କେନ୍ଦୁଝର,୭ା୧୦(ସ୍ବ.ପ୍ର.): କେନ୍ଦୁଝର ଜିଲା ଘଟଗାଁ ତହସିଲ ଅଧୀନ ଖଣ୍ଟଘର ଗ୍ରାମରେ ଚାଲିଥିବା ବେଆଇନ କ୍ରଶର ଅଞ୍ଚଳକୁ କେନ୍ଦୁଝର ଡିଏଫ୍ଓ ଏଚ୍ଡି ଧନରାଜ ଗସ୍ତ କରି ସ୍ଥିତି ଅନୁଧ୍ୟାନ କରିଛନ୍ତି। କ୍ରଶର ପ୍ରଦୂଷଣ ନିୟନ୍ତ୍ରଣ ବୋର୍ଡ ବିନା ଅନୁମତିରେ ଏବଂ ପଥର ଖଣି ଲିଜ୍ ଅଞ୍ଚଳ ନିକଟରେ ଚାଲି ଆସୁଥିଲା। କ୍ରଶର ଦ୍ୱାରା ଉକ୍ତ ଅଞ୍ଚଳ ଦେଇ ଚଳାଚଳ କରୁଥିବା ବନ୍ୟପ୍ରାଣୀ କ୍ଷତିଗସ୍ତ ହେଉଥିଲେ। ଏଣୁ ଏହାକୁ ଆଧାର କରି କ୍ରସରକୁ ବନ୍ଦ କରିବା ପାଇଁ ଡିଏଫ୍ଓ ପଦକ୍ଷେପ ନେଇଥିଲେ। ମାତ୍ର ଆଦେଶ ଅବମାନନା କରି କ୍ରଶର ଚାଲି ଆସୁଥିଲା। ଏ ନେଇ ବନ ବିଭାଗ ବିଗତ ଦିନରେ କ୍ରଶରରୁ ବିଦ୍ୟୁତ୍ ବିଚ୍ଛିନ୍ନ ପାଇଁ ଆନନ୍ଦପୁର ଟାଟା ପାୱାର ନିର୍ବାହୀ ଯନ୍ତ୍ରୀଙ୍କୁ ଚିଠି କରିଥିଲେ। ବନ ବିଭାଗ ପକ୍ଷରୁ ନୋଟିସ୍ କରି କାମ ବନ୍ଦ କରାଯାଇଥିଲେ ହେଁ ଅଦ୍ୟାବଧି କାର୍ଯ୍ୟାନୁଷ୍ଠାନ ଗ୍ରହଣ କରାଯାଉ ନ ଥିବାରୁ ଅସନ୍ତୋଷ ପ୍ରକାଶ ପାଉଛି। ଉକ୍ତ କ୍ୱାରୀ ତିନି ମାସିଆ ଅର୍ଥାତ ସଟ୍ ଟର୍ମ ଲିଜ ଭାବରେ ରାଜସ୍ବ ବିଭାଗ ଦେଇଥିବା ଜଣାପଡ଼ିଛି। ତେବେ ଓ୍ବାଇ ଫର୍ମରେ ପଥର ଉତ୍ତୋଳନ ହୋଇ ଉକ୍ତ ବେଆଇନ କ୍ରଶରରେ ସାଇଜ କରାଯାଉଥିଲା କି ନାହିଁ ତାହା ତଦନ୍ତ ଦାବି ହେଉଛି। ଅନୁମତି ନ ଥାଇ କ୍ରଶର ଓ ଏକ ପିଚୁ କାରଖାନା ଉକ୍ତ ଲିଜ୍ ଅଞ୍ଚଳରେ ଚାଲିଥିବା ବନ ବିଭାଗ ଯାଞ୍ଚ ବେଳେ ଜାଣିବାକୁ ପାଇଛି। ଏଥିରେ କେତେକ ଦୁର୍ନୀତିଗ୍ରସ୍ତ ରାଜସ୍ବ ଓ ଅନ୍ୟାନ୍ୟ ବିଭାଗ କର୍ମଚାରୀଙ୍କ ହାତ ଥିବାରୁ ପ୍ରଶାସନ ତୁରନ୍ତ ପଦକ୍ଷେପ ଗ୍ରହଣ ନ କଲେ ଜାତୀୟ ଗ୍ରୀନ ଟ୍ରିବ୍ୟୁନାଲର ଦ୍ୱାରସ୍ଥ ହେବେ ବୋଲି ଆଇନ୍ଜୀବୀ ମାନେ ମତବ୍ୟକ୍ତ କରିଛନ୍ତି। ଏ ନେଇ ଡିଏଫ୍ଓ ଏଚ୍ଡି ଧନରାଜ କହିଛନ୍ତି ଯେ ଉକ୍ତ ସ୍ଥାନର ଅବସ୍ଥା ଦେଖିବାକୁ ଯାଇଥିଲେ। କାମର ସଠିକ୍ କାଗଜପତ୍ର ମାଗିଛନ୍ତି। ମିଳିବା ପରେ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ।