ସାଉଥ ସୁପରଷ୍ଟାର ଧନୁଷ ଏବଂ ଐଶ୍ୱର୍ଯ୍ୟା ରଜନୀକାନ୍ତ ସେମାନଙ୍କର ୧୮ ବର୍ଷର ବିବାହ ସମ୍ପର୍କକୁ ସମାପ୍ତ କରିଛନ୍ତି। ଧନୁଷ ରଜନୀକାନ୍ତଙ୍କ ଝିଅ ଐଶ୍ୱର୍ଯ୍ୟା ରଜନୀକାନ୍ତଙ୍କୁ ୧୮ ନଭେମ୍ବର ୨୦୦୪ରେ ବିବାହ କରିଥିଲେ। ଛାଡପତ୍ର ବିଷୟରେ ଧନୁଷ ଏବଂ ଐଶ୍ୱର୍ଯ୍ୟା ସୋସିଆଲ ମିଡିଆରେ ଲେଖିଛନ୍ତି, ୧୮ ବର୍ଷ ଧରି ପରସ୍ପର ପରସ୍ପରର ବନ୍ଧୁ, ଦମ୍ପତି ଏବଂ ଶୁଭେଚ୍ଛୁ ଭାବେ ରହିଥିଲୁ। ଜୀବନ ଯାତ୍ରାରେ ବୁଝାମଣା ରଖିବା ସହିତ ପରସ୍ପର ସହ ଖାପ ଖୁଆଇ ଚଳିଥିଲୁ ଏବଂ ଆଗକୁ ବଢ଼ିବିଥିଲୁ। କିନ୍ତୁ ଆମେ ଏବେ ଏଭଳି ଏକ ସ୍ଥାନରେ ଛିଡ଼ା ହୋଇଛୁ ଯେଉଁଠି ଆମର ରାସ୍ତା ଏବେ ଭିନ୍ନ। ଐଶ୍ବର୍ଯ୍ୟା ଏବଂ ମୁଁ ଦମ୍ପତି ଭାବେ ଅଲଗା ରହିବାକୁ ନିଷ୍ପତ୍ତି ନେଇଛୁ। ପ୍ରଶଂସକମାନେ ଆମର ଏହି ନିଷ୍ପତ୍ତିକୁ ସମ୍ମାନ ଦେବେ ବୋଲି ଆଶା କରୁଛୁ ।
ବିବାହ ପୂର୍ବରୁ ଏବଂ ବିବାହ ପରେ ମଧ୍ୟ ଧନୁଷଙ୍କ ନାମ କୌଣସି ଅଭିନେତ୍ରୀଙ୍କ ସହ ଜଡିତ ନ ଥିଲା। କିନ୍ତୁ ୨୦୧୧ରେ ଶ୍ରୁତି ହାସନ ଏବଂ ଧନୁଷଙ୍କ ପ୍ରେମ ସମ୍ପର୍କ ଖବର ପ୍ରଶଂସକଙ୍କ ମଧ୍ୟରେ ଆଲୋଡ଼ନ ସୃଷ୍ଟି କରିଥିଲା। ଫିଲ୍ମ ‘୩’ର ଶୁଟିଂ ସମୟରେ ସେମାନଙ୍କ ପ୍ରେମ ସମ୍ପର୍କର ଖବରକୁ ନେଇ ଚର୍ଚ୍ଚା ହୋଇଥିଲା ଆଶ୍ଚର୍ଯ୍ୟର କଥା ହେଉଛି ଏହି ଫିଲ୍ମଟି ଧନୁଷଙ୍କ ସ୍ତ୍ରୀ ଐଶ୍ୱର୍ଯ୍ୟାଙ୍କ ଦ୍ୱାରା ନିର୍ଦ୍ଦେଶିତ ହୋଇଥିଲା।
କୁହାଯାଏ ଐଶ୍ୱର୍ଯ୍ୟା ଶ୍ରୁତିଙ୍କର ପିଲାଦିନର ବନ୍ଧୁ, ତେଣୁ ଶ୍ରୁତି ନିଜ ବନ୍ଧୁ ହୋଇ ତାଙ୍କ ସହ ବିଶ୍ୱାସଘାତକତା କରିଥିଲେ। ଶୁଟିଂ ସମୟରେ ଧନୁଷ ଏବଂ ଶ୍ରୁତି ହାସନ ଏକାଠି ଅଧିକ ସମୟ ବିତାଇବା ଆରମ୍ଭ କରିଥିଲେ। ସେହି ସମୟରେ ଧନୁଷ ଏବଂ ଐଶ୍ୱର୍ଯ୍ୟାଙ୍କ ବିବାହ ଭାଙ୍ଗିବା ଖବର ମଧ୍ୟ ଚର୍ଚ୍ଚାକୁ ଆସିଥିଲା। ଯଦିଓ ଶ୍ରୁତି ଏକ ସାକ୍ଷାତକାରରେ ଏହାକୁ ନିରର୍ଥକ ବୋଲି କହିଥିଲେ । ଏଥି ସହିତ ଧନୁଷଙ୍କ ସ୍ତ୍ରୀ ଐଶ୍ୱର୍ଯ୍ୟା ମଧ୍ୟ ଏକ ସାକ୍ଷାତକାରରେ କହିଥିଲେ, ଏହି ଗୁଜବରେ କୌଣସି ସତ୍ୟତା ନାହିଁ।
