକ ଜନଗହଳି ଏବଂ ନିୟମର ଉଲ୍ଲଂଘନ କଲେ ନାଗରିକଙ୍କ ପ୍ରତି ଆବଶ୍ୟକ ପଦକ୍ଷେପ ନିଆଯିବ। ବଡୁନିଯୋଗ, ବ୍ରାହ୍ମଣ ନିଯୋଗ, ପୂଜା ପଣ୍ଡା ନିଯୋଗ ଏବଂ ସାମର୍ଥା ନିଯୋଗ ତଥା ଅନ୍ୟାନ୍ୟ ସେବାୟତଙ୍କ ତରଫରୁ ସହଯୋଗ ପାଇଁ କୁହାଯାଇଛି। ବୈଠକରେ ବଡୁନିଯୋଗର କମଳାକାନ୍ତ ବଡୁ, ସାମର୍ଥା ନିଯୋଗର ରାଜେନ୍ଦ୍ର ସାମର୍ଥା ଏବଂ ବ୍ରାହ୍ମଣ ନିଯୋଗର ବିରଞ୍ଚତ୍ ପତି ଏବଂ ପୂଜା ପଣ୍ଡା ନିଯୋଗର ଶଶିକାନ୍ତ ପୂଜା ପଣ୍ଡା ପ୍ରମୁଖ ଶୃଙ୍ଖଳାଗତ ଜାଗରଯାତ୍ରା କରିବା ପାଇଁ ଚେଷ୍ଟା ଜାରି ରହିବ ବୋଲି କହିଛନ୍ତି। ଅତିରିକ୍ତ କମିଶନର ବିଏମ୍ସି ଅବନିକାନ୍ତ ପଟ୍ଟନାୟକ, ଅତିରିକ୍ତ ଜିଲାପାଳ ଭୁବନେଶ୍ୱର ପ୍ରଫୁଲ୍ଲ ସ୍ବାଇଁ, ଉପଜିଲାପାଳ ସତ୍ୟବ୍ରତ ସାହୁ ପ୍ରମୁଖ ଉପସ୍ଥିତ ଥିଲେ। ଡେପୁଟି କମିଶନର କମଲଜିତ ଦାସ ବୈଠକ ସଂଯୋଜନା କରିଥିଲେ।