ଧାମନଗର,୨୨ା୧୦(ଡି.ଏନ.ଏ.): ଭଦ୍ରକ ଜିଲା ଧାମନଗର ଓ ତିହିଡ଼ି ବ୍ଲକରେ କାର୍ଯ୍ୟରତ ସରକାରୀ ଅଧିକାରୀଙ୍କୁ ନିର୍ବାଚନ ପରିଚାଳନା କାର୍ଯ୍ୟରୁ ବିରତ ରଖିବା ପାଇଁ ଶୁକ୍ରବାର ଭାଜପାର ଏକ ପ୍ରତିନିଧି ଦଳ ଜିଲାପାଳଙ୍କୁ ଭେଟି ଦାବି କରିଛି। ଏନେଇ ଜିଲାପାଳ ସିଦ୍ଧେଶ୍ୱର ବଳିରାମ ବୋନ୍ଦରଙ୍କୁ ଏକ ଦାବିପତ୍ର ପ୍ରଦାନ କରାଯାଇଛି। ଭାଜପା ପକ୍ଷରୁ କୁହାଯାଇଛି ଯେ, ଉପନିର୍ବାଚନ ପାଇଁ ଧାମନଗର ବିଧାନସଭା ନିର୍ବାଚନମଣ୍ଡଳୀ ଅଧୀନ ଅଞ୍ଚଳରେ ନିଯୁକ୍ତ କୌଣସି ଅଧିକାରୀଙ୍କୁ ପୋଲିଂ ଅଫିସର କିମ୍ବା ସେକ୍ଟର ଅଫିସର କାର୍ଯ୍ୟରେ ନିଯୁକ୍ତି ଦିଆ ନ ଯାଉ। ପୋଷ୍ଟାଲ ବାଲଟ ଗ୍ରହଣ ସମୟରେ ସମ୍ପୂର୍ଣ୍ଣ ନିରପେକ୍ଷତା ଅବଲମ୍ବନ ପୂର୍ବକ କାର୍ଯ୍ୟ ପାଇଁ ଦଳ ଦାବି କରି ଦିବ୍ୟାଙ୍ଗ ଓ ବରିଷ୍ଠ ନାଗରିକଙ୍କ ମତଦାନ କ୍ଷେତ୍ରରେ ବାହାର ସ୍ବେଚ୍ଛାସେବୀଙ୍କୁ ନିଯୁକ୍ତି ଦିଆଯାଉ। ନିର୍ବାଚନ ପରିଚାଳନା କ୍ଷେତ୍ରରେ ପକ୍ଷପାତିତା ଆଶଙ୍କା ଥିବା ତଥା ସରକାରୀ ଦଳ ଚାପ ଦୃଷ୍ଟିରୁ ପୋଲିଂ ଏବଂ ସେକ୍ଟର ଅଫିସରଙ୍କ ନିଯୁକ୍ତି ବ୍ଲକ ବାହାର ଅଞ୍ଚଳରୁ କରାଯିବାକୁ ଭାଜପା ଦାବି କରିଛି। ଭାଜପା ଉପସଭାନେତ୍ରୀ ଅନିତା ପ୍ରିୟଦର୍ଶିନୀ, ରାଜ୍ୟ ମୁଖପାତ୍ର ସତ୍ୟନାରାୟଣ ପଣ୍ଡା, ରାଜେନ୍ଦ୍ର ପଣ୍ଡା, ଅନିଲ ବିଶ୍ୱାଳ, ମନୋଜ ମହାପାତ୍ର, ମିଡିଆ ସେଲ୍ର ସୁଜିତ ଦାସ, ରଶ୍ମିରଞ୍ଜନ କାନୁନଗୋ, ବୈକୁଣ୍ଠ ନାଥ ସାହୁ, ମହିଳା ମୋର୍ଚ୍ଚାର କସ୍ତୁରୀ ମିଶ୍ର, ସୁଚରିତା ଜେନାମଣି ପ୍ରମୁଖ ଜିଲାପାଳଙ୍କୁ ଭେଟି ଦାବିପତ୍ର ପ୍ରଦାନ କରିଥିଲେ।
