ବରଗଡ଼ ଅଫିସ୍,୨୧।୧୦ – ବରଗଡ଼ ଜିଲା ବିଜେପୁର ବ୍ଲକ ଅନ୍ତର୍ଗତ ଭଟିଗାଁ ପଞ୍ଚାୟତ ମାଝିପାଲି ଗ୍ରାମର ବୃଦ୍ଧ ଦମ୍ପତି ସୁରୁ ଓ ତାଙ୍କ ସ୍ତ୍ରୀ ସୁବିଧାଙ୍କୁ ପ୍ରଧାନମନ୍ତ୍ରୀ ଆବାସ ଯୋଜନାରେ ପକ୍କାଘର ମିଳିବ। ବରଗଡ଼ ଜିଲାପାଳ ଜ୍ୟୋତିରଞ୍ଜନ ପ୍ରଧାନ ଏ ନେଇ ଟୁଇଟ୍ କରି ସୂଚନା ଦେଇଛନ୍ତି । ପ୍ରକାଶଥାଉକି, ଏହି ବୃଦ୍ଧ ଦମ୍ପତିଙ୍କ ଘର ବର୍ଷାରେ ଭୁଶୁଡ଼ି ପଡ଼ିବାରୁ ସେମାନେ ଦୀର୍ଘଦିନ ହେଲା ଅସହାୟ ଅବସ୍ଥାରେ ଏକ ଭଙ୍ଗା କୁଡ଼ିଆରେ ଆଶ୍ରୟ ନେଇଛନ୍ତି। ଏ ନେଇ ଗତ ୧୯ ତାରିଖ ଧରିତ୍ରୀରେ ଖବର ପ୍ରକାଶ ପାଇଥିଲା। ଏହି ଖବରକୁ ଆଧାର କରି ସାମାଜିକ କର୍ମୀ ଦୀପା ବାରିକ ସରକାରଙ୍କ ଦୃଷ୍ଟି ଆକର୍ଷଣ କରିଥିଲେ । ଏହାପରେ ଜିଲାପାଳ ପ୍ରଧାନ ବିଜେପୁର ବିଡ଼ିଓଙ୍କୁ ଏହାର ତଦନ୍ତ ନିର୍ଦ୍ଦେଶ ଦେଇଥିଲେ। ବିଜେପୁର ବିଡ଼ିଓ ପଦ୍ମନାଭ ସାମନ୍ତରାୟ ତଦନ୍ତ କରି ମଙ୍ଗଳବାର ଜିଲାପାଳଙ୍କୁ ରିପୋର୍ଟ ପ୍ରଦାନ କରିଛନ୍ତି। ଉକ୍ତ ରିପୋର୍ଟରେ ବୃଦ୍ଧ ସୁରୁ ସରକାରଙ୍କ ଗୃହ ନିର୍ମାଣ ଯୋଜନାରେ ଘର ପାଇବା ପାଇଁ ଯୋଗ୍ୟ ଏବଂ ପ୍ରଧାନମନ୍ତ୍ରୀ ଆବାସ ଯୋଜନା ହିତାଧିକାରୀ ତାଲିକାରେ ତାଲିକାଭୁକ୍ତ କରାଯାଇ ତାଙ୍କୁ ଘର ପ୍ରଦାନ କରାଯିବ ବୋଲି ବିଡ଼ିଓ ସାମନ୍ତରାୟ ଉଲ୍ଲେଖ କରିଛନ୍ତି ।