ଢେଙ୍କାନାଳ ଅଫିସ,୨୩ ।୧୧
ଢେଙ୍କାନାଳ ଜିଲାର ନୂତନ ଏସ୍ପି ଭାବେ ଲୋଗା ନାୟାଗୀ ଦିବ୍ୟା ଭି. ସୋମବାର ଦାୟିତ୍ୱ ଗ୍ରହଣ କରିଛନ୍ତି। ପୂର୍ବାହ୍ନରେ ବିଦାୟୀ ଏସ୍ପି କେ. ଶିବା ସୁବ୍ରମଣିଙ୍କ ଠାରୁ ସେ ଦାୟିତ୍ୱ ଗ୍ରହଣ କରିଥିଲେ। ଏହି ଅବସରରେ ଜିଲା ପୋଲିସ କାର୍ଯ୍ୟାଳୟର ଅଧିକାରୀ ଓ କର୍ମଚାରୀମାନେ ନୂତନ ଏସ୍ପିଙ୍କୁ ସ୍ବାଗତ ସମ୍ବର୍ଦ୍ଧନା ଜଣାଇଥିଲେ। ଶିଳ୍ପ, ବାଣିଜ୍ୟ ପ୍ରତିଷ୍ଠାନ କର୍ମକର୍ତ୍ତାମାନେ ମଧ୍ୟ ଜିଲା କାର୍ଯ୍ୟାଳୟଠାରେ ନୂତନ ଏସ୍ପିଙ୍କୁ ଭେଟି ସ୍ବାଗତ କରିଥିଲେ। ଏହି ଅବସରରେ ଗଣମାଧ୍ୟମକୁ ସୂଚନା ପ୍ରଦାନ କରି ନୂଆ ଏସ୍ପି କହିଥିଲେ, ଜିଲାରେ ଆଇନଶୃଙ୍ଖଳା ରକ୍ଷା ଓ ଟ୍ରାଫିକ ନିୟନ୍ତ୍ରଣକୁ ପ୍ରାଥମିକତା ଦିଆଯିବ। ସମସ୍ତ ଥାନା, ଫାଣ୍ଡି ଅଞ୍ଚଳ ପରିଦର୍ଶନ ଏବଂ ଅନୁଧ୍ୟାନ ସରିବା ପରେ ପରବର୍ତ୍ତୀ ପଦକ୍ଷେପ ଗ୍ରହଣ କରାଯିବ। ଲୋଗା ନାୟାଗୀ ଦିବ୍ୟା ଭି. ୨୦୧୩ ବ୍ୟାଚ୍ର ଭାରତୀୟ ପୋଲିସ ସେବା ଅଧିକାରୀ। ସେ ଏଥିପୂର୍ବରୁ କ୍ରାଇମବ୍ରାଞ୍ଚ ଏସ୍ପି ରହିଥିଲେ। ତାଙ୍କୁ ମିଶାଇ ଜିଲା ଏଯାଏ ୩ ଜଣ ମହିଳା ଏସ୍ପିଙ୍କୁ ପାଇଛି। ବିଦାୟୀ ଏସ୍ପି ସୁବ୍ରମଣିଙ୍କ କେନ୍ଦ୍ରୀୟ ଡେପୁଟେଶନରେ ସିବିଆଇକୁ ବଦଳି ହୋଇଛି।
