ଦୁବାଇ,୨୨।୧୦(ପି.ଟି.): ଦିଲ୍ଲୀ କ୍ୟାପିଟାଲ୍ସ ଅଭିଜ୍ଞ ଓପନର ଶିଖର ଧାଓ୍ବନ ଚଳିତ ଇଣ୍ଡିଆନ ପ୍ରିମିୟର ଲିଗ୍ (ଆଇପିଏଲ୍)ରେ ଜବରଦସ୍ତ ଫର୍ମରେ ରହିଛନ୍ତି। ପ୍ରଥମ ବ୍ୟାଟ୍ସମ୍ୟାନ ଭାବେ ସେ ଆଇପିଏଲ୍ରେ କ୍ରମାଗତ ଦୁଇଟି ବିସ୍ଫୋରକ ଶତକ ହାସଲ କରି ଇତିହାସ ସୃଷ୍ଟି କରିଛନ୍ତି। ଏହି ସୁପର ଫର୍ମର ପଛରେ ଥିବା ରହସ୍ୟ ନେଇ ସେ ମୁହଁ ଖୋଲିଛନ୍ତି। ଦ୍ରୁତଗତିରେ ଦୌଡ଼ିବା, ତାଜା ଅନୁଭବ କରିବା ଓ ଆଉଟ୍ ହେବାକୁ ନ ଡରିବା କାରଣରୁ ଏଥର ଭଲ ପ୍ରଦର୍ଶନ କରିଛି ବୋଲି ଧାଓ୍ବନ କହିଛନ୍ତି। ଧାଓ୍ବନ ମଧ୍ୟ ଦୁଇଟି ଅର୍ଦ୍ଧଶତକ ହାସଲ କରିଛନ୍ତି। କିଙ୍ଗ୍ସ ଏକାଦଶ ପଞ୍ଜାବ ବିପକ୍ଷରେ ସେ ୬୧ ବଲର ସମ୍ମୁଖୀନ ହୋଇ ୧୦୬ ରନର ଶତକୀୟ ପାଳି ଖେଳିଥିଲେ ମଧ୍ୟ ଦିଲ୍ଲୀ ୫ ଉଇକେଟରେ ପରାସ୍ତ ହୋଇଥିଲା।
ବ୍ୟାଟିଂ କରିବା ବେଳେ ସକାରାତ୍ମକ ମନୋଭାବ ପୋଷଣ କରିଥିଲି। ରନ୍ ସ୍କୋର କରିବା ପାଇଁ ପିଚ୍ର ଧର୍ମ କିଭଳି ରହିଛି ସେ ସମ୍ପର୍କରେ ଆଦୌ ଚିନ୍ତା କରି ନ ଥିଲି। ସାହସର ସହିତ ଖେଳିଥିଲି। ଆଉଟ୍ ହେବାକୁ ଆଦୌ ଡରି ନ ଥିଲି ବୋଲି ସେ କହିଛନ୍ତି। ଗତ ୧୭ ତାରିଖରେ ଚେନ୍ନାଇ ସୁପର କିଙ୍ଗ୍ସ ବିପକ୍ଷରେ ସେ ୧୦୧ ରନର ଅପରାଜିତ ଶତକୀୟ ପାଳି ଖେଳିଥିଲେ। ଅଧିକ ସମୟର ବିଶ୍ରାମ ପାଇଥିବାରୁ ଶାରୀରିକ ଓ ମାନସିକ ଭାବେ ବେଶ୍ ତାଜା ଥିଲି। ଟୁର୍ନାମେଣ୍ଟର ଆରମ୍ଭରେ ଅବଶ୍ୟ ତାଙ୍କ ପ୍ରଦର୍ଶନ ସେତେଟା ଭଲ ନ ଥିଲା। ବଡ଼ ସ୍କୋର ହାସଲ କରିପାରୁ ନ ଥିଲେ ମଧ୍ୟ ସେ ବଲ୍କୁ ପ୍ରହାର କରୁଥିଲେ। ଦିଲ୍ଲୀ ଖେଳାଳିମାନେ ଭଲ ପ୍ରଦର୍ଶନ କରୁଛନ୍ତି। ତେବେ ଗତ ମ୍ୟାଚ୍ରେ ଅନ୍ୟମାନେ ଭଲ ଖେଳି ନ ଥିଲେ। ଫଳରେ ମୋତେ ସବୁ ଦାୟିତ୍ୱ ନେବାକୁ ହୋଇଥିଲା। ଏହି ସ୍ଥିର ପ୍ରଦର୍ଶନକୁ ଆଗାମୀ ମ୍ୟାଚ୍ରେ ଜାରି ରଖିବାକୁ ପ୍ରୟାସ କରିବି। ପଞ୍ଜାବ ବିପକ୍ଷ ପରାଜୟରୁ ଆମେ ଶିକ୍ଷା ଲାଭ କରିଛୁ। ଦଳର ପ୍ରଦର୍ଶନରେ ଉନ୍ନତି ପାଇଁ ଆଲୋଚନା କରିବୁ ବୋଲି ଧାଓ୍ବନ କହିଛନ୍ତି। ଦିଲ୍ଲୀ ତା’ର ପରବର୍ତ୍ତୀ ମ୍ୟାଚ୍ରେ କୋଲକାତା ନାଇଟ ରାଇଡର୍ସକୁ ଆବୁଧାବିରେ ଶନିବାର ଭେଟିବ।