ଢେଙ୍କାନାଳ, ୮ା୬(ରତନ ନାୟାର): ଅମୃତ ଭାରତ ଷ୍ଟେଶନ ଯୋଜନାରେ ରବିବାର ଭାରତର ୫୦୮ ରେଳଷ୍ଟେଶନ ପୁନର୍ବିକାଶର ଶିଳାନ୍ୟାସ କରାଯାଇଛି । ନୂଆ ଦିଲ୍ଲୀରୁ ଭର୍ଚୁଆଲ ମାଧ୍ୟମରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଯୋଜନାର ଶିଳାନ୍ୟାସ କରିଥିଲେ। କେନ୍ଦ୍ର ରେଳ ମନ୍ତ୍ରୀ ଅଶ୍ୱିନୀ ବୈଷ୍ଣବ ଉତ୍ସବରେ ସାମିଲ ହୋଇ ଯୋଜନା ମଧ୍ୟରେ ହେବାକୁ ଥିବା କାର୍ଯ୍ୟକ୍ରମ ସମ୍ପର୍କରେ ସୂଚନା ଦେଇଥିଲେ। ଅମୃତ ଭାରତ ଷ୍ଟେଶନ ପୁନର୍ବିକାଶ ଶିଳାନ୍ୟାସ ଯୋଜନାରେ ୨୫ ହଜାର କୋଟି ଟଙ୍କାରେ ଦେଶର ୫୦୮ ରେଳ ଷ୍ଟେଶନର ବିଶ୍ୱସ୍ତରୀୟ ଉନ୍ନତୀକରଣ ହେବ । ତନ୍ମଧ୍ୟରୁ ଓଡ଼ିଶାରେ ପୂର୍ବତଟ ରେଳବାଇ ଅଧୀନରେ ଖୋର୍ଦ୍ଧାରୋଡ଼ ଡିଭିଜନ ଅଧୀନରେ ଥିବା ୧୧ଟି ରେଳ ଷ୍ଟେଶନର ବିକାଶ କରାଯିବ। ଏଥିରେ ବହୁ ପୁରାତନ ଢେଙ୍କାନାଳ ରେଳଷ୍ଟେଶନ ଓ ଜିଲାର ମେରାମୁଣ୍ଡଳୀ ରେଳ ଷ୍ଟେଶନ ରହିଛି।
ଢେଙ୍କାନାଳ ରେଳଷ୍ଟେଶନ ପାଇଁ ୨୬ କୋଟି ୧୧ ଲକ୍ଷ ଓ ମେରାମୁଣ୍ଡଳୀ ଷ୍ଟେଶନ ପାଇଁ ୨୧ କୋଟି ୯୯ ଲକ୍ଷ ଟଙ୍କା ମଞ୍ଜୁର କରାଯାଇଛି । ଏହି ଉପଲକ୍ଷେ ଢେଙ୍କାନାଳ ରେଳଷ୍ଟେଶନ ପରିସରରେ ଆୟୋଜିତ ଉତ୍ସବରେ ମୁଖ୍ୟ ଅତିଥି ଭାବେ ବିଧାୟକ ସୁଧୀର କୁମାର ସାମଲ ଯୋଗଦେଇ ଢେଙ୍କାନାଳ ଓ ମେରାମୁଣ୍ଡଳୀ ରେଳଷ୍ଟେଶନକୁ ଅମୃତ ଭାରତ ଷ୍ଟେଶନ ଯୋଜନାରେ ସାମିଲ କରାଯିବା ଏକ ସ୍ବାଗତଯୋଗ୍ୟ ପଦକ୍ଷେପ ବୋଲି କହିଥିଲେ।
ସମ୍ମାନିତ ଅତିଥି ଭାବେ ପଦ୍ମଶ୍ରୀ ପଣ୍ଡିତ ଅନ୍ତର୍ଯାମୀ ମିଶ୍ର, ପୂର୍ବତନ ରାଜ୍ୟ ସଭା ସଦସ୍ୟ ରୁଦ୍ରନାରାୟଣ ପାଣି, ପୂର୍ବତନ ବିଧାୟକ କୃଷ୍ଣଚନ୍ଦ୍ର ପାତ୍ର, ଜିଲାପାଳ ସରୋଜ କୁମାର ସେଠୀ, ଏସ୍ପି ଜ୍ଞାନ ରଞ୍ଜନ ମହାପାତ୍ର, ଏମ୍ପିଙ୍କ ପ୍ରତିନିଧି ପ୍ରତାପ ଦାସ, ଅତିରିକ୍ତ ଜିଲାପାଳ ରମେଶ ଚନ୍ଦ୍ର ସେଠୀ, ଉଦୟ ନାଥ ମହାପାତ୍ର, ଜିଲା ଭାଜପା ସଭାପତି ନରେଶ ଚନ୍ଦ୍ର ମହାପାତ୍ର ପ୍ରମୁଖ ଯୋଗ ଦେଇଥିଲେ । କାର୍ଯ୍ୟକ୍ରମକୁ ରେଳବାଇ ବିଭାଗର ଡେପୁଟି ଚିଫ୍ ଇଞ୍ଜିନିୟର ଶୈଳେନ୍ଦ୍ର କୁମାର ନାୟକ ଓ ଷ୍ଟେଶନ ମ୍ୟାନେଜର ମନୋଜ କୁମାର ପାଣ୍ଡେ ପରିଚାଳନା କରିଥିଲେ। ଏହି ଅବସରରେ ସ୍କୁଲ ଛାତ୍ରୀଛାତ୍ରଙ୍କ ଦ୍ବାରା ସାଂସ୍କୃତିକ କାର୍ଯ୍ୟକ୍ରମ ହୋଇଥିଲା।
