ବ୍ରହ୍ମପୁର ଅଫିସ,୯ା୮:ଶ୍ରାବଣରେ ଡହ ଡହ ଖରା। ବର୍ଷା ଅଭାବରୁ ଗଞ୍ଜାମ ଜିଲାରେ ଚାଷକାର୍ଯ୍ୟରେ ବାଧା ସୃଷ୍ଟି ହୋଇଥିଲା। ଏଥିଯୋଗୁ ଚାଷଜମି ଫାଟି ଯାଇଥିବା ବେଳେ ଆଉ କେଉଁଠି ତଳି ପୋଡ଼ିବା ଓ ଗଜାମରୁଡ଼ି ଦେଖାଦେଇଥିଲା। ଏପରି ସ୍ଥିତିରେ ଚାଷୀ ମୁଣ୍ଡରେ ହାତ ଦେଇ ବସିଥିଲା। ଚାଷଜମିରେ ପାଣି ମଡ଼ାଇବାକୁ ଚାଷୀମାନେ ବିକଳ୍ପ ପନ୍ଥା ଆରମ୍ଭ କରିଥିଲେ। ଜିଲା କୃଷି ଅଧିକାରୀ ଓ ପ୍ରଶାସନିକ ଅଧିକାରୀ ମଧ୍ୟ ଚାଷଜମି ପରିଦର୍ଶନ କରିଥିଲେ। କିନ୍ତୁ ଗତ ୩ ଦିନ ଧରି ଲଘୁଚାପଜନିତ ଲଗାଣ ବର୍ଷାକୁ ନେଇ ଚାଷୀକୁଳ ଆଶ୍ୱସ୍ତି ହୋଇଛି। ଫଳରେ ଜିଲାରେ ଚାଷକାର୍ଯ୍ୟ ସାଙ୍ଗକୁ ବେଉଷଣ ମଧ୍ୟ ଭଲ ହେବ ବୋଲି ଚାଷୀ ଆଶା ପ୍ରକଟ କରିଛନ୍ତି, ଯାହାକୁ ନେଇ ଚାଷଜମିରେ ରୁଆ କାର୍ଯ୍ୟରେ ମଧ୍ୟ ଅଗ୍ରଗତି ଘଟିଛି। ଲଗାଣ ବର୍ଷା ଚାଷୀଙ୍କ ମୁହଁରେ ହସ ଫୁଟାଇଛି। ଏହାସହ ଜିଲାର ବିଭିନ୍ନ ବ୍ଲକରେ ତଳି ପୋଡ଼ି ଓ ଗଜାମରୁଡି ଆଶଙ୍କା ମଧ୍ୟ ଦୂରୀଭୂତ ହୋଇଛି। ଜିଲା କୃଷି ଅଧିକାରୀଙ୍କ କାର୍ଯ୍ୟାଳୟ ସୂତ୍ରରୁ ମିଳିଥିବା ସୂଚନାନୁଯାୟୀ, ବର୍ତ୍ତମାନ ସୁଦ୍ଧା ଜିଲାରେ ୧ ଲକ୍ଷ ୫୦ ହଜାର ୨୩୬ ହେକ୍ଟର ମଧ୍ୟରୁ ୩୩,୬୩୩ ହେକ୍ଟର ଜମିରେ ରୁଆକାର୍ଯ୍ୟ ସରିଛି। ଏଥିମଧ୍ୟରୁ ଆସିକାରେ ୨୫୧୯ ହେକ୍ଟର, ଶେରଗଡ଼ ୪୪୮ ହେକ୍ଟର, ଧରାକୋଟ ୧୧୦୦ ହେକ୍ଟର, ସୋରଡ଼ା ୪୫୮ ହେକ୍ଟର, ପାତ୍ରପୁର ୩୩୦ ହେକ୍ଟର, ଚିକିଟି ୧୩୯୦ ହେକ୍ଟର, ରଙ୍ଗେଇଲୁଣ୍ଡା ୫୭୨ ହେକ୍ଟର, ଭଞ୍ଜନଗର ୨୯୭୩ ହେକ୍ଟର, ବେଲଗୁଣ୍ଠା ୨୧୧୭ ହେକ୍ଟର, ବୁଗୁଡା ୧୬୧୦ ହେକ୍ଟର, ଛତ୍ରପୁର ୧୦୧୯ ହେକ୍ଟର, ପୁରୁଷୋତ୍ତମପୁର ୧୦୩୦ ହେକ୍ଟର, ଗଞ୍ଜାମ ୭୦ ହେକ୍ଟର, ହିଞ୍ଜିଳିକାଟୁ ୧୭୧ ହେକ୍ଟର, ସାନଖେମୁଣ୍ଡି ୫୪୦ ହେକ୍ଟର, ଦିଗପହଣ୍ଡି ୯୨୦ ହେକ୍ଟର, କୁକୁଡ଼ାଖଣ୍ଡି ୮୨୦ ହେକ୍ଟର, ଖଲ୍ଲିକୋଟ ୪୨୨୪ ହେକ୍ଟର, ବେଗୁନିଆପଡା ୨୩୭୨ ହେକ୍ଟର, କବିସୂର୍ଯ୍ୟନଗର ୧୩୧୨ ହେକ୍ଟର ଓ ପୋଲସରାରେ ୪୨୧୦ ହେକ୍ଟର ଚାଷଜମିରେ ରୁଆକାର୍ଯ୍ୟ ହୋଇଥିବା ସୂଚନା ମିଳିଛି। ତେବେ ବର୍ଷା ଅଭାବରୁ ଗଞ୍ଜାମ ବ୍ଲକରେ ରୁଆକାର୍ଯ୍ୟ କମ୍ ରହିଛି। ଗତ ୪ ତାରିଖ ସୁଦ୍ଧା ଜିଲାରେ ୫.୫ ମିଲି ମିଟର ବର୍ଷା ହୋଇଥିବା ସୂଚନା ମିଳିଛି। ତେବେ ଏପରି ଆହୁରି ୭ ଦିନ ବର୍ଷା ଲାଗିରହିଲେ ଚାଷକାର୍ଯ୍ୟ ଅନୁକୂଳ ହେବ ବୋଲି ଅନୁମାନ କରାଯାଉଛି।