ଭୁବନେଶ୍ୱର,୨୬।୫: ଓଡିଶା ସମେତ ସାରା ଦେଶରେ ଗଣତନ୍ତ୍ରର ବଡ଼ ପର୍ବ ନିର୍ବାଚନ ଚାଲିଛି। ରାଜ୍ୟରେ ଶନିବାର ତୃତୀୟ ପର୍ଯ୍ୟାୟ ମତଦାନ ଶେଷ ହୋଇଛି। ଏହି ପର୍ଯ୍ୟାୟରେ ପୁରୀ, ଭୁବନେଶ୍ୱର, କଟକ ଓ ସମ୍ବଲପୁର ସମେତ କେତକ ଜିଲାରେ ଭୋଟ ପଡିଛି। ଏଥିରେ ଜନତା ବହୁ ହେଭିଓ୍ବେଟଙ୍କ ଭାଗ୍ୟ ନିର୍ଦ୍ଧାରଣ କରିଛନ୍ତି। ଏହାରି ଭିତରେ ସମ୍ବଲପୁର ଏମପି ପ୍ରାର୍ଥୀ ଧର୍ମେନ୍ଦ୍ର ପ୍ରଧାନ ଭୋଟ ଦେଇଛନ୍ତି। ସେ ମତଦାନ କେନ୍ଦ୍ରକୁ ସସ୍ତ୍ରୀକ ଆସି ମତଦାନ କରିଛନ୍ତି।
ଏହି ସମୟରେ ସେ ‘କାହାକୁ ଭୋଟ ଦେଲେ’ ଗଣମାଧ୍ୟମର ଏକ ପ୍ରଶ୍ନରେ ଉତ୍ତର ରଖି କହିଛନ୍ତି, ନିଜକୁ ସୌଭାଗ୍ୟଶାଳୀ ମନେ କରୁଛି ମୁଁ ଗଣତନ୍ତ୍ରର ମହାପର୍ବରେ ଭାଗ ନେଇଛି। ଏଥିପାଇଁ ମୁଁ ନିଜକୁ ଗର୍ବିତ ଅନୁଭବ କରୁଛି। ମୁଁ ଉତ୍ତର ଭୁବନେଶ୍ୱର ଅଞ୍ଚଳରେ ରହୁଛି। ମୋ ନିର୍ବାଚନମଣ୍ଡଳୀର ତଥା ଆମ ଦଳର ଭୁବନେଶ୍ୱର ଲୋକ ସଭା ପ୍ରାର୍ଥୀନୀ ଅପରାଜିତା ଷଡଙ୍ଗୀ ଏବଂ ବିଧାୟକ ପ୍ରାର୍ଥୀ ପ୍ରିୟଦର୍ଶୀ ମିଶ୍ରଙ୍କ ସପକ୍ଷରେ ଭୋଟ ଦେଇଛି। ଏଥର ପରିବର୍ତ୍ତନର ହାଓ୍ବା ବୋହୁଛି। ଜନତା ନିଶ୍ଚୟ ନିର୍ଣ୍ଣାୟକ ନିଷ୍ପତ୍ତି ନେବେ।