ଭୁବନେଶ୍ୱର, ୨୦ା୧୧ (ସ୍ପୋଟର୍ସ ବ୍ୟୁରୋ)-ଡ୍ରାଗ୍ ଫ୍ଲିକର ଲେନ୍ ଆୟାପ୍ପା ଓ ଦିଲୀପ ତିର୍କୀଙ୍କ ସମେତ ଭାରତୀୟ ହକି କିମ୍ବଦନ୍ତୀ ଧନରାଜ ପିଲେ ଗୁରୁବାର ସକାଳେ ନାଭାଲ ଟାଟା ହକି ଏକାଡେମୀ ଓଡ଼ିଶା ପରିଦର୍ଶନ କରିଛନ୍ତି। ସେମାନେ ହକି ହାଇପରଫରମାନ୍ସ ସେଣ୍ଟରଠାରେ ବାଳିକା କ୍ୟାଡେଟ୍ ଏବଂ କୋଚିଂ ଷ୍ଟାଫ୍ଙ୍କ ସହିତ ବାର୍ତ୍ତାଳାପ କରିଥିଲେ। ଏହି ୩ ଜଣଙ୍କ ଅଚାନକ ପରିଦର୍ଶନ ବ୍ଲୁ ଟର୍ଫରେ ଅଭ୍ୟାସ ରତ ଯୁବ ହକି ଖେଳାଳିଙ୍କୁ ଆଶ୍ଚର୍ଯ୍ୟଚକିତ କରିଥିଲା। ସେମାନେ ହକି ଷ୍ଟିକ୍ ଧରି ଖେଳାଳିମାନଙ୍କୁ ନାନା କୌଶଳ ଶିଖାଇଥିଲେ। ସେମାନଙ୍କ ଅଭିଜ୍ଞତା ବାଣ୍ଟିଥିଲେ। ପିଲେ କହିଥିଲେ ନିଜକୁ କୌଣସି କ୍ଷେତ୍ରରେ କାହା ସହିତ ତୁଳନା କରିବା ଉଚିତ୍ ନୁହେଁ। ଗେମ୍ରେ ଶ୍ରେଷ୍ଠ ପ୍ରଦର୍ଶନ ମୂଳ ଲକ୍ଷ୍ୟ ରହିବା ଉଚିତ୍। ବର୍ତ୍ତମାନ ଅତୀତ ଓ ବର୍ତ୍ତମାନ ଖେଳ ମଧ୍ୟରେ ଅନେକ ପରିବର୍ତ୍ତନ ଘଟିଛି। ଉନ୍ନତ ଫଳାଫଳ ପାଇଁ ଟର୍ଫର ବ୍ୟବହାର ହେଉଛି। ୨୦୧୮ରେ ଓଡ଼ିଶା ସଫଳତାର ସହିତ ହକି ବିଶ୍ୱକପ୍ ଆୟୋଜନ କରିପାରିଛି। ଏଥିପାଇଁ ସେ ରାଜ୍ୟ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଏବଂ କ୍ରୀଡ଼ା ଓ ଯୁବ ସେବା ବିଭାଗର ଭୂମିକାକୁ ଉଚ୍ଚ ପ୍ରଶଂସା କରିଥିଲେ। ଲେନ୍ ଆୟାପ୍ପା ଭାରତର ସବୁଠାରୁ ଦ୍ରୁତ ଏବଂ ସଫଳ ଡ୍ରାଗ୍ ଫ୍ଲିକର ଭାବେ ପରିଚିତ। ସେ ଯୁବ ଖେଳାଳିଙ୍କୁ ତାଙ୍କ ଡ୍ରାଗ୍ ଫ୍ଲିକିଂ କୌଶଳ ଶିଖାଇଥିଲେ। ଏଠାରେ ଯୁବ ହକି ଖେଳାଳିଙ୍କ ଲାଗି ଯେଉଁ ସୁବିଧା ସୁଯୋଗ ଦିଆଯାଉଛି ସେଥିପାଇଁ ରାଜ୍ୟସରକାରଙ୍କ ପ୍ରଶଂସା କରିଥିଲେ। ଓଡ଼ିଶା ୨୦୨୩ ହକି ବିଶ୍ୱକପ୍ ଅଧିକାର ହାସଲ କରିଥିବାରୁ ସେ ବଧେଇ ଜଣାଇଥିଲେ। ଏହି ଅବସରରେ ନାଭାଲା ଟାଟା ହକି ଏକାଡେମୀ ଓଡ଼ିଶାର ପ୍ରୋଜେକ୍ଟ ଡାଇରେକ୍ଟର ରାଜୀବ ସେଠ୍ କହିଥିଲେ ଏକାଡେମୀରେ ୪ଥର ହକି ଅଲିମ୍ପିଆନ ଧନରାଜ ପିଲେ, ଆମ ରାଜ୍ୟର ପଦ୍ମଶ୍ରୀ ଓ ହକି କିମ୍ବଦନ୍ତୀ ଦିଲୀପ ତିର୍କୀ ଏବଂ ଜଣାଶୁଣା ଭାରତୀୟ ଡ୍ରାଗ୍ ଫ୍ଲିକର ଲେନ୍ ଆୟାପ୍ପାଙ୍କ ଉପସ୍ଥିତି ଏକ ସ୍ମରଣରୀୟ ମୁହୂର୍ତ୍ତ ବୋଲି ବର୍ଣ୍ଣନା କରିଥିଲେ।