ମୁମ୍ବାଇ,୧୮।୪: ଦିଲ୍ଲୀ କ୍ୟାପିଟାଲ୍ସ ଆଗରେ ୧୯୬ ରନ୍ର ବଡ଼ ଟାର୍ଗେଟ୍ ଛିଡ଼ା କରିଥିଲା କିଙ୍ଗ୍ସ ପଞ୍ଜାବ। କିନ୍ତୁ ଶିଖର ଧାଓ୍ବନଙ୍କ ବିସ୍ଫୋରକ ୯୨ ରନ୍ର ଇନିଂସ ଓ ଖରାପ ବୋଲିଂ ପଞ୍ଜାବ ପାଇଁ ସାଜିଥିଲା କାଳ। ଫଳରେ ବାର୍ଥଡେ ବୟ ଲୋକେଶ ରାହୁଲଙ୍କୁ ଦେଖିବାକୁ ପଡ଼ିଛି ପରାଜୟର ମୁହଁ। ଦିଲ୍ଲୀ ୧୮.୨ ଓଭରରେ ୪ ଉଇକେଟ ହରାଇ ହାସଲ କରି ନେଇଥିଲା ବିଜୟ ଲକ୍ଷ୍ୟ। ଅଳ୍ପକେ ଶତକରୁ ବଞ୍ଚିତ ହୋଇଥିବା ଧାଓ୍ବନଙ୍କୁ ପ୍ଲେୟାର ଅଫ୍ ଦି ମ୍ୟାଚ୍ ବିବେଚିତ କରାଯାଇଛି। ଏହି ବିଜୟ ସହ ଦିଲ୍ଲୀ ପଏଣ୍ଟ ଟେବୁଲର ଦ୍ୱିତୀୟ ସ୍ଥାନକୁ ଉନ୍ନୀତ ହୋଇଛି।
ଆମନ୍ତ୍ରଣ ପାଇ ପ୍ରଥମେ ବ୍ୟାଟିଂ କରିଥିବା ପଞ୍ଜାବ ପାଇଁ ରାହୁଲ ଓ ଅଗ୍ରଓ୍ବାଲଙ୍କ ଓପନିଂ ଯୋଡ଼ି ୧୨୨ ରନ୍ କରିଥିଲେ। ମୟଙ୍କ ୬୯ (୭ ଚୌକା ଓ ୪ ଛକା) ଓ ରାହୁଲ ୬୧ (୭ ଚୌକା ଓ ୨ ଛକା) ରନ୍ର ଇନିଂସ ଖେଳିଥିଲେ। ତାଙ୍କ ପରେ ଦୀପକ ହୁଡ଼ା ୨୨* ଓ ଶାହାରୁଖ ଖାନ (୧୫*)ଙ୍କ ଯୋଗୁ ପଞ୍ଜାବ ୨୦ ଓଭରରେ ୪ ଉଇକେଟ ହରାଇ ୧୯୫ ରନ୍ କରିଥିଲା। ଜବାବରେ ଦିଲ୍ଲୀକୁ ଭଲ ଆରମ୍ଭ ଦେଇଥିଲେ ପୃଥ୍ବୀ ଶ’ ଓ ଧାଓ୍ବନ। ଦୁହେଁ ୫.୨ ଓଭରରେ ଯୋଡ଼ିଥିଲେ ୫୯ ରନ୍। ପୃଥ୍ବୀ (୩୨ ରନ୍, ୩ ଚୌକା ଓ ୨ ଛକା) ଆଉଟ୍ ହେବା ପରେ ଦଳକୁ ସମ୍ଭାଳି ଥିଲେ ଧାଓ୍ବନ। ସେ ୪୯ ବଲରେ ଖେଳିଥିଲେ ୯୨ ରନ୍ର ଇନିଂସ। ତାଙ୍କ ପାଳିରେ ସାମିଲ ଥିଲା ୧୩ ଚୌକା ଓ ୨ ଛକା। ଧାଓ୍ବନଙ୍କ ଉଇକେଟ ପଡ଼ିବା ପରେ ମାର୍କସ ଷ୍ଟୋଇନିସ (୨୭ ରନ୍, ୩ ଚୌକା ଓ ଗୋଟିଏ ଛକା ) ଦଳକୁ ଜିତାଇଥିଲେ।
