ଜୟପୁର,୧୯।୫: ଦେଶରେ କରୋନା ପ୍ରକୋପ ଜାରି ରହିଛି। ଗତ ୩ ଦିନ ହେଲା ଭାରତରେ ଦୈନିକ ସଂକ୍ରମଣ ହ୍ରାସ ପାଇଥିବା ବେଳେ ମୃତ୍ୟୁ ସଂଖ୍ୟା ମଧ୍ୟ ବୃଦ୍ଧି ପାଇବାରେ ଲାଗିଛି। ଏହି ମହାମାରୀ ଆଉ କେତେ ଯେ ଦୁର୍ଦ୍ଦଶା ଦେଖାଇବ ତାହା କଳ୍ପନା ବି କରିହେବ ନାହିଁ। ଇତିମଧ୍ୟରେ କରୋନାରେ ଆଉ ଜଣେ ବିଧାୟକଙ୍କ ପରଲୋକ ଘଟିଛି। ବୁଧବାର ରାଜସ୍ଥାନ ପ୍ରତାପଗଡ଼ ଜିଲାର ଧରିଆବାଦ ବିଧାନସଭା ଆସନର ଭାଜପା ବିଧାୟକ ଗୌତମଲାଲ ମିନାଙ୍କ କରୋନାରେ ମୃତ୍ୟୁ ହୋଇଛି। ମୀନା ହେଉଛନ୍ତି ରାଜ୍ୟର ଚତୁର୍ଥ ବିଧାୟକ ଯାହାଙ୍କର କରୋନାରେ ମୃତ୍ୟୁ ହୋଇଛି। ପୂର୍ବରୁ ଆଉ ୩ଜଣ ବିଧାୟକଙ୍କ ମୃତ୍ୟୁ ମଧ୍ୟ କରୋନାଜନିତ ହୋଇଥିଲା। ସୂଚନାଯୋଗ୍ୟ, ଗତ କିଛି ଦିନ ତଳେ ମିନା କରୋନାରେ ଆକ୍ରାନ୍ତ ହୋଇଥିବା ବେଳେ ତାଙ୍କୁ ମେ’୧୬ରେ ଉଦୟପୁର ମହାରାଣା ଭୂପାଲ ହସ୍ପିଟାଲରେ ଭର୍ତ୍ତି କରାଯାଇଥିଲା। ତେବେ ସ୍ବାସ୍ଥ୍ୟାବସ୍ଥାରେ ଅବନତି ହେବାରୁ ଗତ ୨ଦିନରୁ ତାଙ୍କୁ ଭେଣ୍ଟିିଲେଟରରେ ରଖାଯାଇଥିଲା। ହେଲେ ଚିକିତ୍ସାଧିନ ଅବସ୍ଥାରେ ତାଙ୍କର ମୃତ୍ୟୁ ଘଟିଛି। ମିନାଙ୍କ ମୃତ୍ୟୁରେ ସହରରେ ଶୋକର ଛାୟା ଖେଳିଯାଇଛି। ତାଙ୍କ ବିୟୋଗରେ ମୁଖ୍ୟମନ୍ତ୍ରୀ ଅଶୋକ ଗେହଲଟ ଟୁଇଟ କରି ଶୋକ ପ୍ରକାଶ କରିଛନ୍ତି। ସେହିପରି ପୂର୍ବତନ ମୁଖ୍ୟମନ୍ତ୍ରୀ ବସୁନ୍ଧରା ରାଜେ, ଭାଜପା ପ୍ରଦେଶ ଅଧ୍ୟକ୍ଷ ମଧ୍ୟ ଶୋକ ପ୍ରକାଶ କରିଛନ୍ତି।
