ଭୋପାଳ,୨୩।୮: ମଧ୍ୟପ୍ରଦେଶ ଧାର ଜିଲାରେ ଜଣେ ପିତା ପୁଅ ପରୀକ୍ଷା ଦେବା ପାଇଁ ଦୀର୍ଘ ୧୦୫ କିଲୋମିଟର ସାଇକେଲ ଚଲାଇବା ଘଟଣା ନିକଟରେ ସୋସିଆଲ ମିଡିଆରେ ଭାଇରାଲ ହୋଇଥିଲା। ଏହାପରେ ଜିଲା ପ୍ରଶାସନ ତାଙ୍କୁ ସହଯୋଗର ହାତ ବଢାଇଥିବା ବେଳେ ଏବେ ଏହି ପିତାଙ୍କ ପାଇଁ ଦେବଦୂତ ସାଜିଛନ୍ତି ଜଣାଶୁଣା ବ୍ୟବସାୟୀ ଆନନ୍ଦ ମହିନ୍ଦ୍ରା। ଆନନ୍ଦ ଏବେ ଉକ୍ତ ଛାତ୍ରଙ୍କ ସମସ୍ତ ପାଠପଢା ଖର୍ଚ୍ଚ ବହନ କରିବେ ବୋଲି କହିଛନ୍ତି। ଟୁଇଟ୍ କରି ଆନନ୍ଦ ଲେଖିଛନ୍ତି, ଏଭଳି ପିତାଙ୍କୁ ସଲାମ। ଯିଏ ନିଜେ ୧୦୫ କିଲୋମିଟର ସାଇକେଲ ଚଲାଇ ପୁଅର ସୁନାର ଭିବଷ୍ୟତର କଳ୍ପନା କରୁଛନ୍ତି। ଏମିତି ସ୍ବପ୍ନ ହିଁ ଦେଶକୁ ଆଗେଇ ନେବାରେ ସାହାଯ୍ୟ କରିବ। ଉକ୍ତ ପରିବାର ସହ ଯୋଗାଯୋଗ କରିବାକୁ ସେ ଖବରଦାତାଙ୍କ ସହାୟତା ଲୋଡିଛନ୍ତି। ଆନନ୍ଦ କହିଛନ୍ତି ତାଙ୍କ ସଂସ୍ଥା ପିଲାଟିର ସମସ୍ତ ପାଠପଢା ଖର୍ଚ୍ଚ ବହନ କରିବ। ସୂଚନାଯୋଗ୍ୟ, କରୋନା ମହାମାରୀ ପାଇଁ ଲକ୍ ଡାଉନ ଚାଲିଥିବା ବେଳେ ମଧ୍ୟପ୍ରଦେଶ ଧାର ଜିଲାର ବୟଡିପୁରାରେ ରହୁଥିବା ଶୋଭାରାମଙ୍କ ପୁଅ ଆଶିଷ ୧୦ ପରୀକ୍ଷା ଦେବାକୁ ବାହାରିଥିଲେ। ହେଲେ ଗାଡି ମଟର ଚାଲୁ ନ ଥିବାରୁ ବା ଅନ୍ୟ କୌଣସି ଗାଡିକୁ ରିଜର୍ଭ କରି ଯିବାଭଳି ଅବସ୍ଥା ନ ଥିଲା ପିଲାଟି। ଫଳରେ ଶୋଭାରାମ ତାଙ୍କ ପୁଅ ଆଶିଷର ଉଜ୍ୱଳ ଭବିଷ୍ୟତ କାମନା କରି ସାଙ୍ଗରେ ୨ ଦିନର ଖାଇବା ଧରି, ଆରମ୍ଭ କରିଥିଲେ ୧୦୫ କିଲୋମିଟରର ଯାତ୍ରା। ସୋସିଆଲ ମିଡିଆରେ ଏହା ଭାଇରାଲ ହେବା ପରେ ସମସ୍ତଙ୍କ ଦୃଷ୍ଟି ଆକର୍ଷଣ କରିଛି।
