ଭୁବନେଶ୍ୱର,୮ା୬: ସଦ୍ୟ ସମାପ୍ତ ହୋଇଥିବା ସାଧାରଣ ନିର୍ବାଚନରେ ଭାଜପାକୁ ବହୁମତ ମିଳିଛି। ରାଜ୍ୟରେ ମଧ୍ୟ ଭାଜପା ସରକାର ଗଢ଼ିବ ବୋଲି ସ୍ଥିର ହୋଇଛି। ତେବେ ମୁଖ୍ୟମନ୍ତ୍ରୀ କିଏ ହେବେ ସେନେଇ କୌଣସି ସ୍ପଷ୍ଟତା ଏ ପର୍ଯ୍ୟନ୍ତ ଆସିପାରୁନାହିଁ। ନେତାଙ୍କୁ ଭୋଟ୍ ଦେଇ ଜିତାଇଥିବା ଭୋଟରମାନେ ମଧ୍ୟ ଚାହିଁ ବସିଛନ୍ତି କିଏ ରାଜ୍ୟର ମୁଖ୍ୟମନ୍ତ୍ରୀ ହେବେ। ପ୍ରଚାର ସମୟରେ ଭାଜପା ସରକାର ଗଠନ କରିବ ବୋଲି ଦୃଢ଼ ଦାବି କରିଆସୁଥିଲେ ହେଁ ମୁଖ୍ୟମନ୍ତ୍ରୀ କିଏ ହେବ ନାଁ ଘୋଷଣା କରି ନ ଥିଲା। ଜିତିବା ପରେ ମଧ୍ୟ ସ୍ପଷ୍ଟ ଭାବେ କାହା ନାଁ ଘୋଷଣା କରୁନାହିଁ। ସବୁକିଛି ନିର୍ଭର କରୁଛି ଦଳର ମୁଖିଆ ନରେନ୍ଦ୍ର ମୋଦିଙ୍କ ଉପରେ। ମୋଦି ଯାହାକୁ ଚାହିଁବେ ସେ ହିଁ ମୁଖ୍ୟମନ୍ତ୍ରୀ ହେବେ। ଇତିମଧ୍ୟରେ ଅନେକ ନେତାଙ୍କ ନାଁ ମଧ୍ୟ ଚର୍ଚ୍ଚା ହେଉଛି। ମୁଖ୍ୟମନ୍ତ୍ରୀ ପଦ ପାଇଁ ଆଗ ଧାଡ଼ିରେ ଧର୍ମେନ୍ଦ୍ର ପ୍ରଧାନ ଓ ମନମୋହନ ସାମଲଙ୍କ ନାଁ ରହିଛି ବୋଲି କିଛି ନେତା କହୁଛନ୍ତି।
କିନ୍ତୁ ଧର୍ମେନ୍ଦ୍ରଙ୍କ ପାଇଁ ଗୋଟିଏ ବଡ଼ ଅଡୁଆ ରହିଛି ବୋଲି କୁହାଯାଉଛି। କେନ୍ଦ୍ରରେ ସରକାର ଗଠନ ନେଇ ଭାଜପାକୁ ପୂର୍ଣ୍ଣ ସଂଖ୍ୟା ଗରିଷ୍ଠତା ମିଳି ନାହିଁ। ଅନ୍ୟ ସହଯୋଗୀ ଦଳକୁ ସାଥୀରେ ନେଇ ଭାଜପା କେନ୍ଦ୍ରରେ ସରକାର ଗଠନ କରିବାକୁ ଯାଉଛି। ଏ କ୍ଷେତ୍ରରେ ମୁଖ୍ୟମନ୍ତ୍ରୀ ହେଲେ ଧର୍ମେନ୍ଦ୍ରଙ୍କୁ ଏମ୍ପି ପଦରୁ ଇସ୍ତଫା ଦେବାକୁ ପଡ଼ିବ। ସେ ଇସ୍ତଫା ଦେଲେ ସମ୍ବଲପୁରରେ ଉପନିର୍ବାଚନ ହେବ। ଯଦି ଉପଦନିର୍ବାଚନ ହୁଏ ତେବେ ଏହି ଆସନ ଯଦି ଭାଜପା ହାତରୁ ଖସିଯାଏ ତେବେ ଦଳ ପାଇଁ ସମସ୍ୟା ସୃଷ୍ଟି ହେବ। ତେଣୁ ଧର୍ମେନ୍ଦ୍ର ମୁଖ୍ୟମନ୍ତ୍ରୀ ରେସ୍ରୁ ବାଦ୍ ପଡ଼ିପାରନ୍ତି ବୋଲି କୁହାଯାଉଛି।
