ଧରାକୋଟ,୩୦ା୮(ଡି.ଏନ୍.ଏ.): ଧରାକୋଟ ଗଡ଼ର ଉଭୟ ପଟ ରାସ୍ତା ପାଶର୍ବ ଡମ୍ପିଙ୍ଗ ୟାର୍ଡ ପାଲଟିଛି। ପ୍ରତିଦିନ ଦୋକାନ ବଜାରର ଅବ୍ୟବହୃତ ଅଳିଆ ଆବର୍ଜନାକୁ ରାସ୍ତା କଡ଼ରେ ପକାଇ ଦେଉଥିବାରୁ ଏଠାରେ ପୂତି ଗନ୍ଧାମୟ ପରିବେଶ ସୃଷ୍ଟି ହେଉଛି। ଏହାର ସୁଯୋଗ ନେଇ ସାଧାରଣ ଜନତା ମଧ୍ୟ ଘରର ଅଳିଆ ନେଇ ରାସ୍ତା ପାର୍ଶ୍ୱରେ ଫିଙ୍ଗୁଛନ୍ତି। କେନ୍ଦ୍ର ସରକାରଙ୍କଠାରୁ ରାଜ୍ୟ ସରକାର ସମସ୍ତେ ପରିବେଶ ସ୍ବଚ୍ଛତା, ପରିଚ୍ଛନ୍ନତା ଉପରେ ଗୁରୁତ୍ୱ ଆରୋପ କରୁଛନ୍ତି। ଏଥିପାଇଁ ସଚେତନତା କାର୍ଯ୍ୟକ୍ରମ ଅନୁଷ୍ଠିତ ହେଉଛି। ଗାଁ ଗାଁରେ ପ୍ରଚାର କରିବା ସହ ପଞ୍ଚାୟତ, ଅଙ୍ଗନୱାଡି, ସ୍ବାସ୍ଥ୍ୟ ବିଭାଗ ମଧ୍ୟ ସ୍ବଚ୍ଛତା ଓ ପରିଛିତା ଉପରେ ବିଭିନ୍ନ କାର୍ଯ୍ୟକ୍ରମ ଗ୍ରହଣ କରୁଛନ୍ତି। ପ୍ରଚାର ସର୍ବସ୍ବ ଏହି କାର୍ଯ୍ୟକ୍ରମ ପାଇଁ ସରକାର ଲକ୍ଷ୍ୟ ଲକ୍ଷ୍ୟ ଟଙ୍କା ବ୍ୟୟ କରୁଛନ୍ତି। ହେଲେ ଏଥିରେ ସୁଧାର ଆସିନଥିବା ଦେଖିବାକୁ ମିଳୁଛି। ସବୁଠାରୁ ଗୁରୁତ୍ୱପୂର୍ଣ୍ଣ କଥା ହେଲା ବ୍ଲକ ଅଫିସ ରାସ୍ତା, ପଞ୍ଚାୟତ ସମ୍ମୁଖ, ସ୍ବାସ୍ଥ୍ୟ କେନ୍ଦ୍ର ତଳଭାଗ, ପୋଲିସ ଥାନା ଯିବା ଧରାକୋଟ ଜାନବିଲି ମୁଖ୍ୟ ରାସ୍ତା କଡ଼ରେ ପ୍ରତ୍ୟହ ଅଳିଆ ଆବର୍ଜନା ଜମା ହେଉଛି। ଏହା ଦ୍ବାରା ପରିବେଶ ପ୍ରଦୂଷିତ ହୋଇ ବିଭିନ୍ନ ସଂକ୍ରାମକ ରୋଗ ବ୍ୟାପିବାର ସମ୍ଭାବନା ରହିଛି। ଏଣୁ ପ୍ରଶାସନ ତରଫରୁ ଏଥିପ୍ରତି ଦୃଷ୍ଟିଦେଇ ଏକ ନିର୍ଦ୍ଧିଷ୍ଟ ସ୍ଥାନ ନିରୂପଣ କରି ବଜାର ଓ ଗାଁର ଅଳିଆ ଆବର୍ଜନା ସେଠାରେ ଜମା କରିବାକୁ ପଦକ୍ଷେପ ନେଲେ ପରିବେଶ ପ୍ରଦୂଷିତ
ହେବାରେ ସନ୍ତୁଳନ ଆସନ୍ତା।